Jeremaia 12 - Ai Vola Tabu (Vakadewa Makawa Vakavoutaki 2021)

Sa Yalo Rarawa ka Vakatukutuku vei Jiova ko Jeremaia

¹ Sa yalododonu koi kemuni, Jiova, ni daru sa veilewai kei kemuni; ia me'u vosa mada vei kemuni e na vuku ni nomuni lewa. A cava era sa dauyaco kina ko ira na tamata ca, ka sa tiko vinaka ko ira kecega era ia vakalevu na veivakaisini?

² Ko ni sa tei ira, io, sa ti sobu na wakadra; era sa tubu, io, era sa vua; sa voleka koi kemuni ki na gusudra, ka yawa sara mai na lomadra.

³ Ia koi kemuni Jiova, ko ni sa kilai au; ko ni sa raici au ka vakatovolei au—na lomaqu sa tu vei kemuni. Mo ni yarataki ira me vaka na sipi me vakamatei, ka tawasei ira me baleta na siga ni veivakamatei.

⁴ A cava na kena dede me tagi tiko kina na vanua, ka malai yani na co ni veiwere kecega, e na vuku ni nodra ca era tiko kina? Sa oti na manumanu ni vanua kei na manumanu vuka; ni ra sa kaya, “Ena sega ni kunea ko koya na keda i cavacava.”

⁵ “Kevaka dou sa cici vata kei ira na tamata, ka ra sa vakaocataki iko, ko na qai veiqati vakaevei kei na ose? Ia kevaka ko sa vakacegu e na vanua sa sautu ga, ko na qai vakaevei ni sa vuabale na Joritani?

⁶ Ko ira talega na wekamu, kei na vale i tamamu, era sa ia na veivakaisini vei iko; era sa kacimuri iko vakadomoilevu talega; ni ra sa vosa vinaka vei iko, kakua ni ko vakadinati ira.”

Na Rarawa i Jiova me Baleti Ira na Nona Tamata

⁷ “Au sa biuta na noqu vale, au sa vakalaiva na noqu i votavota; au sa soli koya ka'u sa lomana e na vu ni yaloqu ki na ligadra na nona meca.

⁸ Sa cakacaka vei au na noqu i votavota me vaka e dua na laione e na veikau; sa mai tagi vakacudrucudru vei au— ka'u sa cati koya kina.

⁹ Sa vaka beka li na manumanu tavukadiridiri vei au o koya na noqu i votavota? Sa tiko voliti koya li na manumanu vuka sa dauveivala kaya? Lako, ka soqoni ira vata kece mai na manumanu kila; dou kauti ira mai me ra kania.

¹⁰ Ai vakatawa e vuqa era sa vakacacana na noqu loga-ni-vaini, era sa butuka sobu na noqu i votavota, era sa cakava na noqu vanua domoni me vanua dravuisiga.

¹¹ Era sa cakava me tikina rusa; ia ni sa lala, sa tagi mai vei au. Sa lala mai na vanua taucoko, ni sa sega na tamata sa nanuma kina.

¹² Era sa lako mai ki na veitikina cecere kecega ni vanua dravuisiga ko ira na dauvakacaca; ia nai seleiwau i Jiova sa kana voli mai nai yalayala ni vanua e dua ki nai yalayala ni vanua kadua; ena sega e dua na tamata me tiko vakacegu.

¹³ Era sa kaburaka na witi, ia era na tamusuka na wa-vakavotona, era sa dauvakaocataki ira, ka na sega ga ni yaga. Ia era na maduataka na nomudou vuata e na vuku ni cudru katakata i Jiova.”

Na Yalayala i Jiova me Baleti Ira era Tiko Veivolekati kei Isireli

¹⁴ Sa kaya vakaoqo ko Jiova vei ira kecega na tamata ca era tiko volekati au, a ra tara nai votavota, ka'u a solia vei ira na Isireli na noqu tamata me ra taukena; “Raica, ka'u na cavuti ira tani mai na nodra vanua, ia na vale i Juta ka'u na cavuta mai na kedra maliwa.

¹⁵ Ia ena yaco, ni'u sa cavuti ira oti, ka'u na qai lesu mai, ka lomani ira tale, ka kauti ira tale mai, na tamata yadua ki na nona tikina, kei na tamata yadua ki na nona vanua.

¹⁶ Ia kevaka era na gumatua ni vulica nai valavala ni noqu tamata, me ra bubului e na yacaqu, ‘Me vaka sa bula ko Jiova’, me vaka era sa dauvakavulici ira na noqu tamata me ra bubului vei Peali; era na qai vakataudeitaki e na kedra maliwa na noqu tamata.

¹⁷ Ia kevaka era bese ni vakarorogo mai, ka'u na cavuta laivi sara ka vakarusa na matanitu ko ya, sa kaya ko Jiova.”