Isikeli 4 - Ai Vola Tabu (Vakadewa Makawa Vakavoutaki 2021)

Ai Dusidusi ni Kena Buku na Druadrua kei Jerusalemi

¹ “Ia ko iko, na luve ni tamata, mo kauta e dua na vatu-buli, ka vakotora e matamu, ka vola kina na koro ko Jerusalemi;

² ka buku kena druadrua, ka tara na kena vale ni valu, ka viria na kena suva; mo tuva talega na kenai valu, ka viritura na kenai tukituki-ni-bai me vakavolivolita.

³ Mo kauta talega e dua na tavuteke, ka viritura me kena bai e na kemudrau maliwa kei na koro. Ia mo vakanamata kina, ka me na buku na druadrua ni koro, ia ko na qai kaba. Oqo nai vakatakilakila ki na vale i Isireli.

⁴ “Ia mo bika na sarisarimu i mawi, ka vakotora kina na nodra caka cala na lewe-ni-vuvale i Isireli. Ia me vaka nai wiliwili ni bogi ko sa bika kina, ena vakakina na nomu colata tiko na nodra caka cala.

⁵ Ni'u sa tauca vei iko na yabaki ni nodra caka cala, me vaka nai wiliwili ni bogi, e bogi tolu na drau ka ciwasagavulu. Ena vakakina na nomu colata tiko na nodra caka cala na vale i Isireli.

⁶ Ia ni ko sa vakaotia oqori, mo qai bika talega na sarisarimu i matau, mo colata tiko na nodra caka cala na vale i Juta ka bogi vasagavulu; ka'u sa lesia vei iko e dua na bogi me kenai sosomi ni dua na yabaki.

⁷ Ia mo vakanamata ki Jerusalemi mo kaba, ia me sa luvawale tu na ligamu, mo qai parofisaitaka na kena ca.

⁸ Ka raica, ka'u na vauci iko e na dali, ko na sega kina ni veivukiyaki rawa, ka mo vakaotia mada na bogi ni nomu buku na druadrua ni koro.

⁹ “Mo kauta talega vei iko e dua na witi, kei na barile, kei na pini, kei na pini damudamu, kei na sila, kei na kumini, ka biuta ki na dua na dari, ka cakava kina na kemu madrai, me vaka nai wiliwili ni bogi ko na bika kina na sarisarimu, me bogi tolu na drau ka ciwasagavulu mo kana tiko kina.

¹⁰ Ia ena vakarautaki na kena bibi ni kakana mo kania, ena ruasagavulu na sikeli e na veisiga yadua; me vagauna ga na nomu kana kina.

¹¹ Ia na kenai vakarau ni wai mo gunuva, e dua veimama na paidi; me vagauna ga na nomu gunu kina.

¹² Ia na keke madrai barile ko na kania, me kena buka talega ko vavia kina e matadra na benu ni tamata.”

¹³ A sa kaya ko Jiova, “Ena vakaoqo na nodra kania na kedra madrai sa sega ni savasava na Isireli e na veivanua tani, ka'u na vakasevi ira kina.”

¹⁴ Au a qai kaya, “Ulei Turaga Jiova! Raica, sa sega ni vakadukadukalitaki na yaloqu. Ia na ka sa mate loa, se dresulaki, ka'u a sega ga ni kania mai na gauna ka'u a gone kina ka yacova na siga oqo; sa sega talega ni curu ki na gusuqu e dua na lewe-ni-manumanu vakasisila.”

¹⁵ Sa qai kaya vei au ko koya, “Raica, au sa vakatara vei iko na de-ni-bulumakau mei sosomi ni benu ni tamata, ia me kena buka ko ya mo vakarautaka kina na kemu madrai.”

¹⁶ A sa kaya vei au ko koya, “Ko iko na luve ni tamata, raica, au na muduka na ka ni bula, ko ya na madrai, mai Jerusalemi; ka ra na kania na madrai ni sa vakarautaki na kena bibi a ra na nuiqawaqawa; ka ra na gunuva na medra wai ni sa vakarautaki, ka ra na kidacala.

¹⁷ Me ra dravudravua e na madrai kei na wai, ka dui veivakidacalataki, ka lutu sobu e na vuku ni nodra caka cala.