Iperiu 13 - Ai Vola Tabu (Vakadewa Makawa Vakavoutaki 2021)

Na Sala me da Vinaka Kina Vua na Kalou

¹ Me tiko ga na veilomani vakaveitacini.

² Kakua ni guilecava na vakani ira na vulagi, ni sa so era a vakania na agilosi eso ka lecava ga.

³ Mo dou nanumi ira era sa vesu tu; me vaka dou sa vesu vata, kei ira talega era sa vakaloloma, me vaka dou sa vakayago talega.

⁴ Sa kilikili kei ira na tamata kecega na vakawati, kei nai mocemoce ni vakamau me savasava, ni ko ira na dauveidauci kei ira na dauveibutakoci ena lewai ira na Kalou.

⁵ Mo dou kakua ni daukocova nai lavo, ia dou lomavinaka e na ka sa tu vei kemudou; ni sa kaya ko koya, “Au na sega sara ni biuti iko, se vakalaivi iko.”

⁶ E na vuku ni ka oqo eda sa doudou kina me kaya, “Sa noqu dauniveivuke ko Jiova; ia ka'u na sega ni rere. A cava na ka ena kitaka vei au na tamata?”

⁷ Dou nanumi ira era a liutaki kemudou, era a tukuna vei kemudou na vosa ni Kalou; vakadamurimuria na nodra vakabauta, ka nanuma nai cavacava ni nodra i valavala.

⁸ Sai koyakoya tikoga ko Jisu Karisito, e na siga sa oti, kei na siga edaidai, kei na veisiga e muri.

⁹ Dou kakua ni veikauyaki e nai vakavuvuli e vuqa sa lako vakatani. Ni sa yaga me vakataudeitaki na yalo e na loloma sa soli, ia me kakua ga e na kakana, sa sega ni yaga vei ira era sa oga kina.

¹⁰ Sa dua na noda i cabocabo-ni-soro, sa sega ni dodonu me kana kina ko ira sa qarava na vale tabu.

¹¹ Ni sa vakamai e nai bili ni koro na yago ni manumanu oqori, sa kauta na kedra dra ki na loqi tabu ko koya na bete levu mei soro ni valavala ca.

¹² O koya ga oqo sa mate kina ko Jisu e taudaku ni matamata-ni-koro, me vakasavasavataki ira na tamata e na nona dra.

¹³ E na vuku ni ka oqo me da lako kina kivei koya ki nai bili, ka vosota vata kaya na veivakalialiai.

¹⁴ Ni sa sega na noda koro eke me da tiko vakadua kina, ia eda sa vakasaqara ga e dua ena muri mai.

¹⁵ Ia ko koya oqo me da qai vakacabora tikoga nai madrali ni vakavinavinaka vua na Kalou e na vukuna, oqori na vua ni tebenigusuda, ni da tusanaka na yacana.

¹⁶ Kakua talega ni guilecava na caka vinaka kei na dausoli-ka, ni sa vinakata sara na Kalou nai madrali vakaoqo.

¹⁷ Dou talairawarawa vei ira sa liutaki kemudou, ka mo dou vakamalumalumutaki kemudou, ni ra sa yadrava na yalomudou, me vakataki ira era na tukuni ira kina. Me ra kitaka ga oqo e na marau ka sega e na vutugu—ni sa sega ni yaga vei kemudou oqori.

¹⁸ Dou masulaki keitou; ni keitou sa dinata ni sa vinaka na neitou lewa-e-loma, ka keitou sa vinakata mei valavala dodonu e na ka kecega.

¹⁹ Ia ka'u sa vakamamasu me caka ga na ka oqo, me'u vakatotolotaki yani kina vei kemudou.

Na Masu ni Veivakalougatataki

²⁰ Ia na Kalou ni veivakacegui, o koya ka kauta tale mai na mate na noda Turaga ko Jisu, na nodra i Vakatawa cecere na sipi, e na vuku ni dra sa ia kina na veiyalayalati tawa mudu,

²¹ me vakavinakataki kemudou mada ko koya e nai valavala vinaka kecega mo dou cakava na nona lewa, ka me cakava ko koya e na lomada na ka sa vinaka vua, e na vuku i Jisu Karisito, me ia vei koya na vakarokoroko ka sega ni mudu. Emeni.

Ai Tinitini

²² Ia ka'u sa masuti kemudou, na veiwekani, mo dou vosota na vosa ni veivakadreti, ni'u sa vola vei kemudou nai vola, e na vosa e vica walega.

²³ Dou kila, sa sereki tale na wekada ko Timoci; kevaka sa tadu kusarawa mai ko koya, keirau na raici kemudou vata kaya.

²⁴ Au sa loloma yani vei ira kece sa liutaki kemudou, kei ira kecega era sa lotu. Sa loloma yani vei kemudou ko ira mai Itali.

²⁵ Me tiko vei kemudou kecega na loloma. Emeni.