Jeremaia 11 - Ai Vola Tabu (Vakadewa Makawa Vakavoutaki 2021)

Erau Vorolaka na Veiyalayalati ko Isireli kei Juta

¹ E dua na vosa sa yaco vei Jeremaia mai vei Jiova, ka vaka:

² “Dou rogoca mada na vosa ni veiyalayalati oqo ka tukuna vei ira na Juta, kei na kai Jerusalemi;

³ ia mo kaya vei ira, Sa kaya vakaoqo ko Jiova na nodra Kalou na Isireli; Ena ca na tamata sa sega ni vakarorogo ki na vosa ni veiyalayalati oqo,

⁴ ka'u a vakarota vei ira na nomudou qase e na siga ka'u a kauti ira kina mai na vanua ko Ijipita, mai na lovo kaukamea, ka kaya, Dou vakarogoca na noqu vosa, ka muria me vaka na ka kecega ka'u sa vakarota vei kemudou. Dou na yaco kina mo dou noqu tamata, ia koi au ka'u na yaco me'u nomudou Kalou,

⁵ me'u vakayacora kina na bubului ka'u a bubului kina vei ira na nomudou qase, me'u solia vei ira na vanua sa dave kina na sucu kei na oni, me vaka e na siga oqo.” Au a qai kaya, “Me vakakina, kemuni Jiova.”

⁶ A sa kaya vei au ko Jiova, “Mo vunautaka kecega na vosa oqo e na veikoro vaka-Juta, e na saqata talega ni koro ko Jerusalemi, ka kaya, Dou rogoca na vosa ni veiyalayalati oqo, ka muria.

⁷ Ni'u a vakadreta sara vei ira na nomudou qase e na siga ka'u a kauti ira cake kina mai na vanua ko Ijipita, ka yacova na siga oqo, ka'u sa sou e na mataka ka vakadreta ka kaya, Dou vakarogoca na noqu vosa.

⁸ Ia era sa sega ni vakarorogo, se vakatu daligadra, ka ra sa dui muria kecega na nodra yalokaukauwa. O koya oqo ka'u na vakayacora kina vei ira na vosa kecega ni veiyalayalati oqo, ka'u a vakarota vei ira me ra cakava, ia era sa sega ni muria.”

⁹ A sa kaya vei au ko Jiova, “Sa votu na nodra vere na Juta, kei na kai Jerusalemi.

¹⁰ Era sa lesu tani ki nai valavala ca ni nodra qase eliu, era sa bese ni vakarogoca na noqu vosa, ka ra sa muria ga na kalou tani, me ra qaravi ira. Era sa voroka ko ira na vale i Isireli kei na vale i Juta na noqu veiyalayalati, o koya ka'u a cakava kei ira na nodra qase.

¹¹ O koya oqo sa kaya kina ko Jiova, Raica, au na vakayacora vei ira na ca, ka ra na sega ni dro tani rawa mai kina, era na qai tagi vei au, ia ka'u na sega ga ni rogoci ira.

¹² Ena qai lako na veikoro i Juta kei na kai Jerusalemi, ka tagi vei ira na kalou era vakama kina na ka boi vinaka, ia era na sega sara ni vakabulai ira e na gauna ni nodra rarawa.

¹³ Ni sa tautauvata na kenai wiliwili ni nomu veikoro kei nai wiliwili ni nomu kalou, ko iko Juta; ka sa tautauvata nai wiliwili ni sala ni koro mai Jerusalemi kei nai wiliwili ni cabocabo-ni-soro dou sa vakaduria ki na ka ni veivakamaduataki ko ya, io nai cabocabo-ni-soro me vakama kina na ka boi vinaka vei Peali.

¹⁴ “Ia ko iko, mo kakua ni masulaki ira na tamata oqo, mo kakua talega ni tagi se masu e na vukudra, ni'u na sega ni rogoci ira e na siga era sa tagi kina vei au e na nodra rarawa.

¹⁵ A cava sa mai kitaka e na noqu vale ko koya ka'u sa lomana, ni sa ia ko koya nai valavala ca levu, ia na yago savasava sa yali sara vei iko? Ni ko sa caka ca, ko sa qai reki.

¹⁶ Sa vakatoka na yacamu ko Jiova ‘na olive bulabula, ka matavinaka, ka vuavuai vinaka’. Ia na rorogo ni ue levu, sa tutuvaka ko koya na buka e delana, ka sa raramusumusu na tabana.

¹⁷ Ia ko Jiova-ni-lewevuqa ko koya ka tei iko, sa kaya me yacovi iko na ca, e na vuku ni nodra ca na vale i Isireli kei na vale i Juta, o koya era sa cakava vei ira me vakacudrui au, ni ra sa vakama na ka boi vinaka vei Peali.”

Na Bukivere kei na Vakasaurarataki i Jeremaia

¹⁸ Ia ko Jiova sa vakatakila vei au, na ka oqori, ia ka'u sa kila; ko sa qai vakaraitaka mai vei au na nodra i valavala.

¹⁹ Ia koi au ka'u a vaka na lami se na bulumakau sa kau mai me vakamatei. Ka'u a sega ni kila ni ra sa buki qau vere, ka kaya, “Me da vakacataka na kau kei na vuana, ia me da muduki koya tani mai na vanua ni bula, me kakua ni nanumi tale na yacana.”

²⁰ Ia koi kemuni, Jiova-ni-lewevuqa, ka lewa vakadodonu, ka vakatovolea nai ivi kei na loma ni tamata, me'u sa raica mada na nomuni cudruvi ira, ni'u sa tukuni au vei kemuni.

²¹ O koya oqo sa kaya kina ko Jiova e na vukudra na kai Anacoci, era sa segata me ra vakamatei iko, ka kaya, “Mo kakua ni ia na parofisai e na yaca i Jiova, de ko mate e na liga i keimami”—

²² o koya sa kaya kina ko Jiova-ni-lewevuqa: “Raica, koi au ka'u na cudruvi ira; a cauravou, era na mate e nai seleiwau; a luvedra tagane kei na luvedra yalewa, era na mate e na viakana;

²³ ia ena sega na kedra vo; ni'u na vakayacora na ka ca vei ira na kai Anacoci, io na kena yabaki me ra cudruvi kina.”