Isikeli 3 - Ai Vola Tabu (Vakadewa Makawa Vakavoutaki 2021)

¹ A sa kaya vei au ko koya, “Ko iko na Luve ni tamata, na ka ko sa kunea mo kania. Mo kania nai vola vivigi oqo, ka la'ki vosa vei ira na lewe-ni-vuvale i Isireli.”

² Au a qai dalaga, ka sa solia vei au ko koya nai vola vivigi me'u kania.

³ A sa kaya vei au ko koya, “Ko iko na luve ni tamata, mo ia mada na kana, ia mo vakamamautaka na ketemu e nai vola vivigi oqo ka'u sa solia vei iko.” Au a qai kania, ka sa kamikamica me vaka na oni e na gusuqu.

⁴ A sa kaya vei au ko koya, “Ko iko na luve ni tamata, mo lako yani vei ira na lewe-ni-vuvale i Isireli ka tukuna na noqu vosa vei ira.

⁵ Ni ko sa sega ni talai ki na matatamata sa duatani na nodra vosa se sa dredre ni cavuti, vei ira ga na lewe-ni-vuvale i Isireli—

⁶ sa segai vei ira na veimatanitu tani e vuqa sa duatani na nodra vosa ka dredre ni cavuti, ka ko sega ni kila rawa na nodra vosa. Ke'u sa talai iko vei ira, ke ra na vakarorogo ga vei iko, se segai?

⁷ Ia na vale i Isireli era na sega ni vakarorogo vei iko, ni ra na sega ni vakarorogo vei au; ni ra sa mataviavialevu ga ka yalokaukauwa ko ira kece e na vale i Isireli.

⁸ Raica, au sa cakava na matamu me qaqa ki na matadra, kei na yadremu me qaqa ki na yadredra.

⁹ Ia me vaka na taiamodi e qaqa ka malumalumu na qiwa, ka'u sa cakava na yadremu me vakakina. Kakua ni ko rerevaki ira, se taqayataka na matadra, ni ra sa lewe-ni-vuvale dautalaidredre ga.”

¹⁰ Sa kaya talega vei au ko koya, “Ko iko na luve ni tamata, na vosa kece ka'u na vosataka vei iko mo tugana ga ki lomamu, ka rogoca e daligamu.

¹¹ Ia mo lako, lako yani vei ira era vakabobulataki, vei ira na luvedra na kai nomu, ka vosa vei ira, ka tukuna vei ira, Sa kaya vakaoqo na Turaga ko Jiova; se ra na vakarorogo, se ra na kakua ga.”

¹² Sa qai laveti au cake na yalo, ia ka'u sa rogoca mai dakuqu e dua na rorogo levu, sa kaya: “Me vakavinavinakataki nai ukuuku i Jiova mai na nona yasana!”

¹³ Au a rogoca talega na carocaroba ni tabadratou na ka bula e veitaratarai, kei na rorogo ni yava sa vaka na yava ni qiqi, sa tu vata kei iratou, kei na dua na rorogo levu.

¹⁴ Ia na yalo, sa laveti au cake, ka kauti au yani, ia ka'u sa lako ka rarawa tu ka katakata na yaloqu; ia na liga i Jiova sa tiko vakaukauwa ga vei au.

¹⁵ Au a qai yaco vei ira era bobula mai Teli-apipi, era tiko mai na uciwai ko Kipa, ia ka'u a tiko e na yasana era sa tiko kina, ka'u a tiko mai kea ka bogi vitu ia ka'u sa kidacala tiko e na kedra maliwa.

Sa Lesi Isikeli ko Jiova me Nodra i Vakatawa na Isireli

¹⁶ Sa oti na bogi vitu, sa qai yaco vei au na vosa i Jiova, ka vaka:

¹⁷ “Ko iko na Luve ni tamata, ka'u sa lesi iko mo nodra i vakatawa na lewe-ni-vuvale i Isireli. Ia mo rogoca na vosa ni gusuqu, ka vakasalataki ira mai vei au.

¹⁸ Kevaka ka'u sa kaya vua na tamata ca, ‘Ko na mate vakaidina’, ka ko sa sega ni vakasalataki koya, se vakauqeta na tamata ca me biuta na nona sala ca, ka me vakabulai koya, ia ena mate ga na tamata ca ko ya e na nona caka cala; ia na nona dra ka'u na taroga vei iko.

¹⁹ Ia kevaka ko sa vakasalataka na tamata ca, ka sa sega ni lesu mai na nona ca, se na nona i tovo ca, ena mate ga ko koya e na nona caka cala; ia sa na sega ni baleti iko.

²⁰ Ia ni sa vuki tani na tamata yalododonu mai na nona i valavala dodonu, ka sa caka cala, ni'u sa tauca e matana na ka e tarabe kina, ena mate ko koya. Ni ko sa sega ni vakasalataki koya, ena mate ga e na nona i valavala ca, ia ena sega ni nanumi na nona i valavala dodonu sa cakava ko koya; ia na nona mate ka'u na taroga vei iko.

²¹ Ia kevaka ko sa vakasalataka na tamata yalododonu, me kakua ni valavala ca na tamata yalododonu, ka sa sega ni valavala ca, ena bula vakaidina ko koya, ka ni sa vakasalataki; o iko talega, ko sa sereka na yalomu.”

²² A sa tu vei au mai kea na liga i Jiova; ka sa kaya vei au ko koya, “Mo cavu tu mo lako yani ki na buca, ia ka'u na vosa vei iko mai kea.”

²³ Au sa qai cavu tu, ka lako yani ki na buca; ka raica, sa tu mai kina nai ukuuku i Jiova, me vaka nai ukuuku ka'u a raica mai na uciwai ko Kipa; ia ka'u sa bale vakatoboicu.

²⁴ A sa curumi au na yalo, ka sa vakaturi au e na yavaqu, a sa vosa vei au, ka kaya, “Mo la'ki sogolati iko e nomu loma ni vale.

²⁵ Ia ko iko, na luve ni tamata, raica, era na vauci iko e na dali, ka ra na vesuki iko kina, ia ko na sega ni curu rawa ki tautuba vei ira.

²⁶ Ia na yamemu ka'u na vakabita ki na loma ni gusumu e cake, mo galu kina, ka sega ni dauvunauci ira tiko, ni ra sa matatamata dautalaidredre.

²⁷ Ia ni'u sa vosa vei iko, ka'u na qai dolava na gusumu, ia ko na qai kaya vei ira, ‘Sa kaya vakaoqo na Turaga ko Jiova’. O koya sa rogoca, me rogoca sara; ia ko koya sa sega ni via rogoca, me kakua ga, ni ra sa matatamata dautalaidredre.