Isikeli 9 - Ai Vola Tabu (Vakadewa Makawa Vakavoutaki 2021)

Era Vakamatei na Qaravi Kalou Tani

¹ Sa qai kaci vakadomoilevu e daligaqu ko koya, ka kaya, “Me ra toro mai ko ira na dauvakamate-tamata ni koro, ia me ra dui taura yadua na nona i yaragi ni veivakamatei e ligana.”

² Ka raica, e lewe ono na tagane eratou sa lako mai na yasana e vaka ki na matamata-ni-koro e cake, sa donuya na vualiku, ka ratou sa dui taura yadua e ligana na nona i yaragi ni ravuravu; ia e dua vei iratou na tagane sa vakaisulu e na lineni, ka sa tu vua e dua na kato ni yaya ni volavola. A ratou sa curu ki loma, ka duri volekata nai cabocabo-ni-soro parasa.

³ Ia nai ukuuku ni Kalou i Isireli sa lako cake mai na Jerupi, ka tu kina, ki nai lago ni vale. Ka sa kaci ko koya ki na tamata sa vakaisulu e na lineni, ka sa tu e tolona e dua na kato ni volavola;

⁴ ka sa kaya vua ko Jiova, “Mo lako voli yani e na loma ni koro, e na loma i Jerusalemi, ka vola nai vakatakilakila e na yadredra na tamata era sa vutugu ka qoqolou e na vuku ni ka vakasisila kecega sa caka e na loma ni koro.”

⁵ Ia vei iratou tale eso sa kaya ko koya ni'u rogoca tiko, “Dou la'ki muri koya yani e loma ni koro, ka ia na ravuravu. Me kakua ni vosota na matamudou, kakua talega ni dou yalololoma.

⁶ Dou vakamatei ira sara ga na qase, kei na cauravou, na goneyalewa, kei na gone lalai, kei na yalewa talega, ia dou kakua ni toro yani vua e dua na tamata sa volai tu. Ka mo dou vakatekivu mada e na noqu vale tabu.” E ratou sa qai vakatekivu ka ia vei ira na tamata qase era tu e na mata ni vale.

⁷ Ka sa kaya vei iratou ko koya, “Dou vakadukadukalitaka na vale, ka vakasinaita na lomanibai vei ira sa moku oti. Dou lako yani!” A ratou sa lako yani ka ia na veivakamatei e na koro.

⁸ Ka sa yaco, ni ratou sa ia tiko na veivakamatei, ia ka'u sa vo tiko duaduaga koi au, ka'u sa qai bale vakatoboicu, ka tagi, ka kaya, “Isa, i Jiova na noqu Turaga! O ni na vakarusai ira kecega na kedra vo na Isireli ni kemuni sa sovaraka na nomuni cudru ki Jerusalemi?”

⁹ Sa qai kaya vei au ko koya, “A nodra caka cala na vale i Isireli kei Juta sa ka levu vakaidina sara. Ka sa robota na vanua na vakadave-dra, ia na koro sa sinai tu e na veivakaucacataki. Ni ra sa kaya, ‘Sa biuti vuravura ko Jiova, ka sa sega ni raica rawa ko Jiova.’

¹⁰ Io koi au talega, ena sega ni vosota na mataqu, au na sega talega ni yalololoma; a nodra i valavala ka'u na kauta yani ki uludra.”

¹¹ Ka raica, sa mai tukutuku na tamata sa vakaisulu e na lineni, ka sa dua na nona kato ni volavola e tolona, ka kaya, “Au sa cakava me vaka na ka ko sa vakarota vei au.”