Isikeli 47 - Ai Vola Tabu (Vakadewa Makawa Vakavoutaki 2021)

Na Wai e Dave Sobu mai na Vale Tabu

¹ Sa qai kauti au tale ko koya ki na katuba ni vale tabu; ka raica, sa dua na wai sa dave yani mai na ruku ni lago ni vale vaka ki na tokalau (ni sa donuya na tokalau na mata ni vale tabu). Ia na wai sa dave sobu mai na ruku ni vale tabu mai na tabana ki nai matau, mai na yasa ni cabocabo-ni-soro ki na ceva.

² Sa qai kauti au yani ko koya e na sala ni matamata-ni-koro sa donuya na vualiku, ka sa tuberi au voli e na sala e tautuba ki na matamata-ni-koro ki sau, e na sala sa qara donu ki na tokalau, ka raica, na wai sa drodro tiko mai na liga i matau.

³ Ia ni sa lako yani na tamata sa taura na wa i vakarau e na ligana, vaka ki na tokalau, sa vakarautaka e dua na udolu na kiupiti, ka sa kauti au ki loma ni wai; na wai sa yala ki na noqu; qurulasawa.

⁴ Sa vakarautaka tale ko koya e dua na udolu, ka qai kauti au ki loma ni wai; ia na wai sa yala ga ki na duruqu. Sa qai vakarautaka tale ko koya e dua na udolu, ka kauti au yani ki loma; ia na wai sa qai yala ki na toloqu.

⁵ Sa qai vakarautaka tale ko koya e dua na udolu, ia sa qai dua na uciwai ka'u sa sega ni lakova rawa; ni sa titobu na wai, na wai me qalo kina, na uciwai sa sega ni lakovi rawa.

⁶ A sa kaya vei au ko koya, “Ko sa raica na ka oqo, ko iko na luve ni tamata, se segai?” Sa qai kauti au ko koya, ka vakalesui au tale ki na bati ni uciwai.

⁷ Ia ni'u sa lesu, raica, sa tu e na bati ni uciwai e dua na ka levu na vunikau e na batina ruarua.

⁸ Sa qai kaya vei au ko koya, “A wai oqo sa dave yani ki na vanua vaka ki na tokalau, a sa lako sobu ki na vanua lala, ka yaco sara ki waitui; ia ni sa yaco sara ki waitui, ena wai bula kina na kena wai.

⁹ Ia ena yaco, na ka kece sa bula, ka lako voli, e na tikina kece sa yaco kina na uciwai, ena bula; ia ena levu sara na ika e na vuku ni na yaco kina na wai oqo. Ni na bula kina na wai, ka ra na bula talega na ka kece sa yaco kina na uciwai.

¹⁰ Ia era na tu mai kina na gonedau mai Eni-keti ka yala ki Eni-eki-leimi; sa na tu nai sasau ni lawa, ia na kena yavusa ika, ena vaka na ika ni Wasa Levu, na ka levu sara.

¹¹ Ia na kena tikina lolobo ka vakadranodrano ena sega ni bula; ena biu tu me tuituina ga.

¹² Ia e na bati ni uciwai ruarua ena tubu kece kina na kau sa laukana na vuana, ena sega ni malai na drauna, se oti rawa na vuana. Ena vuavuai tikoga e na veivula, ni sa dave na kena wai mai na tikina tabu. Era na daulaukana na vuana, ia na drauna sa na wainimate.”

Nai Yalayala Vou ni Vanua

¹³ Sa kaya vakaoqo na Turaga ko Jiova: “Me sa kenai yalayala oqo, mo dou muria ni dou vota na vanua ki na veiyavusa i Isireli e tinikarua; me nei Josefa e rua nai votavota.

¹⁴ Ia dou na dui taukena vata ga, na tamata yadua, na vanua ka'u a dulaka cake kina na ligaqu me'u solia vei ira na nomudou qase, ia na vanua oqo ena lutu vei kemudou mo dou taukena.

¹⁵ “Ia ena vakaoqo nai yalayala ni vanua e na yasana ki na vualiku, mai na Wasa Levu, e na sala ki Eciloni, ni sa lakovi ko Sitati;

¹⁶ ko Emaci, kei Peroca, kei Sipireimi, mai na maliwa ni yalayala i Tamasiko kei nai yalayala i Emaci; na koro ko Atikoni, e nai yalayala i Avirani.

¹⁷ Ena kenai yalayala talega mai waitui na koro ko Enani, kei nai yalayala i Tamasiko, kei na yasayasa vakavualiku, kei nai yalayala i Emaci. Ia oqo na kenai yalayala vakavualiku.

¹⁸ “A kenai yalayala talega ki na tokalau dou na yalana mai Avirani, kei Tamasiko, kei Kiliati, kei na yasana ni Isireli mai na Joritani, ia mai nai yalayala ko ya ki na waitui mai na tokalau. Ia oqo na kenai yalayala ki na tokalau.

¹⁹ “A kenai yalayala talega mai na ceva, ko Tema ka yaco ki na wai ni veileti mai Ketesa, mai na uciwai ka yala ki na Wasa Levu. Ia oqo na kenai yalayala vaka ki na ceva.

²⁰ “A kenai yalayala talega ki na ra, na Wasa Levu mai nai yalayala ko ya, ka yala sara ki Emaci. Oqo na kenai yalayala ki na ra.

²¹ “Ia dou na vota na vanua oqo vakataki kemudou na veiyavusa i Isireli.

²² Ia ena vakaoqo, dou na ia na vakawiri madigi e na vanua mo dou taukena vakataki kemudou, kei ira na vulagi era tiko kei kemudou, sa ra na vakaluveni e na kemudou maliwa. Ia me ra tautauvata ko ira kei kemudou na Isireli dou sai taukei dina; me rai taukei vata kei kemudou e na veiyavusa i Isireli.

²³ Ia sa nodra i tavi, na yavusa sa tiko kina e dua na vulagi, me ra solia vua na nona i votavota vanua me taukena, sa kaya na Turaga ko Jiova.