Isikeli 7 - Ai Vola Tabu (Vakadewa Makawa Vakavoutaki 2021)

Na Siga ni Nona Cudru ko Jiova

¹ A sa yaco tale vei au na vosa i Jiova, ka vaka:

² Ia ko iko, na luve ni tamata, sa kaya vakaoqo na Turaga ko Jiova ki na vanua vaka-Isireli: Ai vakataotioti! Sa yaco mai nai cavacava ki nai yalayala va-va ni vanua.

³ Sa qai yaco vei iko na kemui cavacava, ka'u na vakayacora na noqu cudru vei iko, ka lewai iko me vaka na nomu i valavala, ka totogitaki iko baleta na nomu i valavala vakasisila kecega.

⁴ Ia na mataqu ena sega ni vosoti iko, ka'u na sega talega ni yalololoma vei iko; ni ka'u na totogitaki iko baleta na nomu i valavala, ia na nomu i valavala vakasisila sa na tu ga vei iko. Ia dou na qai kila kina ni sai au ko Jiova.

⁵ Sa kaya vakaoqo na Turaga ko Jiova: Na ca, na ca duaduaga! Raica, sa qai yaco mai oqo.

⁶ Sa yaco mai nai tinitini, sa yaco mai nai vakataotioti. Sa yadravi iko; raica, sa qai yaco mai.

⁷ Sa kida mai vei iko na kena mataka, o iko sa tiko e na vanua. Sa yaco mai na kena gauna, sa voleka mai na siga— ni kidroa, ka segai na kaila ni marau e na veiulunivanua.

⁸ Sa vo ga vakalailai me'u qai sova yani na noqu cudru vei iko, ka vakaotia yani na noqu lesavi iko. Ia ka'u na lewai iko me vaka na nomu i valavala, ka sauma vei iko na nomu i valavala vakasisila kecega.

⁹ Ia na mataqu ena sega dina ni vosota; au na sega talega ni yalololoma; ka'u na sauma vei iko me vaka na nomu i valavala, ia na nomu ka vakasisila ena tu ga vei iko. Ia dou na qai kila kina ni sai au ko Jiova sa ia na veicudruvi.

¹⁰ Dou raica na kena siga! Raica, sa yaco mai! Sa lako mai na nomudou rarawa; sa seraki mai na tabanikau, sa kubu mai na viavialevu.

¹¹ Na veivakacacani sa tubu cake me tabanikau ca sara. Ena sega vei ira me vo tiko, ena sega na veika e levu vei ira, ka sega na nodra i yau; ena sega talega na tagi yaso e na vukudra.

¹² Sa yaco na kena gauna, sa toro voleka mai na siga; me kakua ni reki ko koya sa volivoli, ka me kakua talega ni tagi ko koya sa volitaka; ni sa cudruvi kecega na kedra lewe ni vanua.

¹³ Ni na sega ni taukena tale na ka sa volitaki, ko koya sa volitaka na ka, ke ra sa bula tiko. Ni sa vagolei na raivotu oqo vei ira kecega na kedra lewe vuqa; ia ena sega me lesu mai; ena sega talega e dua vei ira sa caka cala tiko me maroroi koya kina.

¹⁴ Era sa uvuca na davui, io me ra vakarau kecega; ia sa sega e dua sa lako ki nai valu, ni'u sa cudruvi ira kecega na kedra lewe ni vanua.

¹⁵ Nai seleiwau sa tiko e tautuba, ka sa tiko e loma na mate dauveiveitauvi kei na dausiga; o koya sa tiko mai na were sa mate ga e nai seleiwau; o koya sa tiko e na koro levu—sa kani koya na dausiga kei na mate dauveiveitauvi.

¹⁶ A ra na dro ko ira sa dro bula, a ra na tiko e na veiulunivanua me vaka na ruve ni veibuca, ka dui tagi yadua e na vuku ni nona i valavala ca.

¹⁷ A ligadra kece ena wadamele, kei na durudra kece ena malumalumu me vaka na wai.

¹⁸ A ra na vauci ira e nai sulu taga, ena nodra i tutuvi talega na domobula; era na matamadua ko ira kecega, era na ulu cou ko ira kece talega.

¹⁹ A nodra siliva era na biuta ki na sala ni koro; kei na nodra koula ena vaka na ka velavela vei ira. A nodra siliva kei na nodra koula ena sega ni vakabulai ira rawa e na siga ni cudru i Jiova. Ena sega ni vakamamautaki kina na nodra viakana se vakasinaiti kina na ketedra; ni sa nodra caka cala oqo era sa tarabe kina.

²⁰ Ia na nona ka vakaiukuuku ka vakaturaga, sa vakaduria ko koya me ka lagilagi sara; ia na matakau ni nodra ka vakasisila ka velavela era sa cakava kina; o koya oqo ka'u sa cakava me ka vakasisila vei ira.

²¹ Ia ka'u na solia ki na ligadra na kai tani, me nodra i yau; vei ira talega na tamata ca kei vuravura, mei toki-ni-valu; a ra na vakacacana.

²² Ia ka'u na vagolea tani na mataqu mai vei ira, ka ra na vakacacataka na noqu yasana tabu; ni ra na curu kina na dauvakacaca, ka vakacacana.

²³ Mo cakava na sinucodo; ni sa robota na vanua na veilabati; kei na koro sa sinai tu e nai valavala kaukauwa.

²⁴ O koya oqo ka'u na kauti ira mai era ca sara vei ira na veimatanitu, a ra na taukena na nodra veivale. Ia ka'u na vakaotia na nodra viavialevu na kaukauwa, ka na vakacacani talega na nodra veiyasana tabu.

²⁵ Ni sa yaco mai na dauveivakarusai, era na vakasaqara na veisorosorovi, ia ka na sega ga.

²⁶ Na ca ena veitaravi kei na ca, nai rogorogo talega kei nai rogorogo; era na qai taroga vua na parofita na raivotu; ia na vunau ena yali mai vua na bete, kei na lewa mai vei ira na qase.

²⁷ Ena tagi ko koya na tui, io ko koya na ravouvou ena vakaisulu e na rusa, a ligadra talega na lewe-ni-vanua ena sautaninini; ka'u na cakacaka vei ira me vaka na nodra i valavala; ia ka'u na cudruvi ira me vaka na ka sa dodonu vei ira. Era na qai kila kina ni sai au ko Jiova.