Iperiu 11 - Ai Vola Tabu (Vakadewa Makawa Vakavoutaki 2021)

Na Vakabauta

¹ Ia na vakabauta sa vaka ni sa vakayacori na veika sa vakanuinuitaki, e vaka ni sa vakaraitaki na veika sa tawa kune.

² Ni sa ka oqo sa rogo vinaka kina eliu ko ira na qase.

³ Na vakabauta eda sa kila kina ni sa ia na veibuli e na vosa ni Kalou, ia sa sega ni caka na veika sa rairai mai e na veika sa kune tiko.

⁴ Ni sa vakabauta sa vakacabora ko Epeli nai soro sa vinaka vua na Kalou ka ca na nei Keni, ka sa rawata kina nai vakadinadina ni sa yalododonu, ni sa vakatakila na Kalou ni sa vinakata na nona i madrali. Ia e na vuku ni nona vakabauta, sa vosa tikoga kina ko koya ni sa mate tu.

⁵ Ni sa vakabauta sa kau yani kina ko Inoke ka sega ni mate; a ra “sa sega ni kunei koya, ni sa kauti koya yani na Kalou.” Ia ni se bera ni kau yani, sa tu ga vua nai vakadinadina “ni sa vinakati koya na Kalou.”

⁶ Ia kevaka sa sega na vakabauta, sa dredre sara me da vinakati, ni o koya sa torova na Kalou e dodonu me vakabauta ni sa bula ko koya, ka sa saumi ira talega era sa dauvakasaqarai koya.

⁷ Ni sa vakabauta sa rere kina ko Noa, ni sa vakasalataka oti na Kalou e na vuku ni veika e se bera ni rairai mai, a sa taya e dua na waqa ko koya me vakabulai ira kina na nona lewe-ni-vuvale, E na ka oqo, a sa lewai ira kina na kai vuravura, ka yaco mei taukei ni veivakadonui sa yaco e na vakabauta.

Na Vakabauta i Eparaama

⁸ Ni sa vakabauta sa talairawarawa kina ko Eparaama, ni sa kacivi me lako ki na vanua ka me na qai soli vua me taukena; ka sa lako yani, ia sa sega ni kila na vanua sa lako kina.

⁹ Ni sa vakabauta sa laki bula voli kina e na vanua ka yalataki, me vaka ni sa vanua vulagi, ka tiko walega e na veivale laca, ko Aisake talega kei Jekope, eratou taukena vata e muri na ka ko ya ka yalataki.

¹⁰ Ni sa nuitaka ko koya na koro sa tiko na kena yavu, ka droinitaka na Kalou ka tara.

¹¹ Ni sa vakabauta sa vakaukauwataki kina ko Sera me kunekunetaka na kawa, ka sa vakasucu gone ni sa oti na kena gauna, ni sa nanuma ga sa yalodina ko koya ka yalataka.

¹² O koya sa tubu kina mai vua e lewe dua na tagane, o koya ka sa qase sara, “e lewe vuqa me vaka na veikalokalo ni lomalagi, ka vaka talega na nuku mai matasawa e sega ni wili rawa.”

¹³ Era sa mate e na vakabauta ko ira kecega oqo ka ra a sega ni se ciqoma na veika ka yalataki, ia era sa raica ga ka rekitaka, ka tukuni ira ni ra a tiko vulagi ga ka veilakoyaki voli e vuravura.

¹⁴ Ia ko ira sa vosa vakaoqo era sa vakatakila sara ni ra sa vakasaqara tiko na vanua me nodra.

¹⁵ E dina ga, kevaka era sa nanuma na vanua ko ya era sa biuta oti mai, sa rawarawa ga me ra lesu tale kina.

¹⁶ Ia era sa qai guta sara e dua na vanua sa vinaka cake, ko ya, sa vakalomalagi. O koya ga oqo e sega kina ni madua na Kalou me vakatokai me nodra Kalou, ni sa tara ko koya e dua na koro me nodra.

¹⁷ E na vuku ni vakabauta sa vakacabori Aisake kina ko Eparaama, ni sa vakatovolei, ia ko koya ka tukuni kina na yalayala, ka sa tu vakarau me vakacabori koya na luvena e dua bauga,

¹⁸ o koya ka sa kainaki e na vukuna eliu, “Mai na kawa i Aisake ena vakatokayacataki kina na nomu kawa.”

¹⁹ Ni sa vakadinata ko koya sa rawa vua na Kalou me vakabulai koya tale mai na mate—ni dusimaki vakaiyaloyalo, ka sa ciqomi koya lesu vakakina.

²⁰ E na vuku ni vakabauta sa vosavakalougatataki Jekope kei Iso kina ko Aisake e na veika sa tu ki liu.

²¹ E na vuku ni vakabauta sa vosavakalougatataki rau kina na luve i Josefa ko Jekope, ni sa voleka ni mate, ni sa cuva sobu ka masu e na dela ni nona i titoko.

²² E na vuku ni vakabauta sa tukuna kina ko Josefa, ni sa voleka ni mate, ni ra na lako yani ko ira na Isireli, ka sa tataunaka na suina.

Na Vakabauta i Mosese

²³ E na vuku ni vakabauta sa vunitaki Mosese kina me vula tolu koi rau na nona qase, ni sa sucu ko koya, ni rau sa raica sa matavinaka na gone, ka rau sa sega ni rerevaka nai vakaro ni tui.

²⁴ E na vuku ni vakabauta sa bese kina ko Mosese, ni sa qai tamata bula mai, me vakatokai me luvena na luve i Fero yalewa,

²⁵ ka sa digitaka ga me wasea vata na veivakacacani kei ira na tamata ni Kalou ka cata na kena la'ki marautaki nai valavala ca e na siga eso.

²⁶ A sa vakadinata ni sai yau levu cake sara me vakalialiai e na vuku i Karisito ka lailai nai yau mai Ijipita, ka ni sa vakanamata ga ki na kenai sau sa wawa mai liu.

²⁷ E na vuku ni vakabauta sa biuti Ijipita kina ko koya, ka sega ni rerevaka na cudru ni tui; ni sa gumatua me vaka sa raici koya sa sega ni raici.

²⁸ E na vuku ni vakabauta sa vakayacora kina ko koya na Lako-sivia kei na kureitaki ni dra, me kakua kina ni tarai ira ko koya sa dauvakamatei ira na ulumatua.

Na Nodra Vakabauta Eso na Luve i Isireli

²⁹ E na vuku ni vakabauta era sa lako kina e loma ni Wasa Damudamu me vaka sa vanua mamaca, ia ni sa vakatovolea ko ira na kai Ijipita me ra bau vakakina, era sa luvu.

³⁰ E na vuku ni vakabauta sa bale kina na bai mai Jeriko, ni sa buku na druadrua ka bogi vitu.

³¹ E na vuku ni vakabauta sa sega kina ni rusa vata kei ira sa sega ni vakabauta ko Reapi, na yalewa dautagane, baleta ni a ciqomi rau ka vakacegui rau na yamata.

³² Ia a cava tale me'u kaya? Ni sa sega na gauna me'u tukuna kina na ka me baleti Kitione, kei Baraki, kei Samisoni, kei Jefica, kei Tevita, kei Samuela, kei ira na parofita—

³³ ko ira, e na vuku ni vakabauta, era sa vakamalumalumutaka na matanitu eso, era sa cakava na ka e dodonu, era sa rawata me nodra na veika ka yalataki, era sa tabonaka na gusu ni laione,

³⁴ era sa bokoca na bukawaqa rerevaki, era sa bula mai nai seleiwau, era sa vakaukauwataki tale ni ra sa malumalumu, era sa qaqa e nai valu, era vakasavi ira na mataivalu ni kai tani.

³⁵ Era sa ciqoma lesu tale ko ira na yalewa eso na wekadra ka ra sa tucake tale mai na mate. Eso tale era a vakararawataki vakalevu, ka ra besetaka ga me ra sereki, me rawa kina ni ra tucake tale mai na mate ki na dua na bula e vinaka cake.

³⁶ Era sa vakatovolei eso e na veivakalialiai kei na vakanakuitataki, kei na vesu talega kei na biu ki na valeniveivesu.

³⁷ Era a lauviri e na vatu, era a varomusuki rua, era a dauveretaki, era a vakamatei e nai seleiwau. Era a veilakoyaki voli ka sa vakaisulu e na kuli ni sipi kei na kuli ni me, era sa dravudravua sara, era sa vakararawataki, era sa vakacacani—

³⁸ ka sa sega ni yaga vei ira ko vuravura. Era sa lako voli ga e na veivanua dravuisiga, ki na veiulunivanua, kei na qara eso, kei na veiqaravatu e vuravura.

³⁹ Ia ko ira kecega oqo, ka dina ga ni ra sa rogo levu e na vuku ni vakabauta, era sa sega ni taura na ka sa yalataki,

⁴⁰ ni sa vakarautaka na Kalou vei keda na ka e vinaka cake, oqori me ra kakua ni vakataucokotaki ga vakataki ira, ia me da vakataucokotaki vata kecega.