Isikeli 13 - Ai Vola Tabu (Vakadewa Makawa Vakavoutaki 2021)

Era sa Vunauci na Parofita Lasulasu

¹ A sa yaco vei au na vosa i Jiova, ka vaka:

² “Ko iko na luve ni tamata, mo parofisaitaka na ca vei ira na parofita i Isireli era ia na parofisai, ia mo kaya vei ira era ia na parofisai sa vu ga mai lomadra, ‘Dou rogoca na vosa i Jiova!’

³ Sa kaya vakaoqo na Turaga ko Jiova, Ena ca ko ira na parofita lialia era muria na yalodra, ka segai na ka era raica!

⁴ Era sa vaka na jekeli e na vanua rusa ko ira na nomu parofita, i Isireli.

⁵ Dou a sega ni cabe cake ki na tiki ni bai e basuki, se viria na nodra bai na vale i Isireli me ra tu rawa ni sa ia nai valu e na siga i Jiova.

⁶ Era sa raica na ka wale kei na vosa mana lasu, ka vaka, ‘Sa kaya ko Jiova’, e na gauna e sega ni talai ira kina ko Jiova, ia era sa daunamaki koya ga me na vakayacora na nodra vosa.

⁷ Sa sega beka ni dou raica na raivotu lasu ka cavuta na vosamana lasu, e na gauna dou dautukuna kina vakaoqo, ‘Sa kaya ko Jiova’, ia ka'u se sega mada ni se bau vosa kina?”

⁸ O koya oqo sa kaya kina vakaoqo na Turaga ko Jiova: “Me vaka ni dou sa cavuta nai tukutuku lasu, ka raica na ka lasu, au sa saqati kemudou, sa kaya na Turaga ko Jiova.

⁹ Na ligaqu ena veisaqasaqa kei ira na parofita era sa raica na ka lasu, ka vosataka na vosamana lasu. Era na sega ni tiko e na nodra i soqosoqo na noqu tamata, era na sega talega ni volai e nai vola ni vuvale i Isireli, era na sega talega ni curu ki na nodra vanua na Isireli; ia dou na kila ni sai au na Turaga ko Jiova.

¹⁰ E na vuku ni ka oqo, io, ni ra sa vakacalai ira na noqu tamata, ka kaya, ‘Sa da tiko vakacegu’, ka sa sega na vakacegu; ia sa viria na bai vatu e dua, ka raica, eso tani era sa boroya e nai boro ca.

¹¹ Mo kaya vei ira era sa boroya e nai boro ca ni na bale ga. Ena tau bi mai na uca; ia koi kemudou, na uca-cevata ka matailelevu, dou na tau mai, ka dua na cava levu ena basuraka.

¹² Raica, ni sa bale mai na bai vatu, ena sega beka ni kainaki vei kemudou, Sa evei li nai boro dou a boroya kina?

¹³ O koya sa vosa kina vakaoqo na Turaga ko Jiova: Au na basuraka e na cava levu e na noqu cudru, ia ena yaco mai e na noqu lesa na uca tau bi, kei na uca-cevata ka mata lelevu e na noqu cudru levu me kenai vakaoti.

¹⁴ Ia ka'u na basuraka sobu na bai vatu dou sa boroya e nai boro ca, ka biuta sobu ki na qele, na kena yavu talega ena vakarairaitaki, ena bale sara ga, dou na vakaoti vata kaya talega; ia dou na qai kila ni sai au ko Jiova.

¹⁵ Au na vakayacora vakaoqo na noqu cudru ki na bai vatu, vei ira talega era boroya e nai boro ca, ka'u na kaya vei kemudou, A bai vatu sa yali, ka sa yali talega ko ira era boroya—

¹⁶ ko ira na parofita ni Isireli ka ra parofisaitaki Jerusalemi ka raica na kena raivotu ni vakacegu, e na gauna sa sega tu kina na vakacegu, sa kaya na Turaga ko Jiova.

¹⁷ “Ia ko iko, na luve ni tamata, mo vakaukauwataka na matamu vei ira na goneyalewa ni kai nomu, ko ira era sa parofisai ga mai na nodra dui vakanananu; ia mo parofisaitaka na ca vei ira,

¹⁸ ka kaya, Sa kaya vakaoqo na Turaga ko Jiova, Ena ca ko ira na yalewa era sa dauvauca nai lokoloko ki na duruduru-ni-liga kecega, ka cakava nai sala ni ulu vei ira nai tabayalewa kecega me vakasasa yalo kina! Mo dou vakasava li na yalodra na noqu tamata, ia dou na vakabula beka na yalodra me nomudou?

¹⁹ Dou sa vosavakacacataki au e na kedra maliwa na noqu tamata me nomudou kina na barile eso e na qeteqete ni ligamudou ka so na kemudou tiki ni madrai, ka dou sa vakamatea eso na yalo sa sega ni dodonu me mate, ka vakabula eso na yalo sa sega ni dodonu me bula, ni dou sa lasutaki ira na noqu tamata, ko ira sa vakarorogo ki na ka lasu.

²⁰ “O koya oqo sa kaya kina na Turaga ko Jiova: Raica, au sa cata na nomudou vau ni caka mana dou sa dauvakasasa yalo kina me vaka na tudaitaki manumanu vuka, ia ka'u na dresulaka tani mai na ligamudou, ka'u na vakabula na yalo dou sa tudaitaka me ra sereki, na yalo ka ra sa vaka na manumanu vuka.

²¹ Au na dresuka talega na nomudou i ubi, ka vakabulai ira na noqu tamata mai na ligamudou, ka ra na sega ni tiko tale e na ligamudou me ra nomudou i toki, ka dou na kila ni sai au ko Jiova.

²² E na vuku ni nomudou a vakararawataka na lomana na yalododonu e na nomudou lasu, ia koi au ka'u a sega ni vakararawataka, ka dou sa vakaukauwataka ga na ligana na tamata ca, me kakua ni lesu mai ko koya mai na nona i valavala ca, ni dou sa yalataka vua na bula,

²³ e na ka oqo dou na sega tale kina ni raica na raivotu lasu se cakava na cakacaka mana lasu. Au na kaliraki ira na noqu tamata mai na ligamudou. Dou na qai kila kina ni sai au ko Jiova.”