Jemesa 5 - Ai Vola Tabu (Vakadewa Makawa Vakavoutaki 2021)

Nai Vakaro vei Ira na Vutuniyau

¹ Dou lako mai, oi kemudou na tamata vutuniyau, dou tagi ka qoqolou e na vuku ni nomudou ka rarawa ena yaco mai.

² Sa vuca na nomudou i yau, a sa kania na nomudou i sulu na sarasara.

³ Sa veveka na nomudou koula kei na siliva; ka na tukuni kemudou na kena veveka, ka na kania na lewemudou me vaka na bukawaqa. Dou sa kumuna vata nai yau me yacova na gauna mai muri sara.

⁴ Raica, sa tagi na kedrai voli na tamata daucakacaka ka ra tamusuka na nomudou veiwere, o koya dou sa bureitaka, ka sa yaco ki na daligana na Turaga ni-lewe-vuqa na nodra tagi era sa dautamusuka.

⁵ Dou sa marau tikoga e vuravura ka dou sa daukana tiko. Dou sa dauvakania na lomamudou e na siga sa ia kina na dauveivakamatei.

⁶ Dou sa lewai koya na yalododonu ka dou sa vakamatea, ka sega ni vorati kemudou ko koya.

Na Yalo Vosota kei na Masu

⁷ O koya ga oqo, na veiwekani, mo dou qai vosota, me yaco mada na nona lako mai na Turaga. Raica, nai vakatau-ni-were sa waraka na vua ni qele e talei, ka sa wawa vakadede, me rawata mada na uca taumada kei na uca taumuri.

⁸ Dou vosota talega koi kemudou. Vakataudeitaka na yalomudou, ni sa roro mai na nona lako mai na Turaga.

⁹ Dou kakua ni dui veikudruvi na veiwekani, de dou cudruvi. Raica, sa tu e na mata ni katuba na Turaga-ni-lewa!

¹⁰ Oi kemudou na wekaqu, vakadamurimuri ira na parofita, e na nodra vosota na ka rarawa, kei na nodra dauvosota, era a vosa e na yaca ni Turaga.

¹¹ Raica, eda sa dauvakatokai ira era sa vosota me ra kalougata. Dou a rogoca na dauvosota nei Jope, dou sa raica talega ni sa tinia vakaevei na Turaga, ni sa yalovinaka sara na Turaga, ka sa yalololoma.

¹² Ia na ka levu sara oqo, oi kemudou na wekaqu, mo dou kakua sara ni bubului, kakua ki lomalagi, se ki vuravura, se ki na dua tale na ka. Me “io” ga na nomudou io, ka me “sega” ga na nomudou sega, de dou cudruvi kina.

Na Masu ni Vakabauta

¹³ Kevaka e dua vei kemudou sa vakararawataki, me masu tiko. Kevaka e dua sa marau, me sere.

¹⁴ Kevaka e dua vei kemudou sa tauvi-mate, me kacivi ira na qase ni soqosoqo lotu, ka me ra masulaki koya, ka walia e na waiwai e na yaca ni Turaga.

¹⁵ Ia na masu ni vakabauta ena vakabulai koya sa tauvi-mate, ka na vakaturi koya cake na Turaga; ka kevaka sa kitaka nai valavala ca, ena vosoti ko koya.

¹⁶ O koya mo dou dui vakatusa kina na nomudou i valavala ca, ka veimasulaki, mo dou vakabulai kina. Sa kaukauwa vakalevu ka gumatua na nona masu na tamata yalododonu.

¹⁷ A tamata sa vakataki keda ga ko Ilaijia, ka sa masu vagumatua sara me kakua ni tau na uca, ka sa sega kina ni tau mai na uca e vuravura ka sa oti mada na yabaki tolu kei na vula ono.

¹⁸ A sa qai masu tale, ka sa tau na uca mai lomalagi, ka sa vuataka na vuana na qele.

¹⁹ Oi kemudou na veiwekani, kevaka e dua vei kemudou sa lako sese mai nai vakavuvuli dina, ka sa vakalesui koya tale mai e dua,

²⁰ me kila ko koya oqo, o koya sa vakalesuya tale na tamata caka cala mai na nona i valavala e cala kina sa vakabula na yalo mai na mate, ka sa buluta talega nai valavala ca e vuqa.