Isikeli 15 - Ai Vola Tabu (Vakadewa Makawa Vakavoutaki 2021)

Ko Jerusalemi, a Vuni Vaini Tawayaga

¹ A sa yaco vei au na vosa i Jiova, ka vaka:

² Ko iko na luve ni tamata, e yaga cake vakaevei na vuni vaini mai na kau tale eso— na taba ni vaini ka tiko maliwai ira na veivunikau mai veikau?

³ Sa kau beka mai kina e dua na tikina me yaga ki na dua na cakacaka? Se sa kau beka mai kina e dua na tikina mei vako me rube kina e dua nai yaya?

⁴ Raica, sa biu ga ki na bukawaqa me kena buka; sa kania na muana ruarua na bukawaqa, ia na tolona sa yavu. Me na yaga li e na dua na cakacaka?

⁵ Raica, ni sa taucoko, sa sega ni yaga ki na dua na cakacaka; ia ni sa kania na bukawaqa—sa yavu sobu, ka sa vuki me qilaiso— me na qai yaga vakacava ki na dua na cakacaka!

⁶ O koya oqo sa kaya kina na Turaga ko Jiova: Me vaka na kau mai na vaini e na maliwa ni veivunikau e veikau, ka'u a solia ki na bukawaqa me kena buka, ka'u na soli ira vakakina na kai Jerusalemi.

⁷ Ia ka'u na vaqaqataka na mataqu vei ira me ra ca. E dina ga ni ra na lako tani mai na bukawaqa, ia na bukawaqa ena kani ira tikoga; ka dou na kila kina ni sai au ko Jiova, ni'u sa vaqaqataka na mataqu vei ira me ra ca.

⁸ Ia ka'u na vakatawayagataka na vanua, ni ra sa dautalaidredre vakalevu, sa kaya na Turaga ko Jiova.