Isikeli 42 - Ai Vola Tabu (Vakadewa Makawa Vakavoutaki 2021)

Na Veivalevale e na Yasana Tabu kei na Bai

¹ Sa qai kauti au yani ko koya ki na lomanibai ki taudaku, e na sala sa donuya na mata ni vualiku, ka sa kauti au ki na veivalevale sa donuya na yasana tabu, ka donuya talega na vale sa toka vaka ki na mata ni vualiku.

² E matana ka dua na drau na kiupiti na kena balavu sa dua na katuba ki na mata ni vualiku, ia na kena raraba sa limasagavulu na kiupiti.

³ Me veidonui kei na tikina ka ruasagavulu na kiupiti ni lomanibai ki loma, kei na raravatu ni lomanibai ki taudaku, sa tu na kena varada e tolu e veitaqataqai.

⁴ Ia e na mata ni veivalevale sa dua kina nai gadegade ka tini na kiupiti na kena raraba ki loma, ka dua na sala sa dua na kiupiti; ia na kedra katuba sa donuya na vualiku.

⁵ Ia nai taba loma ni vale e cake sa rabailailai sobu, e na vuku ni varada ni sa kana kina ki loma, ki na kena talega mai ra, kei na kena e loma ni vale.

⁶ Ni sa taba tolu e loma ni vale, a sa sega ni vakaduru me vaka sa vakaduru tu na veilomanibai. O koya oqo sa rabailailai sobu kina na veitiki ni vale e cake sara, sa levu cake nai karua ki ra, kei nai katolu e na kedrau maliwa kei na qele.

⁷ Ia na bai ki taudaku e donuya na veitiki ni vale, vaka ki na lomanibai ki taudaku e na mata ni veitiki ni vale, sa limasagavulu na kiupiti na kena balavu.

⁸ Ni sa kena balavu na veitiki ni vale e na lomanibai e taudaku e limasagavulu na kiupiti, ka raica, sa dua na drau na kiupiti e na mata ni vale tabu.

⁹ Ia e ruku ni veitiki ni vale oqo sa tu kina na kenai curucuru mai na tokalau, ni sa curumi mai na lomanibai e taudaku.

¹⁰ E na tadrua ni bai ni lomanibai ki na tokalau, ka donuya na yasana tabu, ka donuya talega na vale e tara tu, sa tu kina na veitiki ni vale

¹¹ kei na kedrai curucuru e matana. Sa rairai tautauvata oqo kei na veitiki ni vale ki na mata ni vualiku, sa balavu vata, ka raraba vata. Ia na kedrai curucuru yani kece talega sa tautauvata kaya, ka sa vaka talega kina na dui kedra katuba,

¹² ka vaka na dui kedra katuba na veivalevale ki na mata ni ceva. Sa yadua vaka talega kina na kedra katuba e na mua ni sala, io na sala sa qara donu ki na bai, ni sa curumi mai na tokalau.

¹³ Sa qai kaya vei au ko koya, “A veivalevale ni vale ki na mata ni vualiku kei na veivalevale ni vale ki na mata ni ceva, o koya sa donuya na yasana tabu, oqori na veitiki ni vale tabu, ena kania kina ko ira na bete era torovi Jiova na ka e tabu sara. Era na maroroya mai kea na ka e tabu sara—nai madrali laukana, kei nai soro ni valavala ca, kei nai soro ni caka cala—ni sa tikina tabu.

¹⁴ Ni ra curu kina na bete, me ra kakua ni lako tani mai na Tikina Tabu ki na lomanibai ki taudaku, ia me ra virikotora eke ga na nodra i sulu ni nodra cakacaka, ni ra sa ka tabu oqori. Me ra vakaisulu e nai sulu tani, ka qai muria nai valavala ni tamata wale.”

¹⁵ Ia ni sa vakarautaka oti ko koya na vale e loma, sa qai kauti au yani ko koya ki na matamata-ni-koro sa donuya na tokalau, a sa vakarautaka wavolita sara.

¹⁶ Sa vakarautaka na yasana ki na tokalau e na gasau i vakarau, sa lima na drau na gasau.

¹⁷ Sa vakarautaka na yasana ki na vualiku; ka sa lima na drau na gasau.

¹⁸ Sa vakarautaka na yasana ki na ceva, ka sa lima na drau na gasau, ni sa vakarautaki e na gasau.

¹⁹ Sa qai gole yani ko koya ki na yasana ki na ra, ka vakarautaka, ka sa lima na drau na gasau ni sa vakarautaki e na gasau.

²⁰ Sa vakarautaka ko koya e na yasana va-va. Sa viribaiti vakavolivoliti sara, ka sa lima na drau na gasau na kena balavu, ka lima na drau na kena raraba, me sa tawase tani kina na tikina tabu mai na tikina sa sega ni tabu.