Isikeli 30 - Ai Vola Tabu (Vakadewa Makawa Vakavoutaki 2021)

Na Lele me Baleti Ijipita

¹ Sa yaco tale vei au na vosa i Jiova, ka vaka:

² “Ko iko na luve ni tamata, mo ia na parofisai, ka kaya, Sa kaya vakaoqo na Turaga ko Jiova: “Dou qolouvaka yani, ‘Ulei na siga ko ya!’

³ Ni sa voleka mai na siga, io, sa voleka mai na siga i Jiova; ena siga ni o loaloa, ka gauna butobuto e na veimatanitu.

⁴ Ia ena tau ki Ijipita nai seleiwau, kei na rarawa levu ena yacovi Eciopea, ni ra qai bale na moku mai Ijipita, ni ra kauti ira tani talega na kena lewe vuqa ka sa talaraki sobu na kena yavu.

⁵ Ko Eciopea, kei Futi, kei Libiya, kei ira kece era duikaikai, kei Kupi, kei ira na nodra i to na lewe-ni-vanua, era na qai bale vata kei ira e nai seleiwau.

⁶ “Sa kaya vakaoqo ko Jiova: Era na bale talega ko ira era totaki Ijipita, ia ena yali sobu na nona kaukauwa sa viavialevu kina; mai Mikitoli ka yala ki Saiini era na bale mai kina e nai seleiwau, sa kaya na Turaga ko Jiova.

⁷ Ena qai lala tu oqori e na maliwa ni veivanua lala, a nona veikoro talega ena qai tu vata kei na veikoro sa rusa.

⁸ A ra na kila ni sai au ko Jiova, ni'u sa tutuvaka na bukawaqa mai Ijipita, ka ni ra sa vakarusai kece na nona i to.

⁹ “E na siga ko ya era na lako yani mai vei au eso nai talaki e na waqa me vakarerei ira na kai Eciopea era tiko wele, ia ena tauvi ira na rarawa levu me vaka e na siga kei Ijipita; ka raica, sa lako tiko mai!

¹⁰ “Sa kaya vakaoqo na Turaga ko Jiova: “Au na muduka laivi talega na lewe vuqa mai Ijipita e na liga i Nepukanesa na tui Papiloni.

¹¹ O koya vata kei ira na nona tamata, na bati qaqa ni veimatanitu, era na kau mai me vakarusa na vanua; ka ra na ucuna na nodra i seleiwau me yaviti Ijipita, ka vakasinaita na vanua e na moku.

¹² Ia ka'u na vakadiva na uciwai, ka volitaka na vanua ki na ligadra na tamata ca; ia ka'u na vakacacana na vanua kei na ka kece sa tiko kina, e na ligadra na kai tani; koi au ko Jiova ka'u sa tukuna oqo.

¹³ “Sa kaya vakaoqo na Turaga ko Jiova: “Au na vakarusa talega na matakau, ka muduka tani na nodra veika lasu mai Memifisi; ia ena sega tale e dua na tui ni vanua ko Ijipita; au na vakatubura talega na rere e na vanua ko Ijipita.

¹⁴ Ia ka'u na vakalalataki Pacirosi, ka tutuvaka na bukawaqa mai Soani, ka ia na veicudruvi mai Tepisi.

¹⁵ Ka'u na sovaraka na noqu cudru ki Pelusumi, na vu ni nodra kaukauwa na kai Ijipita; ka muduka laivi na kena lewe vuqa ko Tepisi.

¹⁶ Au na tutuvaka talega na bukawaqa mai Ijipita; ena rarawa vakalevu ko Pelasiumi, ia ko Tepisi ena basubasuki, ka vakararawataki ko Memifisi e na veisiga.

¹⁷ O ira na cauravou ni Eveni kei Pi-piseci era na bale e nai seleiwau; ia na lewe ni veikoro oqo ena vakabobulataki.

¹⁸ Ia mai Tapanesi ena butobuto mai na siga, ni'u sa qai musuka mai kea na matanakilagi ni Ijipita, io, ena mudu mai vua na kena kaukauwa sa viavialevu; ia ko koya, ena tabonaki koya sara e dua na o, ko ira talega na luvena yalewa era na vakabobulataki.

¹⁹ Au na ia vakaoqo na veicudruvi mai Ijipita; ka ra na kila ni sai au ko Jiova.”

Na Cudru i Jiova vei Fero

²⁰ Ia e nai katinikadua ni yabaki, e nai matai ni vula, e nai kavitu ni siga ni vula, sa qai yaco vei au na vosa i Jiova, ka vaka:

²¹ “Ko iko na luve ni tamata, Au sa musuka na liga i Fero na tui Ijipita; ka raica, ena sega ni vivi me bula, se viviraki kina e dua na wa me vauci, me kaukauwa kina me taura tale nai seleiwau.

²² O koya sa kaya kina na Turaga ko Jiova, Raica, sai au na meca i Fero na tui Ijipita, ia ka'u na musuka ruarua na ligana, ko ya sa kaukauwa, ko ya talega sa ramusu; ia ka'u na vakalutuma tani mai na ligana nai seleiwau.

²³ Ia ka'u na dui vakasevi ira na kai Ijipita ki na veimatanitu, ka duibiubiuti ira ki na veivanua.

²⁴ Ia ka'u na vakaukauwataka na liga i tui Papiloni, ka solia na noqu i seleiwau ki na ligana; ia ka'u na musuka ga na liga i Fero, ena vutugu talega e matana e na vutugu ni tamata sa mavoa vakaca sara.

²⁵ Ia ka'u na vakaukauwataka na liga i tui Papiloni, ia na liga i Fero ena lutu sobu; ka ra na kila ni sai au ko Jiova, ni'u sa solia na noqu i seleiwau ki na liga ni tui Papiloni, ka sa dodoka ko koya ki na vanua ko Ijipita.

²⁶ Ia ka'u na dui vakasevi ira na kai Ijipita ki na veimatanitu, ka duibiubiuti ira ki na veivanua; ka ra na kila ni sai au ko Jiova.”