Isikeli 6 - Ai Vola Tabu (Vakadewa Makawa Vakavoutaki 2021)

Sa Cudruvi ko Isireli e na Vuku ni Qaravi Kalou Lasu

¹ A sa yaco vei au na vosa i Jiova, ka vaka:

² “Ko iko na luve ni tamata, mo vakanamata mada ki na veiulunivanua ni Isireli, ka parofisaitaki ira,

³ ka kaya, Oi kemudou na veiulunivanua ni Isireli, dou rogoca na vosa ni Turaga ko Jiova! Sa kaya vakaoqo na Turaga ko Jiova ki na veiulunivanua, kei na veiulu-ni-koro, ki na veiuciwai, kei na veibuca: Raica, oi au, ka'u na vakayacora vei kemudou nai seleiwau, ia ka'u na vakarusa na nomudou veiyasana cecere.

⁴ Ena vakacacani na nomudou i cabocabo-ni-soro, ka na musuki na nomudou matakau; ia ka'u na vakabalei ira na nomudou tagane sa mate e matadra na nomudou matakau.

⁵ Ia ka'u na virinoca na yagodra mate na Isireli e matadra na nodra matakau; ka veibiuyaka na suimudou me volita na nomudou i cabocabo-ni-soro.

⁶ E na nomudou i tikotiko kecega ena rusa kina na veikoro; ia na veiyasana cecere, ena lala ga; me rusa ka me vakacacani kina na nomudou i cabocabo-ni-soro, ka na musuki ka me oti na nomudou matakau, ka me ta sobu na nomudou matakau, ka me yavu laivi sara na nomudou cakacaka;

⁷ a ra na bale ko ira sa vakamatei e na kemudou maliwa, ia dou na kila ni sai au ko Jiova.

⁸ “Ia ka'u na vakavoca eso vei kemudou. Eso vei kemudou era na bula mai nai seleiwau e na maliwa ni veimatanitu ka veiseyaki ki na veivanua.

⁹ Ia ko ira vei kemudou sa bula, era na daunanumi au e na veimatanitu era na kau vakabobula kina, ni'u a rarawataka na lomadra dauyalewa ka sa gole tani vei au, kei na matadra sa daugoleva vakaukauwa na nodra matakau. Era na qai vakasisilataki ira e na vuku ni ka ca era sa cakava e na nodra i valavala vakasisila kecega.

¹⁰ A ra na kila ni sai au ko Jiova, ka ni ka'u sa sega ni kaya wale ni'u na cakava vei ira na ka ca oqo.”

¹¹ Sa kaya vakaoqo na Turaga ko Jiova: “Mo vakasausau e na ligamu ka vakabutubutu e na yavamu, ka kaya, Ulei na nodra i valavala vakasisila kece na lewe-ni-vuvale i Isireli! Ni ra na bale e nai seleiwau, kei na dausiga, kei na mate dauveiveitauvi.

¹² O koya sa tiko vakayawa, ena mate e na mate dauveiveitauvi; kei koya sa tiko voleka, ena bale e nai seleiwau; kei koya sa vo tiko ni sa buku na druadrua ni koro, ena mate e na dausiga. Au na vakayacora vakaoqo na noqu cudru vei ira.

¹³ Dou na qai kila ni sai au ko Jiova, ni sa qai koto vata na nodra tagane ka vakamatei kei na nodra matakau ka volita na nodra i cabocabo-ni-soro, e na veiulu-ni-koro kecega, kei na dela ni veiulunivanua kecega, kei na ruku ni kau bulabula kecega, kei na ruku ni oki rugurugua kecega, na yasana era sa vakacabora kina na ka boi vinaka ki na nodra matakau kecega.

¹⁴ Ia ka'u na dodoka na ligaqu vei ira, ka vakalalataka na vanua, io, me lala vakalevu ka lala vakalailai na vanua lala mai Tipila, e na nodra i tikotiko kecega; ka ra na kila ni sai au ko Jiova.”