Isikeli 32 - Ai Vola Tabu (Vakadewa Makawa Vakavoutaki 2021)

A Lele me Baleti Fero kei Ijipita

¹ Ia e nai katinikarua ni yabaki, e nai katinikarua ni vula, e nai matai ni siga ni vula, sa qai yaco vei au na vosa i Jiova, ka vaka:

² “Ko iko na luve ni tamata, mo taurivaka na lele e na vuku i Fero na tui Ijipita, ka kaya vua: “Ko sa raici iko me vaka e dua na laione kaukauwa ki na veimatanitu, ia ko sa vaka ga e dua na manumanu rerevaki e loma ni wasawasa; ko sa lako vata mai kei na nomu uciwai, ka sa vakayavalata na wai e na yavamu, ka vakavuvuya na nodra uciwai.

³ Sa kaya vakaoqo na Turaga ko Jiova: Koi au kei nai vavakoso tamata e vuqa keitou na vakalawataki iko e na noqu lawa; ka ra na yarataki iko mai e na noqu lawa ni yavi.

⁴ Au na qai viritaki iko ki vanua, ia ka'u na biuti iko sara ki na dela ni soso, ka lewa me ra mai ro e delamu na manumanu vuka kecega, ka vakamamautaka na manumanu ni vuravura taucoko e na lewemu.

⁵ Ia ka'u na virikotora na lewemu ki na dela ni veiulunivanua, ka vakasinaita na veibuca e na nomu yago mate;

⁶ au na vakasuasuataka talega na vanua ko sa qalo kina e na kemu dra, ka me yala ki na veiulunivanua; ia na veiuciwai ena sinai tu e na tikimu.

⁷ Ia ni'u na bokoci iko tani, ka'u na tabonaka na lomalagi, ka vakabutobutotaka na kena kalokalo; a mata-ni-siga ka'u na tabonaka e na o, a vula talega ena bureitaka na kena rarama.

⁸ A rarama kecega sa cila mai lomalagi ka'u na vakabutobutotaka vei iko, ka vakayacora na butobuto ki na nomu vanua, sa kaya na Turaga ko Jiova.

⁹ “Au na vakayalocataka talega na veimataqali e vuqa, ni'u na vakarogoya na nomu rusa ki na veimatanitu, ki na veivanua ko a sega ni kila.

¹⁰ Io, ka'u na vakidacalataki ira na veimataqali e vuqa e na vukumu, o ira talega na nodra tui era na rere vakalevu e na vukumu; ni'u na laveta cake na noqu i seleiwau e matadra; ka ra na dui sautaninini tikoga, na tamata yadua e na vukuna ga de mate, e na siga ko sa bale kina.

¹¹ Ni sa kaya vakaoqo na Turaga ko Jiova: Sai seleiwau i tui Papiloni ena ravuti iko.

¹² Au na vakabalei ira na kemu lewe vuqa e na nodra i seleiwau na qaqa, era nodra bati qaqa na veimatanitu ko ira kecega. Era na vakacacana na viavialevu ni Ijipita, ka ra na vakawabokotaki kecega na kena lewe vuqa sa tiko kina.

¹³ Au na vakarusa tani talega na kena manumanu kecega mai na bati ni wai levu; ia na yava ni tamata ena sega ni vakaocataka tale, ena sega talega na ququ ni manumanu me na vakaocataka.

¹⁴ Au na qai vakamakaretaka na nodra wai, ia na nodra uciwai ka'u na cakava me drodro me vaka na waiwai, sa kaya na Turaga ko Jiova.

¹⁵ E na gauna ka'u na vakalalataka kina na vanua ko Ijipita ka vakatakalitaka tani mai na vanua na ka sa sinai kina, io, e na gauna ka'u na yaviti ira kece kina era sa tiko kina, era na qai kila ni sai au ko Jiova.

¹⁶ Sai koya oqo na lele; ka me lagati vaka na vucu. Ko ira na goneyalewa ni veimatanitu me ra na lagata. Era na lelevaki Ijipita kei ira kecega na kena tamata, sa kaya na Turaga ko Jiova.

A Lele ni Lolosi me Baleti Ijipita

¹⁷ Ia e nai katinikarua ni yabaki, e nai katinikalima ni siga ni vula, sa qai yaco vei au na vosa i Jiova, ka vaka:

¹⁸ “Ko iko na luve ni tamata, mo tagicaki ira na lewe vuqa ni Ijipita, ka kauti ira sobu, ko Ijipita kei ira na goneyalewa ni veimatanitu rogo, ki na ruku i vuravura, kei ira era lako sobu ki na Qara.

¹⁹ “O sa lagilagi cake vei cei li? Mo lako sobu ga! Mo laki koto vata kei ira era sa sega ni cilivi!”

²⁰ Era na bale ga e na kedra maliwa era vakamatei e nai seleiwau. Sa soli ko koya ki nai seleiwau; yarataki koya yani kei ira kece na kena lewe vuqa era sa tiko kina.

²¹ Era na vosa vua e na vukudra ko ira na nodra qaqa, kei ira na nodra i to, mai na loma i Bulu, ka kaya: “Era sa lako sobu mai oqo, ka sa ra davo koto vakamalua, ko ira era sa sega ni cilivi, ko ira sa vakamatei e nai seleiwau.”

²² “Sa tiko mai kea ko Asiria kei na nona i soqosoqo, sa voliti koya na nodra i bulubulu, ko ira kece era vakamatei, era mate e nai seleiwau.

²³ Sa tu e na yasa ni qara na nodra i bulubulu. Ia na nona i soqosoqo sa ra koto volita na nona i bulubulu, ko ira oqo era vakamatei kece, era mate e nai seleiwau, ka ra sa vu ni taqaya levu e na vanua ni bula.

²⁴ “Sa tiko mai kea ko Ilama kei na kena lewe vuqa, ka ra koto volita na nona i bulubulu; ko ira kece era vakamatei, era mate e nai seleiwau, ka ra sa lako sobu ka sega ni cilivi ki na ruku i vuravura, ka ra sa vu ni taqaya levu e na vanua ni bula; ia sa nodra na veivakamaduataki kei ira vata era lako sobu ki na Qara.

²⁵ Era sa cakava na nona i davodavo e na kedra maliwa era vakamatei kei na nona i soqosoqo sa tu voliti koya na nona i bulubulu, ko ira kece era sega ni cilivi, sa ra vakamatei e nai seleiwau; ni ra sa vu ni taqaya levu e na vanua ni bula, ia sa nodra na veivakamaduataki kei ira vata era sa lako sobu ki nai keli; sa kotora ko koya e na kedra maliwa era vakamatei.

²⁶ “Sa tiko mai kea ko Meseki kei Tupali, kei na kedrau lewe vuqa; sa tu voliti rau na nodrau i bulubulu, ko ira kece era sega ni cilivi, sa ra vakamatei e nai seleiwau; ia era sa vu ni taqaya levu e na vanua ni bula.

²⁷ A ra na sega ni koto vata kei ira na qaqa, era sa bale vata kei ira sa sega ni cilivi era a lako sobu ki bulu kei na nodra i yaragi ni valu, ka ra kotora na nodra i seleiwau e ruku ni uludra, ia na nodra caka cala ena baleta na suidra, ia era sa vu ni taqaya levu vei ira na qaqa e na vanua ni bula.

²⁸ Io ko iko, ko na musuki e na kedra maliwa ko ira sa sega ni cili, ka ko na koto vata kei ira era vakamatei e nai seleiwau.

²⁹ “Sa tiko mai kea ko Itomi, ko ira na nodra tui, kei na kena turaga kecega, ko ira kei na nodra kaukauwa era sa koto vata kei ira era vakamatei e nai seleiwau; era na koto vata kei ira era sa sega ni cili, kei ira era sa lako sobu ki na Qara.

³⁰ “Sa ra tiko mai kea ko ira na tui mai na mata ni vualiku, ko ira kece, kei ira kece na kai Saitoni, era sa lako sobu vata kei ira era vakamatei; na taqaya levu sa vuna na nodra kaukauwa era sa qai maduataka; ka ra sa koto ka sega ni cili kei ira era vakamatei e nai seleiwau; ka sa nodra na veivakamaduataki kei ira vata era lako sobu ki na Qara.

³¹ “Ena raici ira ko Fero, ka na vakacegui mai e na vukudra na nona lewe vuqa era vakamatei e nai seleiwau—ko Fero kei ira kecega na nona mataivalu, sa kaya na Turaga ko Jiova.

³² Ni'u sa vakavuna na taqaya levu e na vanua ni bula; ia sa na vakotori vata ko koya e na kedra maliwa era sa sega ni cilivi era vakamatei e nai seleiwau—ko Fero kei na nona lewe vuqa kecega, sa kaya na Turaga ko Jiova.”