Iperiu 4 - Ai Vola Tabu (Vakadewa Makawa Vakavoutaki 2021)

Eda na Vakacegu Vata kei na Kalou

¹ O koya oqo me da qai rere, ni sa soli tu na vosa ni yalayala me da curu ki na nona i vakavakacegu, de sega beka ni yaco dina kina koi kemudou eso.

² Ni sa tukuni mai vei keda e dua na ka vinaka, me vaka talega vei ira; ia ka sega ni yaga vei ira na vosa era sa rogoca, ni ra sa sega ni duavata e na vakabauta kei ira era sa vakarogoca.

³ Ni da sa qai curu ki nai vakavakacegu, koi keda sa vakabauta, me vaka sa vosa kina ko koya, “Me vaka ka'u a bubului kina e na noqu cudru, ‘Era na sega sara ni curu ki na noqu i vakavakacegu,’ ” ka dina ga ni sa oti na nona cakacaka ni sa tauyavutaki oti ko vuravura.

⁴ Ni sa dua na tikina sa vosataka vakaoqo ko koya nai kavitu ni siga, “A sa vakacegu na Kalou mai na nona cakacaka kecega e na kenai kavitu ni siga.”

⁵ Ia oqo talega, “Era na sega sara ni curu ki na noqu i vakavakacegu.”

⁶ Ia ni sa qai macala me curu kina eso, ia ko ira ka tukuni taumada vei ira na ka vinaka era sa sega ni curu kina, e na vuku ni nodra talaidredre,

⁷ a sa qai lokuca tale e dua na siga ko koya, ka sa tukuna ko Tevita e na dua na gauna e muri, ka kaya, “E na siga oqo,” me vaka sa kainaki, “E na siga oqo, kevaka dou sa rogoca na domona, kakua ni vakaukauwataka na yalomudou.”

⁸ Io, kevaka sa solia vei ira nai vakavakacegu ko Josua, ena sega ni tukuna tale ko koya e dua tale na siga.

⁹ O koya oqo sa vo tiko e dua nai vakavakacegu me nodra na tamata ni Kalou.

¹⁰ Ia ko koya sa curu ki na nona i vakavakacegu, sa vakacegu mai na nona cakacaka, me vaka sa vakacegu na Kalou mai na nona.

¹¹ O koya oqo me da qai gumatua sara me da curu ki nai vakavakacegu ko ya, de bale e dua na tamata ni sa talaidredre vakakina.

¹² Ni sa bula na vosa ni Kalou, ka kaukauwa, ka gata vakalevu ka mucu ga nai seleiwau batirua, ka suaka me wasea rua kina na lomada kei na yaloda, kei na noda i sema kei na uto ni sui, ka sa vakalewa sara na nanuma kei nai naki ni yaloda.

¹³ A sa sega talega e dua na ka e sega ni rairai e matana, ia sa luvawale ga na ka kecega, ka vakarairaitaki sara, e na mata i koya eda na vakatusai keda vua.

Ko Jisu na Bete Levu Cecere

¹⁴ Ia me vaka ni sa dua na noda bete levu cecere, o koya ka curu ki lomalagi, ko Jisu na Luve ni Kalou, me da taura matua kina na noda vakatutusa.

¹⁵ Ni sa sega ni noda bete levu ko koya sa sega ni daulomani keda ni da sa malumalumu, ia ko koya ga ka sa dauveretaki me vakataki keda e na ka kecega, ia sa sega ga na nona cala.

¹⁶ E na vuku ni ka oqori, me da toro doudou kina ki nai tikotiko-vakaturaga ni yalololoma, me da ciqoma kina na yaloveivosoti, ka me da lomani talega ka vukei e na gauna e gadrevi kina.