Jeremaia 22 - Ai Vola Tabu (Vakadewa Makawa Vakavoutaki 2021)

Sa Vakaroti na Tui Juta kei na Nona Tamata me ra Veivutuni

¹ Sa kaya vakaoqo ko Jiova; “Mo lako sobu ki na vale i tui Juta, ka vosataka mai kina na vosa oqo,

² ka kaya, ‘Dou rogoca na vosa i Jiova, ko iko na tui Juta, ka tiko e nai tikotiko i Tevita—ko iko, kei ira na nomu tamata turaga, kei ira na nomu tamata era sa daucuru mai ki na matamata-ni-koro oqo.

³ Sa kaya vakaoqo ko Jiova: Dou ia na lewa kei nai valavala dodonu, ka vakabulai koya sa vakacacani mai na liga i koya sa vakacacana. Ia dou kakua ni vakararawataki ira na vulagi, kei na luveniyali, kei na yada, ka kakua ni dou vakadavea e na yasana oqo na dra sa sega ni cala.

⁴ Ia kevaka dou sa vakabauta sara na vosa oqo, ena qai curu mai ki na matamata-ni-koro oqo ko ira na tui era sa tiko e nai tikotiko i Tevita, ka sa vodo e na qiqi-vakaturaga kei na ose, ko koya, kei ira na nona tamata turaga, kei na nona tamata.

⁵ Ia kevaka dou na sega ni rogoca na vosa oqo, ka'u sa cavuti au ni'u sa bubului, sa kaya ko Jiova, ni na rusa ga na vale oqo.

⁶ Ni sa kaya vakaoqo ko Jiova ki na vale i tui Juta: “ ‘Ko iko ko sa vakataki Kiliati, ka vaka na ulu i Lepanoni vei au; ia ka'u na lewai iko mo vanua dravuisiga, ka mo koro sa sega ni tawa.

⁷ Ia ka'u na lesia eso na kemu dauvakacaca, era sa dui vakaiyaragi; ka ra na taya sobu na nomu sitari vinaka, ka biuta ki na bukawaqa.

⁸ “ ‘A ra na lako sivita na koro oqo ko ira na lewe ni veivanua e vuqa, ka ra na dui veikayaka ki na kai nona, “E na vuku ni cava sa cakacaka kina vakaoqo ko Jiova ki na koro levu oqo?”

⁹ Era na qai kaya, “Ni ra sa biuta na veiyalayalati i Jiova na nodra Kalou, ka soro vei ira na kalou tani, ka qaravi ira.” ’ ”

Nai Tukutuku i Jeremaia me Baleti Josaia

¹⁰ Dou kakua ni tagicaki koya sa mate, se yasovaka; ia dou tagicaki koya sa lako tani yani, ni na sega ni lesu tale mai, se raica na vanua ka sucu kina ko koya.

¹¹ Ni sa kaya vakaoqo ko Jiova e na vuku i Salumi na luve i Josaia na tui Juta, ko koya sa lewa mei sosomi kei Josaia na tamana, o koya sa lako tani e na yasana oqo: “Ena sega ni lako tale mai ki ke ko koya,

¹² ni na mate ga e na yasana era sa kauti koya vakabobula kina, ia ena sega ni kunea tale na vanua oqo.”

Nai Tukutuku i Jeremaia me Baleti Jioiakimi

¹³ “Ena ca ko koya sa tara na nona vale e nai valavala e sega ni dodonu, kei na nona i taba loma ni vale e cake e na caka cala; ka sa sega ni sauma na cakacaka ni kai nona, ka sa sega ni solia vua nai voli ni nona cakacaka;

¹⁴ ka sa kaya, ‘Au na tara e dua na noqu vale levu, kei nai taba loma ni vale e cake lelevu’, ka sa taya na kena katuba; ka sa botana e cake e na sitari, ka boroi e nai qumu.

¹⁵ Ko na veiliutaki tiko beka e na vuku ni ko sa viribaiti iko e na sitari? A tamamu, sa sega beka ni kana ka gunu, ka cakava na lewa kei na cakacaka dodonu, ka sa qai vinaka kina ko koya?

¹⁶ Sa ia na veilewai e na vukudrau na malumalumu kei na dravudravua; ka sa qai vinaka kina ko koya. Sa vakaoqo na kilai au, se segai? sa kaya ko Jiova.

¹⁷ Ia na matamu kei na lomamu sa goleva ga na nomu kocokoco, kei na vakadavei ni nodra dra sa sega ni cala, kei na veivakasaurarataki, kei nai valavala kaukauwa sa cakava.”

¹⁸ O koya oqo sa kaya kina ko Jiova e na vuku i Jioiakimi na luve i Josaia na tui Juta: “Eratou na sega ni tagicaki koya, ka kaya, ‘Ulei na tuakaqu!’ se, ‘Ulei na ganequ!’ Era na sega ni yasovaki koya, ka kaya, ‘Ulei turaga!’ se, ‘Ulei na nona i ukuuku!’

¹⁹ Ena bulu ko koya me vaka na buluti ni asa— ena yarataki ga ka viritaki yani ki na taudaku ni matamata-ni-koro ko Jerusalemi.”

Na Veika Ca e na Yacovi Jerusalemi

²⁰ “Mo cabe cake ki Lepanoni, ka tagi; ka tabalaka na domomu mai Pasani, ka tagi mai Aparimi, ni ra sa vakarusai ko ira kecega era a lomani iko.

²¹ Au a vosa vei iko ni ko sa tiko vinaka; ia ko sa kaya, ‘Au na sega ni rogoca.’ Sa vakaoqo na nomu i valavala ni ko sa gone ka yacova na siga oqo, ni ko sa sega ni rogoca na domoqu.

²² A cagi ena kani ira na nomu i vakatawa kecega; ia ko ira sa lomani iko era na la'ki vakabobulataki; ko na qai madua dina ka taqaya e na vuku ni nomu ca kecega.

²³ Ko iko ka tiko mai Lepanoni, ka cakava na nomu i sova e na sitari, ko na ka lomani dina sara ni sa yacovi iko na rarawa, na yaluma me vaka na yalewa sa taratara!”

Na Lewa ni Kalou me Baleti Konaia (Jioiakini)

²⁴ “Me vaka na dina ni noqu bula, sa kaya ko Jiova, ke sa mama ni sitaba e na ligaqu i matau, ko Konaia na luve i Jioiakimi na tui Juta, ke'u sa na cavuti iko tani;

²⁵ ia ka'u na soli iko ki na ligadra era sa segata me ra vakamatei iko, ki na ligadra talega ko sa rerevaka, io ki na liga i Nepukatiresa na tui Papiloni, kei na ligadra na kai Kalitia.

²⁶ Ia ka'u na biuti iko tani, kei na tinamu ka vakasucumi iko, ki na dua na vanua tani drau a sega ni sucu kina; ia drau na mate ga mai kea.

²⁷ Ia erau na sega ni lesu yani ki na vanua era sa domona tiko.”

²⁸ Sa dua beka na matakau beci ka besetaki na tamata oqo ko Konaia? Se dua na bilo sa sega ni vinakati? A cava era sa biu tani kina ko koya kei na nona kawa, ka vakasevi ki na vanua eratou sa sega ni kila?

²⁹ Ko iko na vanua, na vanua, na vanua, mo rogoca na vosa i Jiova.

³⁰ Sa kaya vakaoqo ko Jiova: “Dou vola na tamata oqo me kua na luvena, me tamata sa sega ni yaco e na nona gauna; ni na sega ni yaco e dua na tamata e na nona kawa, me tiko e nai tikotiko i Tevita, ka vakataulewa tale mai Juta.”