Jeremaia 2 - Ai Vola Tabu (Vakadewa Makawa Vakavoutaki 2021)

Sa Vakamasuti Ira na Isireli na Kalou me ra Veivutuni

¹ A sa yaco vei au na vosa i Jiova, ka vaka:

² “Mo la'ki tukuna e na daliga i Jerusalemi, ka kaya, Sa kaya vakaoqo ko Jiova: “Au sa nanumi iko, kei na nodaru veilomani ni ko se gone, kei na loloma ni nodaru veimusuki, ni ko a muri au voli e na vanua lala, e na vanua sa sega ni tei.

³ Sa tabu ko Isireli me nei Jiova, ka sai sevu ni nona vuata. Ko ira kece sa vakacacani koya, era na cala; a ca ga ena yacovi ira, sa kaya ko Jiova.”

A Nodra Cala na Tubudra na Isireli

⁴ Dou rogoca na vosa i Jiova, na vale i Jekope, kei na veivuvale kecega e na vale i Isireli.

⁵ Sa kaya vakaoqo ko Jiova, “A caka cala cava era sa kunea vei au ko ira na tamamudou ka me ra lako vakayawa tani kina vei au, ka muria na ka wale, ka ra sa sega kina ni yaga?

⁶ Ka ra sa sega talega ni kaya, ‘Evei ko Jiova ka kauti keda cake mai na vanua ko Ijipita, ka tuberi keda e loma ni vanua lala, e na vanua dravuisiga ka sukusukura, na vanua ni dausiga kei na yaloyalo ni mate, na vanua sa sega e dua e lakova, ka sega na tamata e tiko kina?’

⁷ Ia ka'u a kauti kemudou ki na vanua sautu, mo dou kania na vuana kei na kena ka vinaka. Ia ni dou sa curu kina, dou sa vakadukadukalitaka na noqu vanua, ia na noqu i votavota dou sa vakasisilataka.

⁸ Era sa sega ni kaya na bete, ‘Evei ko Jiova?’ Ko ira talega na vu-ni-vunau era sa sega ni kilai au; ko ira nai vakatawa era sa vuki tani vei au, ko ira talega na parofita era sa daucavuti Peali, ka muria na ka sa sega ni yaga.

⁹ “O koya oqo ka'u na ia tiko kina na veilewai kei kemudou, sa kaya ko Jiova, io, kei ira talega na luvedra na luvemudou ka'u na ia na veilewai.

¹⁰ Ia dou lako mada yani ki na veiyanuyanu ko Kitimi, ka raica; ka talatala ki Kitari ka vakananuma matua, ka kila se dua kina na ka vakaoqo.

¹¹ Sa dua li na matanitu sa vakaisosomitaka na kena kalou, e na ka sa sega ni kalou? Ia ko ira na noqu tamata era sa vakaisosomitaki koya sa nodra i ukuuku e na ka sa sega ni yaga.

¹² Dou kidacala, na lomalagi, e na ka oqo, ia dou ririkotaka, dou vakasisilataka mai, sa kaya ko Jiova,

¹³ ni sa rua na ka ca era sa cakava, ko ira na noqu tamata: era sa biuti au, na mata-ni-wai bula, ka ra sa taya me nodra nai keli-ni-wai, nai keli-ni-wai ka ca ka sa lu tikotikoga.

Nai Sau ni Sega ni Yalodina i Isireli

¹⁴ “Sa bobula beka ko Isireli? Se na luve ni bobula beka ko koya? A cava sa qai vakacacani kina?

¹⁵ A luve ni laione era sa tagici koya, era sa tabalaka na domodra; ka vakalalataka na nona vanua; na nona veikoro sa kama, sa sega e tiko kina.

¹⁶ Ko ira talega na gone ni Memifisi kei Tapanesi era sa vorolaka na buradelamu.

¹⁷ A ka oqo ko sa vakayacora vei iko, se segai, ni ko sa biuti Jiova na nomu Kalou, ni sa tuberi iko e na sala?

¹⁸ Ia oqo, a cava me nomu mo via lako kina ki Ijipita, mo gunuva na wai ni Naile? Se cava me nomu mo via lako kina ki Asiria, mo gunuva na wai ni Uferetisi?

¹⁹ Ena kemu kuita na nomu ca, ia na nomu vuki tani ena vunauci iko. Mo kila ga ka raica ni sa ka ca ka gaga na nomu biuti Jiova na nomu Kalou; ni sa sega talega vei iko na rerevaki au, sa kaya na Turaga ko Jiova-ni-lewevuqa.”

Sa Bese ni Qaravi Jiova ko Isireli

²⁰ “Ka'u a musuka mai liu na kemui vua, ka drutia na kemui vau; ia ko a kaya, ‘Au na sega ni veiqaravi!’ Ia e na ulu-ni-koro cecere kecega kei na ruku ni kau bulabula kecega ko sa lako sese kina, ka ia na dautagane.

²¹ Ia koi au ka'u a tei iko mo vaini vinaka ga, mo kau dinadina sara. Ia ko sa qai vuki vakaevei mo kau ca ni vaini tani vei au?

²² Ia kevaka ko sa savai iko e na lase, ka vakalevutaka vei iko na sovu, sa volai tu ga e mataqu na nomu caka cala, sa kaya na Turaga ko Jiova.

²³ Ko sa kaya vakacava, ‘Au sa sega ni vaqeleqelewataki, Au a sega ni muri Peali’? Mo raica na nomu i valavala e na buca; kila mada na ka ko sa cakava— na kameli totolo ko iko sa vereverea na kenai lakolako,

²⁴ kei na asa kila sa daulasa e na vanua lala, sa boiboica na cagi ni sa gagano voli! Ni sa via veiyacovi, ko cei me vakalesui koya tani? Ko ira kece era qarai koya era na sega ni via vakaocai ira wale; ena kena vula era na qai kunei koya.

²⁵ Maroroya na yavamu mai na tawa vakaivava kei na nomu i tilotilo mai na viagunu. Ia ko a kaya, ‘Sa sega vei au nai nuinui, sa segai sara; ni'u sa vinakati ira na kai tani, ka'u sa na muri ira ga.’”

Sa Rauta Vinaka me Cudruvi ko Isireli

²⁶ “Me vaka sa madua na butako ni sa kune, sa madua vakakina na vale i Isireli— ko ira, kei na nodra tui, kei na nodra turaga, kei na nodra bete, kei na nodra parofita,

²⁷ ni ra kaya ki na vunikau, ‘Ko iko na tamaqu’, ki na vatu talega, ‘Ko iko ko a vakasucumi au.’ Ka ni ra sa vuki vakanadaku vei au, ka sega ni vakanamata mai. Ia e na gauna ni nodra rarawa era sa kaya, ‘Mo ni tucake mai, ka vakabulai keimami!’

²⁸ Ia sa evei na nomu kalou ko sa cakava me yaga vei iko? Me ra tucake mai, kevaka era sa vakabulai iko rawa e na gauna ni nomu rarawa; na nomu kalou, ko iko Juta, sa tautauvata na kedrai wiliwili kei na nomu veikoro.

²⁹ “A cava dou na mai kaya vei au? Koi kemudou kecega dou sa vuki tani vei au, sa kaya ko Jiova.

³⁰ Sa sega ni yaga na noqu cudruvi ira na luvemudou; era sa sega ni vakavulici kina. A nomudou i seleiwau sa kani ira na nomudou parofita, me vaka na laione e dauveivakamatei.

³¹ Kemudou nai tabatamata, dou kila mada na vosa i Jiova! Ka'u a vaka beka na vanua lala vei Isireli; se na vanua butobuto loaloa? A cava era sa kaya kina na noqu tamata, ‘Keimami sa galala, keimami na sega ni lako tale vei iko’?

³² Me guilecava li na goneyalewa na nona ka ni ukuuku, se na yalewa sa qai vakawati na nona i sulu ni vakawati? Ia na noqu tamata era sa guilecavi au ka bogi vuqa sa sega ni wili rawa.

³³ “A cava ko sa ia kina nai valavala vakaveiwedevi mo vakasaqaqara i tau kina? Ia ko ira talega na yalewa ca ko sa vakavulica e na nomu i valavala.

³⁴ Sa kune talega e na bui ni nomu i sulu na dra ni yalodra era sa sega ni cala ka ra dravudravua; sa segai ni'u sa kelia ka'u sa kunea kina, sa tu ga vei ira kecega oqo.

³⁵ Ia ko sa kaya, ‘E na vuku ni'u sa sega ni cala; ena suka tani ga vei au na nona cudru.’ Raica, ka'u na ia na veilewai kei iko, ka ni ko sa kaya, ‘Au sa sega ni valavala ca.’

³⁶ A cava ko sa daulako voli vakalevu kina mo vakatanitaka kina na nomu i valavala? Ko na maduataki Ijipita talega, me vaka ko sa maduataki Asiria.

³⁷ Io, ko na lako tani talega kina mai vei koya ka na toka na ligamu ki ulumu; ni sa biuti ira ko sa vakararavi kina ko Jiova ia ko na sega ni vakayacori kina.”