Jeremaia 10 - Ai Vola Tabu (Vakadewa Makawa Vakavoutaki 2021)

Na Qaravi Kalou Tani kei na Sokalou Vakaidina vei Jiova

¹ Dou rogoca na vosa sa tukuna ko Jiova vei kemudou na vale i Isireli.

² Sa kaya vakaoqo ko Jiova, “Dou kakua ni vulica na nodra i valavala na veimatanitu, ia mo dou kakua talega ni taqaya e nai vakatakilakila ni lomalagi; ni ra sa taqaya kina na veimatanitu.

³ Ni sa ka lasu na nodra i valavala na tamata; ni sa dua sa taya mai veikau e dua na kau, na cakacaka ni liga ni matai e na matau;

⁴ era sa vakaiukuukutaka e na siliva kei na koula; era vakadeitaka e nai vako kei nai tukituki, me kakua ni yavala.

⁵ Sa vaka na balabala na kena tu donu, ia ka sa sega ni vosa; sa daucolati tu, ni ra sa sega ni lako rawa. Kakua ni dou rerevaka na ka oqori; ni sa sega na ca era cakava rawa, ka sa sega talega ni rawa vei ira me ra cakava na vinaka.”

⁶ Ni sa sega e dua me vakataki kemuni, Jiova; sa levu koi kemuni, ka sa levu na yacamuni e na kaukauwa.

⁷ Ko cei me na sega ni rerevaki kemuni na Tui ni veimatanitu? Ni sa kilikili kei kemuni; io vei ira kece na vuku e na veivanua, kei na nodra veimatanitu kecega, sa sega e dua me vakataki kemuni.

⁸ Ia era sa yalosese vata ka lialia ga; na kau sai vakavuvuli ni ka lasu.

⁹ Nai botani siliva sa kau mai Tasisi, kei na koula mai Ufasi. Era sa cakacaka ni matai, kei na liga i koya na matai ni koula; sa ka karakarawa ka lokaloka na nodra i sulu; era sa nodra cakacaka kecega na tamata vuku.

¹⁰ Ia ko Jiova ga na Kalou dina ko koya; na Kalou bula kei na Tui sa sega ni mudu. Ni sa cudru ko koya, ena sautaninini ko vuravura, ia na veimatanitu ena sega ni vosota rawa na nona cudru.

¹¹ Mo dou kaya vei ira vakaoqo, “A kalou era sa sega ni bulia na lomalagi kei na vuravura era na rusa tani yani mai na dela i vuravura, ka mai na ruku i lomalagi talega.”

A Sere ni Vakavinavinaka vei Jiova

¹² Sa bulia na vanua ko koya e na nona kaukauwa, ka vakataudeitaki vuravura e na nona vuku, ka tevuka yani na lomalagi e na nona yalomatua.

¹³ Ni sa tabalaka na domona, sa levu na rorogo ni wai mai lomalagi, a sa vakuvuya cake ko koya na kabukabu mai na vu-ni-lagi; sa cakava na livaliva kei na uca, ka sa kauta mai na cagi mai na nona lololo.

¹⁴ Sa vakasesei tani na tamata kecega mai na vuku; sa vakamaduataki na matai kecega e na matakau ceuceu; ni sa ka lasu sara na nona matakau e vakawaicalataki, ka sa sega nai cegu e tiko kina.

¹⁵ Sa ka lasu ga oqori, na cakacaka dauveivakalialiai; e na gauna era cudruvi kina era na rusa.

¹⁶ Sa sega ni vakakina na nodra i votavota na Jekope, ni sa bulia na ka kecega ko koya; ia ko ira na Isireli, era sa dua nai votavota sa taukena ko koya; ko Jiova-ni-lewevuqa na yacana.

Sa Roro Voleka na Gauna ni Veivakabobulataki

¹⁷ Mo kumuna na nomu i yaya e na vanua, ko iko na lewe ni koro vakabai!

¹⁸ Ni sa kaya vakaoqo ko Jiova, “Raica, koi au, ka'u na rabotaki ira tani na lewe-ni-vanua me vakadua ga oqo, ka'u na vakararawataki ira, me ra kunea sara.”

¹⁹ Ulei na noqu mavoa! Sa ka rarawa na noqu yaviti. Ia koi au ka'u a kaya, “E dina sa ka ni veivakararawataki oqo, ia ka'u na vosota ga.”

²⁰ A noqu valelaca sa vakacacani, a kena dali kecega sa cavuka; era sa lako tani vei au ko ira na luvequ, ka ra sa yali; sa sega e dua me birika tale na noqu valelaca, se rubeca na kenai lati.

²¹ Ni ra sa yalosese mai ko ira nai vakatawa, ka ra sa sega ni qarai Jiova; o koya oqo era na sega kina ni tamata yaco, ia na nodra qele ni sipi kecega ena dui vakasavi.

²² Rogoca, e dua na rorogo! Sa lako tiko mai!— e dua na ue levu mai na vanua mai na vualiku me vakalalataka na veikoro vaka-Juta, ka me qara ni jekeli.

²³ Kemuni Jiova, au sa kila, ni sa sega ni vu mai vua na tamata na nona sala, sa sega ni vu mai vua na tamata sa lako tu me lewa na nona i lakolako.

²⁴ Mo ni vakadodonutaki au, Jiova, e na lewa vinaka, me kakua e na nomuni cudru, de ko vakarusai au sara.

²⁵ Mo ni sovaraka na nomuni cudru katakata ki na veimatanitu era sa sega ni kilai kemuni, kei na veiyavusa sa sega ni masuta na yacamuni; ni ra sa kani ira na Jekope, ka tilomi ira, ka vakaoti ira, ia na nodra i tikotiko era sa vakalalataka.