Isikeli 8 - Ai Vola Tabu (Vakadewa Makawa Vakavoutaki 2021)

Nai Karua ni Raivotu i Isikeli me Baleta na Kalou ( 8.1—10.22 ) Nai Vakarau Tawa Dodonu e na Valenisoro

¹ A sa yaco e nai kaono ni yabaki, e nai kaono ni vula, e nai kalima ni siga ni vula, ni'u a tiko e noqu vale, ia ko ira na qase ni Juta, era sa tiko e mataqu, sa qai tarai au mai kea na liga ni Turaga ko Jiova.

² Au a qai vakararai, ka raica, sa dua nai vakatakarakara ka rairai me vaka na bukawaqa, mai na kenai rairai ni tolona ka lako sobu, sa bukawaqa; mai na tolona talega ka lako cake, sa rairai me vaka na rarama, me vaka na parasa matavinaka.

³ A sa dodoka mai na yaloyalo ni dua na liga, ka tauri au e na tobe ni uluqu; a sa laveti au cake na yalo e na maliwa kei vuravura kei lomalagi, a sa kauti au e na raivotu ni Kalou ki Jerusalemi, ki na matamata-ni-koro ki loma sa donuya na mata ni vualiku; a sa tu mai kina nai tikotiko ni matakau ni veivuvutaki, sa vakatubura na veivuvutaki.

⁴ Ka raica, sa tu mai kea nai ukuuku ni Kalou i Isireli, me vaka na raivotu ka'u a raica e na buca.

⁵ Sa qai kaya vei au ko koya, “Ko iko na luve ni tamata, mo ta cake mada ki na sala vaka ki na vualiku.” Au a qai ta cake ki na sala vaka ki na vualiku, ka raica, sa tu mai na mata ni vualiku mai na matamata-ni-koro ni cabocabo-ni-soro na matakau ni veivuvutaki ena kenai curucuru.

⁶ A sa kaya tale vei au ko koya, “Ko iko na luve ni tamata, ko sa kunea li na ka era cakava? Io na ka sa vakasisila vakalevu era sa cakava eke ko ira na lewe-ni-vuvale i Isireli, me'u lako tani vakayawa kina mai na noqu vale tabu? Ia mo lesu tale, mo mai raica na ka sa vakasisila vakalevu cake.”

⁷ A sa kauti au ko koya ki na mata ni bai; ia ni'u a vakaraica sa kune e dua na qara e na bai vatu.

⁸ Sa qai kaya vei au ko koya, “Ko iko na luve ni tamata, mo kelikeli mada e na bai oqo.” Ka'u sa qai kelikeli e na bai, ka raica, sa dua na katuba.

⁹ Ka sa kaya vei au ko koya, “Mo curu mada ki loma, ka raica na veika vakasisila ca sara era sa cakava eke.”

¹⁰ Au a qai curu kina ka vakaraica; ka'u sa kunea na yavusa manumanu kece sa dauqasi voli, kei na manumanu yavai va vakasisila, kei na nodra matakau kece na vale i Isireli, sa volai tu e na lalaga taucoko.

¹¹ A ra sa qarava ko ira e lewe vitusagavulu na tagane era qase ni vale i Isireli, ia ko Jeasanaia na luve i Savani sa tu e na kedra maliwa. Era a dui taura tu e ligana na nona miqa ni ka boi vinaka, ka sa dua na o loaloa ni ka boi vinaka sa kuvu cake tu.

¹² Sa qai kaya vei au ko koya, “Ko sa kunea li, ko iko na luve ni tamata, na ka era sa dui cakava ko ira na qase ni vale i Isireli e na butobuto, na tamata yadua e na bure ni nona matakau? Ni ra sa kaya, ‘Sa sega ni raici keda ko Jiova; sa biuti vuravura ko Jiova.’ ”

¹³ A sa kaya talega vei au ko koya, “Ko na raica na ka vakasisila e levu cake sara era sa cakava.”

¹⁴ Sa qai kauti au ko koya ki na matamata-ni-koro ni vale i Jiova sa donuya na mata ni vualiku; ka raica, era sa tiko mai kea eso na yalewa era tagicaki Tamusi.

¹⁵ Sa qai kaya vei au ko koya, “Ko sa raica li na ka oqo, ko iko na luve ni tamata? Ko na se raica tikoga na ka vakasisila levu cake mai na veika oqo.”

¹⁶ A sa kauti au ko koya ki na lomanibai e loma ni vale i Jiova, ka raica, sa tiko mai na mata ni vale i Jiova, e na tadrua ni curucuru kei nai cabocabo-ni-soro, e lewe ruasagavulu ka lima beka na tagane, era sa vakanadaku ki na vale i Jiova, ka vakanamata ki na tokalau; a ra sa cuva ki na mata-ni-siga vaka ki na tokalau.

¹⁷ Sa qai kaya vei au ko koya, “Ko sa raica li na ka oqo, ko iko na luve ni tamata? Sa ka wale beka vei ira na lewe-ni-vuvale i Juta ni ra cakava na ka vakasisila era sa cakava tiko eke? Me ra vakasinaita li na vanua e nai valavala kaukauwa ka ra qai lesu tale me ra mai vakacudrui au? Ka raica, era sa kauta na tabanikau ki na ucudra!

¹⁸ O koya oqo ka'u na cakacaka kina e na cudru. Ena sega ni vosota na mataqu, ka'u na sega talega ni yalololoma. Ia ke ra tagi vakadomoilevu e na daligaqu, ka'u na sega ni rogoci ira.”