Jemesa 1 - Ai Vola Tabu (Vakadewa Makawa Vakavoutaki 2021)

¹ Koi au ko Jemesa, nai talatala ni Kalou kei na Turaga ko Jisu Karisito: Ko ni sa kidavaki na yavusa e tinikarua sa Duiveiseyaki.

Na Vakabauta kei na Vuku Yalomatua

² Oi kemudou na wekaqu, dou nanuma me ka ni reki sara, ni dou sa lutu ki na ka e vuqa sa dauveivakatovolei;

³ ni dou sa kila sa vakatubura na dauvosota na vakatovolei ni nomudou vakabauta.

⁴ Ia me tini vinaka na cakacaka ni dauvosota, mo dou vinaka taucoko sara kina, me kakua na ka e yali.

⁵ Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua.

⁶ Ia me kerekere e na vakabauta, me kakua ni vakatitiqa; ko koya sa vakatitiqa sa vaka na ua ni waitui, sa cagina e na cagi ka veitubuyaki.

⁷ Ia me kakua ni nanuma na tamata ko ya ni na rawata e dua na ka mai vua na Turaga;

⁸ a tamata lomalomarua sa yamekemeke e na nona i valavala kecega.

Na Dravudravua kei na Vutuniyau

⁹ Ia me reki na tamata dravudravua e na nona laveti cake,

¹⁰ kei koya e vutuniyau e na nona malumalumu mai, ni na takali ga ko koya me vaka na se ni co.

¹¹ Ni sa cabe cake na siga kei na cagi katakata, ka sa vakaraqosataka sara na co, a sa mira na sena, a sa seavu na kena rairai vinaka. Ena malai yani vakakina na tamata vutuniyau e na nona i valavala.

Na Veivakatovolei kei na Veiveretaki

¹² Sa kalougata na tamata sa vosota ni sa vakatovolei, io, ni sa vakatovolei oti, ena rawata nai sala ni bula o koya sa yalataka na Turaga kivei ira sa lomani koya.

¹³ Ni sa dauveretaki e dua, me kakua ni kaya, “Sa dauveretaki au na Kalou”; ni sa sega ni dauveretaki rawa na Kalou ki na ka ca, a sa sega ni dauveretaka e dua na tamata ko koya.

¹⁴ Ia sa dauveretaki na tamata yadua mai na nona gagadre, ni sa vakatagarogaroi ka bacani koya.

¹⁵ Ni sa kunekune na gagadre ca, sa vakasucuma nai valavala ca; ia nai valavala ca ko ya, ni sa taucoko na kena tubu, sa qai vakasucuma na mate.

¹⁶ Dou kakua ni vakacalai, oi kemudou na wekaqu lomani.

¹⁷ Sa lako mai cake nai solisoli vinaka kecega kei nai solisoli kecega e yaga sara, a sa lako sobu mai vua na Tama ni rarama, a sa sega vua na veivukiyaki, se yaloyalo ni veigoleyaki.

¹⁸ Sa vakatuburi keda ko koya e na nona lewa ga e na vosa ni dina, me da vaka nai sevu ni veika sa bulia ko koya.

Na Vakarorogo kei na Vakayacori ni Vosa ni Kalou

¹⁹ O koya oqo, oi kemudou na wekaqu lomani, mo dou kusarawa yadua e na vakarorogo, mo dou berabera ga ni vosa, mo dou berabera ni cudru;

²⁰ ni sa sega ni vakatubura na ka e dodonu vua na Kalou na cudru ni tamata.

²¹ O koya oqo mo dou qai biuta tani na dukadukali kei na ka ca e uasivi tu, ka vakabauta e na yalomalua na vosa sa tei e na lomamudou, ko ya sa vakabula rawa na yalomudou.

²² Ia dou muria na vosa ka kakua ni rogoca walega, ka vakaisini kemudou kina vakai kemudou.

²³ Ia kevaka e dua sa rogoca walega na vosa, ka sega ni muria, sa tautauvata kei na tamata sa laki ilova na mata ni yagona e nai iloilo.

²⁴ Ni sa laki ilovi koya, a sa qai lako tani yani, a sa guilecava vakasauri se sa vakaevei na kenai rairai.

²⁵ Ia ko koya sa vakaraica matua na vunau sa vinaka sara, na vunau ni veisereki, ka sa tudei kina, sa sega ni daurogoca ka guilecava ia sa daukitaka ga ka cakava—ena kalougata ko koya e na nona cakacaka.

²⁶ Kevaka e dua vei kemudou sa nanuma ni sa lotu, ka sega ni tarova rawa na yamena, ia ka sa dauvakaisina ga na yalona, sa ka walega na nona lotu na tamata oqo.

²⁷ Na lotu savasava ka sega ni cala e mata ni Kalou ko Tamada sa vakaoqo: me sa dauraici ira na luveniyali kei ira na yada ni ra sa rarawa, ka me qarauni koya na tamata yadua me kakua ni tauvi koya na duka ni ka vakavuravura.