Iperiu 5 - Ai Vola Tabu (Vakadewa Makawa Vakavoutaki 2021)

¹ Ia na bete levu yadua sa digitaki mai vei ira na tamata, sa lesi vua na Kalou e na vukudra na tamata, me vakacaboi madrali kei nai soro e na vuku ni valavala ca.

² Sa rawarawa vua me lomani ira era sa sesewa ka cala, ni sa tiko talega vei koya na malumalumu.

³ Ia e na vuku ni ka oqo, me vaka e na vukudra na tamata sa vaka talega kina e na vukuna, sa dodonu me vakacaboisoro ko koya e na vuku ni valavala ca.

⁴ A sa sega e dua sa taura vakai koya na cakacaka vakarokoroko oqo, o koya ga sa lesi koya na Kalou, me vakataki Eroni.

⁵ Sa vaka talega kina na Karisito sa sega ni dokai koya me via bete levu vakataki koya, ia e na vukuna ga sa kaya vua, “O iko na Luvequ, au sa vakatuburi iko e na siga oqo”;

⁶ me vaka talega na nona vosa e na tikina kadua, “A bete tawa mudu ko iko, me vaka nai valavala i Melikiseteki.”

⁷ O koya oqo e na veisiga ni nona tiko vakatamata, ni sa cabora oti na kerekere, kei na masumasu, kei na tagi vakararawa, ni sa vakawai na matana, vua sa rawata me vakabulai koya mai na mate, a sa rogoci ga e na ka sa rerevaka ko koya;

⁸ ia sa dina ga sa Luvena ko koya, a sa vakatavulici ga e nai valavala ni talairawarawa, ni sa vosota tiko na ka rarawa;

⁹ ia ni sa vakarautaki oti, sa yaco me vu ni bula tawa mudu vei ira kecega sa talairawarawa vua;

¹⁰ sa kaciva na Kalou me bete levu me vaka nai valavala i Melikiseteki.

Me Kakua na Suka ki Muri

¹¹ E vuqa na ka sa vo me keitou tukuna ka sa dredre ga me vakamacalataki, ni sa sega vei kemudou na daliga rogorogo.

¹² Ni sa dodonu mo dou rawata makawa mo dou i vakavuvuli, ia dou sa gadreva ga e dua me vakatavulici kemudou tale e nai vakatekivu ni vakavuvuli me baleta na vosa ni Kalou. Dou sa gadreva ga na wai-ni-sucu, ka segai na kakana dina,

¹³ ni ko ira era bula voli e na sucu, ni ra se gone dramidrami, era se sega ni kila vinaka nai vakavuvuli ni yalododonu.

¹⁴ Ia sa yaga ga vei ira sa matua na kakana dina, o ira era sa vakarautaka na yalodra e nai valavala, me ra vakalewa rawa na ka, se vinaka se ca.