Isikeli 41 - Ai Vola Tabu (Vakadewa Makawa Vakavoutaki 2021)

Na Loma ni Vale Tabu

¹ Sa qai kauti au ko koya ki na vale tabu, ka sa vakarautaka na duru, ka sa dui ono na kiupiti na kena raraba ki na tabana e dua, ka dui ono na kiupiti na kena raraba ki na tabana ka dua, na kena raraba ni vale tabu sa vaka kina.

² Ia na kena raraba ni katuba sa tini na kiupiti; ia na taba ni katuba sa lima na kiupiti vaka, ka lima na kiupiti vaka. A sa vakarautaka ko koya na kena balavu ka sa vasagavulu na kiupiti, kei na kena raraba ka sa ruasagavulu na kiupiti.

³ Sa qai curu ki loma ko koya, ka vakarautaka na duru ni sogo, a sa rua na kiupiti; kei na katuba, ka sa ono na kiupiti, kei na raraba ni katuba, ka sa vitu na kiupiti.

⁴ A sa vakarautaka ko koya na kena balavu, ka sa ruasagavulu na kiupiti, kei na kena raba, ka sa ruasagavulu na kiupiti e na mata ni vale tabu. Ka sa kaya vei au ko koya, “Sai koya oqo na Tikina Tabu Sara.”

⁵ Sa qai vakarautaka ko koya na lalaga ni vale, ka sa ono na kiupiti, kei na raraba ni loqi ki na yasa ni vale, ka sa dui va na kiupiti, ka volita na vale e na veiyasana kecega.

⁶ Ia nai taba loqi e veitaqataqai, sa tolu, ka yatolusagavulu na kena loqi. A sa lagoni mai ki na lalaga ni vale me kedra i vakadei ki na yasa ni vale; ia sa sega ni sema kei na lalaga ni vale tabu.

⁷ A sa rabailevu cake tu, ni sa cabeti voli ki cake nai taba loqi, e na vuku ni sa cabeti voli tiko ki cake na vale ka volita sara na vale tabu. O koya oqo sa rabailevu cake tu kina na vale ki cake, ni sa cabeti vakaoqo nai taba loqi ki cake sara, mai na kena vale e ra sara, ka basika na kena e loma.

⁸ Au a raica talega na kena cecere ni vale e na veiyasana mai na dui kenai lago nai taba loqi, ka sa ono na kiupiti ki na kena sema kei na vale.

⁹ A kena raraba ni bai ni taba loqi ki sau, sa lima na kiupiti. Ia na tikina sa vo mai ki vale sa kedra nai taba loqi sa tu mai ki loma.

¹⁰ Ia na tadrua ni yatu vale sa ruasagavulu na kiupiti ka muri volita na vale tabu e na veiyasana.

¹¹ Ia na kedra katuba nai taba loqi sa dui donuya tu na tikina sa vo, sa dua na katuba e donuya na vualiku, ka dua tale na katuba sa donuya na ceva; ia na kena raraba ni tikina sa vo sa lima na kiupiti ka volita tu.

¹² Ia na vale sa tara tu e na mata ni yasana tabu ki na tikina ki na ra sa vitusagavulu na kiupiti na kena raraba; ia na lalaga ni vale e tara tu sa lima na kiupiti sa volita tu na kena vavaku, ka ciwasagavulu na kiupiti na kena balavu.

¹³ Ia sa vakarautaka ko koya na vale tabu, e dua na drau na kiupiti na kena balavu; kei na yasana tabu, kei na vale sa tara tu, kei na kena veibai, e dua na drau na kiupiti na kena balavu;

¹⁴ na kena raraba talega ni mata vale, kei na yasana tabu ki na tokalau, e dua na drau na kiupiti.

¹⁵ A sa vakarautaka ko koya na kena balavu ni vale e tara tu ka donuya na yasana tabu mai dakuna, kei na kena varada vaka ka vaka, e dua na drau na kiupiti; kei na vale tabu ki loma, kei nai curucuru ni lomanibai;

¹⁶ kei na duru ni sogo, kei na katuba qiqo, kei na varada e dui volita nai taba loqi e tolu ka donuya na katuba, ka botani voli tu e na kau, mai na qele talega ka yala ki na katuba lalai (ia na katuba lalai sa lati tu),

¹⁷ ka yacova oqori ki dela ni katuba, ka yala sara ki na vale tabu ki loma, e taudaku talega, ka muria voli sara tu na bai e na veiyasana e loma e taudaku talega, me vaka na dui kenai vakarau.

¹⁸ A sa caka kina na jerupi kei na vuni niu-sawa, ia e dua na niu-sawa sa ceuti tu ga e na maliwa ni jerupi e rua. Na jerupi yadudua sa yarua na matadra:

¹⁹ na mata vakatamata sa donuya na vuni niu-sawa e na dua na yasana, kei na mata vakaluve-ni-laione sa donuya na vuni niu-sawa e na yasana kadua. Sa ceuti tu oqo e na veiyasana kecega ni vale tabu.

²⁰ Mai na buturara e ra ka yala ki na tikina e dela ni katuba, sa ceuti kina na jerupi kei na vuni niu-sawa, e na lalaga ni vale tabu talega.

²¹ A duru ni sogo ni vale tabu sa dui ta vakarivirivi. Na mata ni Tikina Tabu sa rairai tautauvata

²² kei nai cabocabo-ni-soro kau, sa tolu na kiupiti na kena cecere, ka rua na kiupiti na kena balavu, ka rua na kiupiti na kena raba; ia na tutuna, kei na delana, kei na sarisarina, sa kau ga. Ka sa kaya vei au ko koya, “Oqo na tepeli sa tu e na mata i Jiova.”

²³ A sa dui yarua na kena katuba na vale tabu kei na Tikina Tabu.

²⁴ A sa dui lobi rua na katuba yadua, e dui rube tu ruarua; sa lobi rua na katuba e dua, ka lobi rua na katuba kadua.

²⁵ A sa ceuti kina, io ki na katuba ni vale tabu na jerupi kei na vuni niu-sawa, me vaka sa ceuti e na lalaga; ka sa so na papa vavaku e na mata ni lalaga ni curucuru ki tuba.

²⁶ Ka sa so na kena katuba qiqo ka so na kena niu-sawa vaka ka vaka e na yasa ni curucuru, ia nai taba loqi ni vale, sa vakapapa vavaku talega.