Isikeli 19 - Ai Vola Tabu (Vakadewa Makawa Vakavoutaki 2021)

A Lele e na Vukudra na Turaga ni Isireli

¹ Ia oqo ko iko, mo taurivaka na lele e na vukudra na turaga ni Isireli,

² ka kaya: Sa dua dina na laione yalewa na tinamu e na kedra maliwa na laione! Sa davo sobu e na kedra maliwa na luve ni laione, ka susuga na luvena.

³ Ka sa susuga e dua na luvena; ka sa tubu cake me laione e kaukauwa cake, ka sa vakavulici me toboka na kena; ka sa daukana tamata.

⁴ Era sa rogoca kina na veivanua; ka sa tobo e na nodra qara; ka ra sa kauti koya ni sa vesu tu ki na vanua ko Ijipita.

⁵ Ia ni sa raica na laione yalewa ni sa wawa tiko, ka sa yali na ka e nuitaka, sa qai kauta e dua tale na luvena dramidrami ka tagane, ka susugi koya me laione gone ka kaukauwa.

⁶ A sa veilakoyaki tu e na kedra maliwa na laione, ka sa tubu cake me laione kaukauwa cake, ka sa vakavulici me toboka na kena, ka sa daukana tamata ko koya.

⁷ Ka sa kunea ko koya na nodra vale vakaturaga sa lala tu, a sa vakalalataka na nodra veikoro; ka sa rusa na vanua, kei na ka kece sa tu kina, e na vuku ni rorogo ni nona tagi.

⁸ Sa qai mai vala kaya na veimatanitu mai na veiyasana mai na veiqali, ka ra ubi koya e na nodra lawa; ia sa tobo e na nodra qara.

⁹ A ra sa sogolati koya ni sa vesuki, ka kauti koya vei tui Papiloni; era kauti koya ki na dua na vale kaukauwa, me kakua ni rogo tale na domona e na veiulunivanua ni Isireli.

¹⁰ Na tinamu e sa vaka na vaini sa tei e na bati ni wai, sa vuavuai vinaka ka sa levu na drauna e na vuku ni levu ni wai.

¹¹ A sa vakatabana kaukauwa me nodra i titoko masei era ia na lewa; ka sa cecere vakaidina ko koya e loma ni tabanikau rugurugua, a sa rairai vakacecere ko koya ni sa vuqa na tabana.

¹² Ia sa cavuivuvutaki ko koya e na cudru, sa biu sobu ki na qele, ia na cagi mai na tokalau sa vakamalaitaka na vuana; sa raramusumusu na tabana kaukauwa ka sa malai; ka sa yavu e na bukawaqa.

¹³ Ia sa qai tei ko koya e na vanua lala, e na vanua mamaca ka daukaramaca.

¹⁴ A sa lako tani na bukawaqa mai na dua na basoga lailai ni tabana, a sa kama kina na vuana, ka sa qai sega kina na tabana kaukauwa me caka kina nai titoko masei me ia kina na lewa. Oqo e dua na lele, ka sa vakayagataki e na lele.