Isikeli 39 - Ai Vola Tabu (Vakadewa Makawa Vakavoutaki 2021)

Sa Cudruvi ka Vakarusai na Mataivalu i Koki

¹ “O koya oqo, ko iko na luve ni tamata, mo parofisaitaka na ca vei Koki, ka vaka, Sa kaya vakaoqo na Turaga ko Jiova: Raica, koi au na nomu meca, ko iko Koki, na nodra turaga levu na Meseki kei na Tupali.

² Ia ka'u na vakacocowiritaki iko ka vakauti iko yani ki liu, ka vakavuna na nomu lako cake mai na yasayasa vakavualiku, ka kauti iko mai ki na veiulunivanua ni Isireli.

³ Ia ka'u na qai yavita tani na nomu dakai mai na ligamu i mawi, ka'u na vakalutuma tani na nomu gasau mai na ligamu i matau.

⁴ Dou na bale e na veiulunivanua ni Isireli, ko iko kei na nomu i mataivalu kecega, kei na veimataqali era tiko kei iko. Ka'u na soli iko ki na manumanu daukata kecega sa vuka voli kei na manumanu ni vanua mo laukana.

⁵ Ko na bale e loma ni vanua lala; ni'u sa cavuta oqo koi au, sa kaya na Turaga ko Jiova.

⁶ Ia ka'u na vakatala na bukawaqa kivei Mekoki, vei ira talega era sa tiko vakacegu wale e na veiyanuyanu, ka ra na kila ni sai au ko Jiova.

⁷ “Ia na yacaqu tabu ka'u na vakatakila e na kedra maliwa na noqu tamata na Isireli; au na sega talega ni laiva me vakacacani tale na yacaqu tabu. Ka ra na kila na veimatanitu tani ni sai au ko Jiova na Yalosavasava sa tiko e Isireli.

⁸ Raica, sa yaco mai, io sa caka, sa kaya na Turaga ko Jiova; sa kena siga oqo ka'u a vosa oti kina.

⁹ “A ra na lako yani ko ira sa tiko e na veikoro vaka-Isireli ka ra na vakacaudreva ka vakama nai yaragi ni valu—nai sasabai kei nai vakaruru, na dakai-titi kei na gasau, nai ula kei na moto—ka ra na vakama e na bukawaqa me yabaki vitu,

¹⁰ ka ra na sega kina ni ca buka mai na were, se taya mai veikau; nai yaragi ni valu ga ena nomudou buka. Ka ra na tokitaka na tamata ka tokitaki ira eliu, ka butakoca na tamata ka butakoci ira eliu, sa kaya na Turaga ko Jiova.

Na Buluti nei Koki

¹¹ “Ia e na siga ko ya, ka'u na solia vei Koki e dua na nona tikina mai Isireli mei bulubulu, io na nodra buca na daulako tu e na bati ni waitui vaka ki na tokalau. Ka ra na sega ni lako rawa kina ko ira era lako voli yani, ia era na buluti Koki mai kea kei na nona i soqosoqo levu. Ka ra na vakatoka na buca ko ya ko Emoni-koki.

¹² Ia ko ira na vale i Isireli era na buluti ira tiko ka vula vitu, me ra vakasavasavataka na vanua.

¹³ Ka ra na oga e na veibulu ko ira kece na lewe-ni-vanua; ia era na rogo kina e na siga ka'u na vakarokorokotaki kina, sa kaya na Turaga ko Jiova.

¹⁴ Ia ni sa oti e vitu na vula era na qai lesia eso na tamata daucakacaka, me ra lako voli tikoga e na vanua me ra veivuke kei ira era lako voli yani me buluta na yagodra sa no e dela ni vanua, me vakasavasavataki kina na vanua.

¹⁵ Ia ni ra lako voli tu ko ira oqo, ka raica e dua na sui ni tamata, me ra qai cakava kina e dua nai vakatakilakila, me ra buluta mada ko ira na dauveibulu e na buca i Emoni-koki.

¹⁶ Ia ena yacana talega na koro ko Emona. Era na vakasavasavataka vakaoqo na vanua.

¹⁷ Ia ko iko, na luve ni tamata, sa kaya vakaoqo na Turaga ko Jiova, Mo kaya ki na manumanu vuka kecega, kei na manumanu kecega ni vanua, Dou soqoni vata, ka lako mai; dou soqoni vata mai na veiyasana kecega ki na noqu i madrali ka'u sa vakacabora me kemudou, io nai madrali levu e na veiulunivanua ni Isireli, mo dou kana lewe ni tamata, ka gunu dra.

¹⁸ Na lewedra na tamata qaqa dou na kania, ka dou na gunuva na kedra dra na veituraga kei vuravura—na sipi tagane, kei na lami, kei na me, kei na bulumakau, ko ira oqo era manumanu uro kecega ni Pasani.

¹⁹ Ia dou na kana uro mo dou mamau kina, ka gunu dra mo dou mateni kina, e na noqu i madrali ka'u sa vakacabora me kemudou.

²⁰ Ia dou na vakamamautaki mai na noqu tepeli e na ose, kei na qiqi-ni-valu, kei na tamata qaqa, kei na tamata i valu kecega, sa kaya na Turaga ko Jiova.

Era sa Vakalesui Tale na Isireli ki na Nodra Vanua

²¹ “Ia sa na qai laveti kina na noqu totoka e na veimatanitu tani, ka ra na raica kece na veimatanitu tani na noqu lewa dodonu ka'u sa cakava, kei na noqu tarai ira e na liga ni noqu cudru.

²² Era na qai kila ko ira na vale i Isireli ni sai au ko Jiova na nodra Kalou mai na siga ko ya ka ia tiko ki muri.

²³ A ra na kila ko ira na veimatanitu tani ni ra sa vakabobulataki ko ira na vale i Isireli e na vuku ni nodra caka cala, ka ni ra sa talaidredre vei au ka'u a tabonaka kina na mataqu vei ira, ka soli ira yani ki na liga ni nodra meca, ka ra sa bale kece kina e nai seleiwau.

²⁴ Me vaka na nodra sega ni yalosavasava kei na nodra talaidredre ka'u a cakacaka vakakina vei ira, ka tabonaka vei ira na mataqu.

²⁵ “O koya oqo sa kaya kina na Turaga ko Jiova; Au na qai kauti ira tale mai oqo na Jekope era vakabobulataki, ka'u na yalololoma vei ira kece na vale i Isireli, ka'u na vuvutaka e na vuku ni yacaqu tabu;

²⁶ ni ra sa vakamaduataki oti, ka cudruvi e na vuku ni nodra talaidredre kecega era a cala kina vei au, ni ra a tiko vinaka e na nodra vanua, ka sega e dua me vakarerei ira.

²⁷ Ni'u na kauti ira tale mai vei ira na veimataqali, ka vakasoqoni ira mai na veivanua ni nodra meca, ka vakarokorokotaki vei ira e na matadra na veimatanitu e vuqa.

²⁸ Era na qai kila ni sai au ko Jiova na nodra Kalou, ka'u a vakauti ira tani vakabobula ki na veimatanitu tani; ia ka'u sa qai vakasoqoni ira mai ki na nodra vanua, ka sega ni vakalaiva tale yani e dua vei ira.

²⁹ Au na sega talega ni tabonaka tale na mataqu vei ira, ni'u sa sovaraka na Yaloqu ki na vale i Isireli, sa kaya na Turaga ko Jiova.”