Iperiu 7 - Ai Vola Tabu (Vakadewa Makawa Vakavoutaki 2021)

Ko Melikiseteki na Bete

¹ Ia “ko Melikiseteki oqo, sa tui Selemi, a bete ni Kalou sa Cecere Sara, sa tavaki Eparaama ni sa tale mai na nona mokuti ira na tui, a sa vosavakalougatataki koya”;

² sa solia talega vei koya ko Eparaama “nai katini ni ka kecega.” Nai balebale ni yacana na “Tui ni caka dodonu”; ka o koya talega na Tui Selemi, a kenai balebale, na Tui ni veivakacegui.

³ E sega ni tukuni na tamana, se na tinana, se na nona kawa, ka sa sega ni vakatekivu na nona gauna, se oti na nona bula, ia sa vakataka ga na Luve ni Kalou ko koya, ka sa bete tikoga ka sega ni mudu.

⁴ Dou vakasamataka na kena uasivi na tamata oqo, ni sa solia vei koya ko Eparaama na turaga qase nai katini ni kamunaga sa tokitaka!

⁵ A sa dina vei ira na luve i Livai era sa bete, ni sa vakaroti vei ira e na vunau, me ra vakaisigana mai vei ira na tamata, io, mai vei ira na wekadra, ia sa dina ga ni ra sa lako mai na kawa i Eparaama.

⁶ Ia ko koya oqo sa vakaisigana mai vei Eparaama, a sa sega ni wili vata kei na nona kawa, a sa vosavakalougatataki koya ka cavuti vua na vosa ni yalayala.

⁷ Ia sa sega ni vakatitiqataki rawa oqo, ni sa vosavakalougatataki koya sa uasivi sobu ko koya sa uasivi cake vei rau.

⁸ Ia eke era sa taura nai sigana ko ira na tamata era sa dui mate; ia mai kea sa tukuni e dua ni sa bula tiko.

⁹ Io, kevaka e tara me'u vosa vakakina, ko Livai talega, o koya sa dautaura nai sigana, erau sa solia kei Eparaama nai sigana;

¹⁰ ni se bera ni sucu ko koya ni sa tavaki Melikiseteki ko tamana.

E Dua Tale na Bete, Me Vakataki Melikiseteki

¹¹ Ia kevaka sa rawa me ra vinaka sara e na vuku ni cakacaka ni bete vaka-Livai—ni sa tukuni vata kaya na vunau vei ira na tamata—ena yaga vakacava me tubu e dua tale na bete me vaka nai valavala i Melikiseteki, ka me sega ni vakatokai me vaka nai valavala i Eroni?

¹² Ia ni sa qai vakaisosomitaki na bete, sa dodonu sara me vakaisosomitaki talega na vunau.

¹³ Ia ko koya sa tukuni vakaoqo, sa duatani na nona yavusa, sa sega mai kina e dua na tamata sa qarava nai cabocabo-ni-soro.

¹⁴ Ni sa macala sara sa tubu mai vei ira na Juta na noda Turaga; ia na yavusa ko ya e sega ni vosa kina ko Mosese me ra bete.

E Dua Tale na Bete Vakataki Melikiseteki

¹⁵ Ia sa macala vakalevu sara; ni sa tubu e duatani tale na bete me vakataki Melikiseteki,

¹⁶ o koya ka lesi, ka sega ni vaka na vunau vakavuravura, ko ya ga me vaka na kena mana ni bula tawa mudu.

¹⁷ Ni sa tukuna ko koya, “O iko na bete tawa mudu, me vaka nai valavala i Melikiseteki.”

¹⁸ Sa tiko, e na dua na yasana, na muduki ni vunau sa liu taumada ni sa malumalumu ka sega ni yaga

¹⁹ (ni sa sega ni vakataucokotaki me vinaka sara e dua na ka e na vuku ni vunau); ka sa tiko, e na yasana kadua, na vakatututaki ni nuinui sa vinaka cake, o koya eda sa toro voleka kina vua na Kalou.

²⁰ Ka ni sa vakadeitaki oqo e na bubului; ni ko ira eso sa lesi me bete era sa sega ni bubului,

²¹ ia ko koya oqo sa yaco me bete e na bubului, e na vuku i koya sa kaya vua, “Sa bubului ko Jiova ka na sega ni veivutuni, ‘O iko na bete tawa mudu.’ ”

²² A ka oqo sa vakayacori Jisu kina me i vakadei ni veiyalayalati sa uasivi cake.

²³ Ia ko ira oqori era lesi me ra bete, era sa lewe vuqa, ni sa tarova na nodra tiko na mate;

²⁴ ia ko koya oqo, sa sega ni vakaisosomitaki na nona cakacaka vakabete, ni sa tiko ga ka tawa mudu.

²⁵ O koya oqo sa rawarawa kina vua me vakabulai ira sara era sa lako mai vua na Kalou e na vukuna, ni sa bula tikoga ko koya me masulaki ira.

²⁶ Ni sa dodonu me noda e dua na bete sa vakaoqo, sa yalosavasava, sa yalovinaka, sa tawa ca, sa tawase tani mai vei ira na tamata i valavala ca, a sa caka me uasivi cake kei lomalagi e na nona cecere.

²⁷ O koya e sega kina ni yaga e na veisiga, me vakacabora taumada nai soro ni nona i valavala ca, ia e muri nai soro ni nodra i valavala ca na tamata, me vakataki ira na bete levu; ni sa cakava oqo vakadua ga ko koya, ni sa vakacabori koya.

²⁸ Ia sa buli e na vunau na tamata era sa malumalumu me bete levu; ia na Luve ni Kalou sa caka me vinaka sara ka sega ni mudu e na bubului sa tarava na vunau.