Jeremaia 13 - Ai Vola Tabu (Vakadewa Makawa Vakavoutaki 2021)

Nai Vau Lineni

¹ Sa kaya vakaoqo vei au ko Jiova, “Mo la'ki kauta e dua na nomu i vau lineni ka vauca kina na tolomu, ia mo kakua ni tonia e na wai.”

² Au a qai kauta e dua nai vau me vaka na vosa i Jiova, ka vauca kina na toloqu.

³ Sa qai yaco vakarua mai vei au na vosa i Jiova, ka vaka,

⁴ “Mo kauta na nomu i vau oqori, sa vau kina na tolomu, ka cavu tu mo lako ki na Uferetisi, ka vunia mai kea e na qara-vatu.”

⁵ Au a qai lako, ka vunia mai na Uferetisi, me vaka ka kaya vei au ko Jiova.

⁶ Sa bogi vuqa, sa qai kaya vei au ko Jiova, “Mo cavu tu, ka mo lako ki na Uferetisi, ka kauta mai kina nai vau, ko ya ka'u a kaya mo vunia mai kea.”

⁷ Au a qai lako ki Uferetisi, ka kelia nai vau ka kauta mai na tikina ka'u a vunia kina. Ka raica, sa ca mai nai vau, sa sega e dua na ka e yaga kina.

⁸ Sa qai yaco mai vei au na vosa i Jiova, ka vaka:

⁹ “Sa kaya ko Jiova, Ka'u na vakacacana vakaoqo na viavialevu i Juta, kei na viavialevu cake i Jerusalemi.

¹⁰ Ko ira na tamata ca oqo, era bese ni rogoca na noqu vosa, era muria na nodra yalokaukauwa era muria talega na kalou tani, me qaravi ira, ka soro vei ira, era na vaka ga nai vau oqo, sa sega e dua na ka e yaga kina.

¹¹ Me vaka sa kabita na tolo ni tamata nai vau, ka'u sa vakabita vakakina vei au na vale kecega i Isireli kei na vale kecega i Juta, sa kaya ko Jiova; me ra yaco me noqu tamata, me'u rogo kina, ka vakavinavinakataki, ka vakarokorokotaki. Ia era bese ga ni vakarorogo.

Na Tavaya ni Waini

¹² “Ia mo tukuna vei ira na vosa oqo, ‘Sa kaya vakaoqo ko Jiova na nodra Kalou na Isireli, “A tavaya kece ena vakasinaiti ga e na waini.” ’ Ka ra na kaya vei iko, ‘Keimami sa sega beka ni kila ni na vakasinaiti na tavaya kecega ena waini?’

¹³ Mo qai kaya vei ira, Sa kaya vakaoqo ko Jiova, ‘Raica, ka'u na vakasinaiti ira kecega na lewe-ni-vanua oqo—ko ira na tui era sa tiko e nai tikotiko i Tevita, kei ira na bete, kei ira na parofita, kei ira kece na kai Jerusalemi—e na mateni.

¹⁴ Ka'u na botobotolaki ira vata na tamata kei na kai nona, io ko ira vata na qase kei na luvedra, sa kaya ko Jiova. Ka'u na sega ni lomana, se vosota, se yalololoma kina, ka'u na vakarusai ira ga.’ ”

¹⁵ Dou rogoca, ka vakatudaliga; dou kakua ni viavialevu, ni sa kaya ko Jiova.

¹⁶ Dou vakarokorokotaki Jiova na nomudou Kalou ni se bera ni vakayacora na butobuto, ni se bera talega ni tarabe na yavamudou e na veiulunivanua loaloa; ka dou sa yadrava na rarama, ka sa vukica ga ko koya me yaloyalo ni mate ka cakava me butobuto sara.

¹⁷ Ia kevaka dou na sega ni rogoca, ena tagi na yaloqu e na tikina vuni e na vuku ni nomudou viavialevu; ena tagi vakalevu na mataqu, ia ena dave mai kina na wai, ni sa vakabobulataki na qele ni sipi i Jiova.

¹⁸ Mo kaya vei rau na tui kei na ranadi; “Drauvakamalumalumutaki kemudrau, drau tiko sobu; ni na lako sobu mai na kemudrau ka levu, io na nomudrau i sala vakaiukuuku.”

¹⁹ A veikoro mai na mata ni ceva ena sogo tu, ka sega e dua me dolava; era na kau tani kecega na Juta, era na kau kece sara vakabobula.

²⁰ “Drau ta cake, ka raici ira era sa lako mai na mata ni vualiku. Sa evei na qele ni sipi ka soli vei iko, na nomu sipi matavinaka?

²¹ A cava ko na qai kaya ni sa cudruvi iko ko koya? Ni sai iko ga ka vakavulici ira me ra nomu turaga, ka me ra liu. Ena sega beka ni tauvi iko na rarawa, me vaka na yalewa sa taratara?

²² Ia kevaka ko sa kaya e lomamu, ‘A cava beka sa yacovi au kina na ka oqo?’ Ni sa levu na nomu caka cala sa luvati kina na bui ni nomu i sulu, ka dresulaki tani sara mai na bukubuku-ni-yavamu.

²³ Sa vakatanitaka rawa li na kai Eciopea na kulina, se na lepate na kena tavutonotono? Ke vakakina dou na qai rawata mo dou caka vinaka, koi kemudou ka dau cakava ga na ka ca.

²⁴ O koya oqo ka'u na dui vakasevi ira tani kina me vaka na vu-ni-sila sa cagina tani e na cagi mai na vanua dravuisiga.

²⁵ Sa kemu ga oqo, nai votavota ka'u sa vakarautaka me nomu, sa kaya ko Jiova; ni ko sa guilecavi au, ka vakararavi ki na ka lasu.

²⁶ Ka'u na cega cake kina na bui ni nomu i sulu ki matamu, me votu kina na nomu luvawale.

²⁷ A nomu veibutakoci, kei na nomu daugagano, kei na levu ni nomu dautagane, io na nomu i valavala vakasisila e na veiyasana cecere ni vanua, ka'u sa raica oti. Ena ca vei iko, Jerusalemi! Ko na sega li ni vakasavasavataki? Ena yaco ga ninaica?”