Jeremaia 18 - Ai Vola Tabu (Vakadewa Makawa Vakavoutaki 2021)

Na Dautuli Bilo kei na Tete

¹ A vosa ka yaco vei Jeremaia mai vei Jiova, ka vaka:

² “Mo tucake, ka lako sobu ki na nona vale na dautuli bilo, ia ka'u na tukuna vei iko mai kea na noqu vosa.”

³ Au a qai lako sobu ki na nona vale na dautuli bilo, ka raica, sa ia tiko e dua na cakacaka e na kenai tutu-wiri.

⁴ A sa ca na bilo tete sa cakava tiko e na liga i koya na dautuli bilo, ka sa cakava tale kina e dua tale na ka, me vaka sa vinaka vua na dautuli bilo me cakava.

⁵ Sa qai yaco vei au na vosa i Jiova, ka vaka:

⁶ “Me'u sega beka ni vakayacora vei kemudou, na vale i Isireli, me vakataki koya na dautuli bilo oqo? Sa kaya ko Jiova, Raica, me vaka na tete e na liga i koya na dautuli bilo, sa vakakina koi kemudou e na ligaqu, na vale i Isireli.

⁷ A tiki-ni-siga ka'u na vosa e na vuku ni dua na vanua, se dua na matanitu, me'u cavuta, ka basuka, ka vakarusa;

⁸ kevaka ena lesu na vanua ko ya mai na nodra ca, ka'u a lewa me ra ca kina, ka'u na qai veivutunitaka na ca ka'u a nanuma me'u cakava vei ira.

⁹ Ia na tiki-ni-siga ka'u na vosa e na vuku ni dua na vanua, se dua na matanitu, me'u tara, ka tea;

¹⁰ kevaka ena caka ca e mataqu, me sega ni vakarorogo ki domoqu, ka'u na qai veivutunitaka na vinaka, ka'u a kaya me'u cakava me ra vinaka kina.

¹¹ Ia oqo, mo vosa vei ira na Juta, kei na lewe i Jerusalemi: ka kaya, ‘Sa kaya vakaoqo ko Jiova: Raica, au sa tulia na ca kivei kemudou, ia ka'u sa vakananuma e dua na lewa e na vukumudou. Dou dui lesu mada mai na nomudou i tovo ca, ka vakavinakataka na nomudou i tovo kei na nomudou i valavala.’

Na Yalo Kaukauwa i Isireli e na Vuku ni Qaravi Kalou Tani

¹² “Ia era sa kaya, ‘Sa sega sara ni rawa! Keimami na muria ga na neimami lewa, ia na nanuma ni lomaimami ca keimami na dui cakava.’

¹³ “O koya oqo sa kaya kina ko Jiova: Dou vakataroga mada vei ira na veimatanitu, se ko cei sa rogoca na ka vakaoqo? Sa dua na ka rerevaki sara sa cakava ko koya na goneyalewa ni Isireli.

¹⁴ E dua li me vakalaiva na uca-vulavula ni Lepanoni me kenai sosomi na wai mai na uluvatu ni vanua? Se me biu beka na wai liliwa sa drodro tu me kenai sosomi na wai ni dua na tikina tani?

¹⁵ Ka ni ra sa guilecavi au na noqu tamata, ia era sa vakama kina na ka boi vinaka ki na ka lasu; ka ra sa vakatarabetaki ira e na nodra sala, ka sa biu ga nai lakolako makawa, me ra lako vakatikitiki e na sala sa sega ni buluti;

¹⁶ me ra vakavuna na kena vakalalataki na nodra vanua, ka me vakasiusiutaki ka sega ni mudu. Ko ira kece era lako voli yani era na kidacalataka, ka kurea na uludra.

¹⁷ Ka'u na vakatolosevi ira e na mata ni meca me vaka e na cagi mai na tokalau; ka'u na vakanadakui ira e na siga ni nodra rarawa ka sega ni vakanamata vei ira.”

Na Meca i Jeremaia na Parofita

¹⁸ Era sa qai kaya, “Me da mai bukia na vere kei Jeremaia—ni sa sega ni yali na vunau mai vua na bete, se nai vakavuvuli mai vua na vuku, se na vosa mai vua na parofita. Me da mai vakacataki koya e na yameda, ka me da kakua ni vakarorogo ki na dua na nona vosa.”

¹⁹ Ni golevi au mai, i Jiova, ka rogoca na domodra era sa veileti kei au.

²⁰ Me saumi beka na vinaka e na ca? Ka ni ra sa kelia nai keli me'u mate kina. Mo ni nanuma ni'u a tu e matamuni me'u vosa vinaka e na vukudra, ka me vukica tani na nomuni cudru mai vei ira.

²¹ O koya mo ni solia kina na luvedra me ra viakana, ka vakadavea na kedra dra e na kaukauwa ni seleiwau; laivi ira na watidra me ra sega ni vakaluveni ka me ra yada talega. Me ra sotava na mate na nodra tagane mai na mate ca, kei na nodra cauravou me ra mate e nai seleiwau e nai valu.

²² Me rogo mai na nodra veivale na tagi, ni kemuni sa vakauta nai valu me sikiti ira! Ni ra sa kelia nai keli me rawai au ka vakadavora nai cori me tacori kina na yavaqu.

²³ Io koi kemuni, Jiova, ko ni sa kila kece na nodra veretaki au me'u mate. Ni kakua ni vosota na nodra caka cala, ka kakua ni kauta tani mai na matamuni na nodrai valavala ca. Ia me ra vakabalei sobu ga e matamuni; ni vakayacora vei ira e na gauna ni nomuni cudru.