Isikeli 48 - Ai Vola Tabu (Vakadewa Makawa Vakavoutaki 2021)

Nai Votavota Vakamataqali

¹ “Sa vakaoqo na yacadra na veiyavusa: Mai nai yalayala vaka ki na vualiku ka muria na baravi e na sala ki Eciloni, ni sa lakovi ko Emaci, kei na koro ko Enani, kei nai yalayala i Tamasiko vaka ki na vualiku, ka yala ki tai kadua mai Emaci; ena nona i yalayala oqori ki na tokalau ki ra talega, sa na nei Tani, e dua nai votavota.

² Ka veitaravi kei nai yalayala nei Tani, mai na yasana mai na tokalau ka yala ki na yasana ki na ra, sa na nei Aseri, e dua nai votavota.

³ Ka veitaravi kei nai yalayala nei Aseri, mai na yasana mai na tokalau ka yala ki na yasana ki na ra, sa na nei Navitalai, e dua nai votavota.

⁴ Ka veitaravi kei nai yalayala nei Navitalai, mai na yasana mai na tokalau ka yala ki na yasana ki na ra, sa na nei Manasa, e dua nai votavota.

⁵ Ka veitaravi kei nai yalayala nei Manasa, mai na yasana mai na tokalau ka yala ki na yasana ki na ra, sa na nei Ifereimi, e dua nai votavota.

⁶ Ka veitaravi kei nai yalayala nei Ifereimi, mai na yasana mai na tokalau ka yala ki na yasana ki na ra, sa na nei Rupeni, e dua nai votavota.

⁷ Ka veitaravi kei nai yalayala nei Rupeni, mai na yasana mai na tokalau ka yala ki na yasana ki na ra, sa na nei Juta, e dua nai votavota.

⁸ “Ia ka veitaravi kei nai yalayala i Juta, mai na yasana mai na tokalau ka yala ki na yasana ki na ra, sa kenai sevu ni vanua mo dou solia, e rua na oba ka lima na udolu (25,000) na kiupiti na kena raraba, kei na kena balavu me tautauvata kei na dua nai votavota, mai na yasana mai na tokalau ka yala ki na yasana ki na ra, ia na tikina tabu ena tu sara ga ki loma.

⁹ Nai sevu dou na solia me nei Jiova, me rua na oba ka lima na udolu (25,000) na kiupiti na kena balavu, kei na kena raraba e rua na oba (20,000).

¹⁰ Ia nai sevu tabu oqo ena nodra na bete; a kena balavu vaka ki na vualiku e rua na oba ka lima na udolu (25,000) na kiupiti, kei na kena raraba ki na ra e dua na oba (10,000) na kiupiti, kei na kena raraba ki na tokalau e dua na oba (10,000), kei na kena balavu ki na ceva e rua na oba ka lima na udolu (25,000); ia na tikina tabu i Jiova me tu sara ga ki loma.

¹¹ Ena nodra na bete na tikina tabu oqo, ko ira na luve i Setoki, sa ra vakaitavi tikoga e na noqu cakacaka, ka sa sega ni cala ni ra sa cala ko ira na Isireli, me vaka ni ra cala ko ira na Livai.

¹² Ia nai sevu oqo, nai sevu ni vanua me sa nodra tikina tabu sara, ka yaco ki na nodra i yalayala na Livai.

¹³ Ia ena nodra na Livai me sa donuya na nodra i yalayala na bete, e rua na oba ka lima na udolu (25,000) na kiupiti na kena balavu, ka dua na oba (10,000) na kena raraba. A kena balavu taucoko ena rua na oba ka lima na udolu (25,000) na kiupiti, kei na kena raraba e dua na oba (10,000).

¹⁴ Ia me ra kakua ni volitaka, se vakaisosomitaka, se vakayalia nai sevu ni vanua, ni sa tabu me nei Jiova.

¹⁵ “Ia na lima na udolu na kiupiti sa vo e na rabana ka sa donuya na rua na oba ka lima na udolu (25,000), sa na sega ni tabu na yasana oqo, ia sa na bale ki na koro me tara kina na vale, me kenai bili talega. Ia na koro me tu sara ga ki loma;

¹⁶ ka me vakaoqo na kenai vakarau: na tikina mai na vualiku me va na udolu ka lima na drau na kiupiti, kei na tikina mai na ceva me va na udolu ka lima na drau, kei na tikina mai na tokalau me va na udolu ka lima na drau, kei na tikina mai na ra me va na udolu ka lima na drau.

¹⁷ Ia nai bili ni koro me rua na drau ka limasagavulu na kiupiti ki na vualiku, ka rua na drau ka limasagavulu ki na ceva, ka rua na drau ka limasagavulu ki na tokalau, ka rua na drau ka limasagavulu ki na ra.

¹⁸ Ia na vo ni kena balavu sa donuya nai sevu tabu me dua na oba (10,000) na kiupiti vaka ki na tokalau, ka dua na oba (10,000) vaka ki na ra, ka me donuya nai sevu tabu; ia na kena vuata me sa kedra kakana era qarava na koro.

¹⁹ Ia me ra vakaitavi kece e na veiqaravi ni koro, ko ira na veiyavusa i Isireli.

²⁰ Ai sevu taucoko ena rua na oba ka lima na udolu (25,000) na sukuwea kiupiti, me takiveilevu na veiyasana ni sevu dou na solia, kei nai votavota ni koro.

²¹ “Ia na kena vo ni sevu tabu, kei nai votavota ni koro, ena nona na turaga, vaka ka vaka, me donuya e rua na oba ka lima na udolu (25,000) na kiupiti nai sevu e na kenai yalayala ki na tokalau, me donuya talega ki na ra e rua na oba ka lima na udolu (25,000) na kiupiti ki nai yalayala ki na ra, sa donuya nai votavota ni tui. Ia sa na kenai sevu tabu ko ya; ia na yasana tabu ni vale sa na tu sara ga ki loma.

²² Ia na tikina ki daku ni nodra i votavota na Livai, kei nai votavota ni koro, sa tu mai ki loma ni nona na tui, e na maliwa ni yalayala nei Juta kei nai yalayala nei Penijamini, ena nona na tui.

²³ “Ia na kedra vo ni veiyavusa; mai na yasana mai na tokalau ka yala ki na yasana ki na ra, me nei Penijamini.

²⁴ Ka veitaravi kei nai yalayala i Penijamini, mai na yasana mai na tokalau ka yala ki na yasana ki na ra, me nei Simione.

²⁵ Ka veitaravi kei nai yalayala i Simione, mai na yasana mai na tokalau ka yala ki na yasana ki na ra, me nei Isakari.

²⁶ Ka veitaravi kei nai yalayala i Isakari, mai na yasana mai na tokalau ka yala ki na yasana ki na ra, me nei Sevuloni.

²⁷ Ka veitaravi kei nai yalayala i Sevuloni, mai na yasana mai na tokalau ka yala ki na yasana ki na ra, me nei Kati.

²⁸ Ka veitaravi kei nai yalayala i Kati, mai na yasana vakaceva mai na ceva, me sa kenai yalayala mai Tema kei na wai ni veileti mai Ketesa, kei na uciwai ka yala sara ki na Wasa Levu.

²⁹ Oqo na vanua mo dou vota me dui nodra i votavota na veiyavusa i Isireli me ra taukena, ka sa vakaoqo na nodra i votavota, sa kaya na Turaga ko Jiova.

Na Matamata ni Koro

³⁰ “Ia sa vakaoqo nai yalayala ni koro e na yasana ki na vualiku, e va na udolu ka lima na drau nai vakarau.

³¹ Ia na matamata-ni-koro ena vakatokai e na yacadra na yavusa i Isireli; e tolu na matamata-ni-koro me donuya na tokalau; e dua na matamata-ni-koro i Rupeni, e dua na matamata-ni-koro i Juta, ka dua na matamata-ni-koro i Livai.

³² Ia mai na yasana ki na tokalau e va na udolu ka lima na drau, ka tolu na matamata-ni-koro; e dua na matamata-ni-koro i Josefa, e dua na matamata-ni-koro i Penijamini, ka dua na matamata-ni-koro i Tani.

³³ E na yasana talega ki na ceva e va na udolu ka lima na drau nai vakarau, ka tolu na matamata-ni-koro; e dua na matamata-ni-koro i Simione, e dua na matamata-ni-koro i Isakari, ka dua na matamata-ni-koro i Sevuloni.

³⁴ E na yasana ki na ra e va na udolu ka lima na drau, kei na nodra matamata-ni-koro e tolu; e dua na matamata-ni-koro i Kati, e dua na matamata-ni-koro i Aseri, ka dua na matamata-ni-koro i Navitalai.

³⁵ Ni sa vakavolivolita na koro sa tini ka walu na udolu na kenai vakarau. Ia na yaca ni koro mai na siga ko ya, ko Jiova-sama [Sa tiko mai kea ko Jiova].