Isikeli 14 - Ai Vola Tabu (Vakadewa Makawa Vakavoutaki 2021)

Sa Cudruva na Kalou na Qaravi Kalou Lasu

¹ Sa qai lako mai vei au eso vei ira na qase ni Isireli, ka tiko e mataqu.

² A sa yaco vei au na vosa i Jiova, ka vaka:

³ “Ko iko na luve ni tamata, ko ira na tamata oqo era dui vakaduria na nodra matakau e na lomadra, ka ra dui tauca e matadra na nodra caka cala era tarabe kina. Me'u sa tarogi li vei ira oqo?

⁴ O koya oqo mo kaya kina vei ira, Sa kaya vakaoqo na Turaga ko Jiova: Na tamata yadua ni vale i Isireli sa vakaduria na nona matakau e na lomana, ka sa tauca e matana na nona caka cala e tarabe kina, ka sa lako vua na parofita— koi au ko Jiova ka'u na vosa yani vua ni sa lako mai kei na nona matakau e vuqa,

⁵ ka me'u taura na lomadra na vuvale i Isireli, ni ra sa yalovakatani vei au ko ira kecega e na vuku ni nodra matakau.

⁶ “O koya oqo mo kaya kina ki na vale i Isireli, Sa kaya vakaoqo na Turaga ko Jiova: Dou veivutuni ka biuta tani na nomudou matakau; ka mo dou vagolea tani na matamudou mai na nomudou ka vakasisila kecega.

⁷ Ko ira yadua e na vale i Isireli, kei ira na kai tani era tiko mai Isireli, sa na tawasei koya tani vei au, ka vakaduria na nona matakau e na lomana, ka sa tauca e matana na nona caka cala e tarabe kina, ka qai lako vua na parofita me tarogi au vua; koi au ko Jiova ka'u na vosa yani vua.

⁸ Ia ka'u na vaqaqataka na mataqu vua na tamata ko ya me sa ca, ka'u na vakayacori koya mei vakatakilakila kei nai bole, ka muduki koya tani mai vei ira na noqu tamata; ia dou na kila ni sai au ko Jiova.

⁹ Ia ke sa vakacalai na parofita ka sa cavuta e dua na vosa, sai au ko Jiova ka'u sa vakacala na parofita ko ya, ia ka'u na dodoka yani vua na ligaqu ka vakarusai koya tani mai vei ira na noqu tamata na Isireli.

¹⁰ A ra na dui colata nai sau ni nodra caka cala—na nona cudruvi o koya sa taroga vua kei na nona cudruvi na parofita e rau na tautauvata ga—

¹¹ me kakua tale ni lako sese kina vei au na vale i Isireli, se vakadukadukalitaki tale e na nodra talaidredre kecega, ia me ra yaco ga me noqu tamata, koi au talega, me'u yaco me nodra Kalou, sa kaya na Turaga ko Jiova.”

Ena Sega ni Vakavotaki ko Jerusalemi

¹² A sa yaco tale vei au na vosa i Jiova, ka vaka:

¹³ “Ko iko na luve ni tamata, ni sai valavala ca vei au e dua na vanua ni sa talaidredre sara, ka'u na qai dodoka yani kina na ligaqu, ka muduka na ka e bula kina, io, na madrai, ka vakayacora kina na viakana, ka muduka tani mai kina na tamata kei na manumanu,

¹⁴ ka veitalia ke ratou tiko kina na tamata tolutolu oqo, ko Noa, kei Taniela, kei Jope, ni ratou na dui vakabula ga na yalodratou e na nodratou yalododonu, sa kaya na Turaga ko Jiova.

¹⁵ “Kevaka ka'u sa lewa me lakova na vanua na manumanu ca ka ra vakacacana, me sa lala, ka sega na tamata me lako voli rawa kina e na vuku ni manumanu,

¹⁶ ka veitalia ke ratou tiko kina na tamata tolutolu oqo, me vaka ni'u sa bula, sa kaya na Turaga ko Jiova, eratou na sega ni vakabula na luvedratou tagane se na luvedratou yalewa. Ko iratou dina ga era na vakabulai, ia na vanua ena lala sara ga.

¹⁷ “Se kevaka ka'u na kauta mai ki na vanua nai seleiwau, ka kaya, Laiva nai seleiwau me lako voli yani ki na loma ni vanua, ka me'u muduka tani mai kina na tamata kei na manumanu,

¹⁸ ka veitalia ke ratou tiko kina na tamata tolutolu oqo, me vaka ni'u sa bula, sa kaya na Turaga ko Jiova, eratou na sega ni vakabula na luvedratou tagane se na luvedratou yalewa, ia ko iratou wale ga ena vakabulai.

¹⁹ “Se kevaka ka'u na vakayacora ki na vanua ko ya na mate dauveiveitauvi, ka sovaraka na noqu cudru e na mate, me'u muduka tani mai kina na tamata kei na manumanu;

²⁰ ke ratou tiko kina ko Noa, kei Taniela, kei Jope, me vaka ni'u sa bula, sa kaya na Turaga ko Jiova, eratou na sega ni vakabula e dua na luvedratou tagane se dua na luvedratou yalewa. Eratou na vakabulai iratou wale ga e na nodratou yalododonu.

²¹ “Ni sa kaya vakaoqo na Turaga ko Jiova: Io ena qai levu cake sara ni'u sa vakauta ki Jerusalemi na noqu cakacaka ni veilewai e va, nai seleiwau, kei na viakana, kei na manumanu ca, kei na mate dauveiveitauvi, me'u muduka tani mai kina na tamata kei na manumanu!

²² Ia ka raica, ena vo tiko kina eso era na kau tani mai, na gonetagane kei na goneyalewa; raica, era na lako mai kivei kemudou, ia dou na raica na nodra i tovo kei na nodra i valavala, dou na qai vakacegui e na vuku ni ca ka'u sa vakayacora ki Jerusalemi, kei na ka kece ka'u sa vakayacora kina.

²³ Era na vakacegui kemudou, ni dou sa raica na nodra i tovo kei na nodra i valavala; dou na qai kila ni'u sa sega ni cakava wale na ka kece ka'u sa cakava kina, sa kaya na Turaga ko Jiova.”