Iperiu 1 - Ai Vola Tabu (Vakadewa Makawa Vakavoutaki 2021)

Na Vosa ni Kalou ena Vuku ni Luvena

¹ Sai ira na parofita ka vosa kina e liu na Kalou vei ira na qase, e na gauna e vuqa, kei nai valavala e vuqa,

² ia sai koya na Luvena sa vosa kina vei keda ko koya e na gauna mai ki muri oqo, o koya sa lesia ko koya mei taukei ni ka kecega, o koya sa bulia talega kina na vuravura kecega.

³ O koya sa cila kina na nona i serau kei na yaloyalo ni nona i tovo, a sa tokona na ka kecega e na nona vosa mana, a sa tiko sobu e na liga i matau i Koya sa levu sara mai cake, ni sa vuya laivi oti vakataki koya na noda i valavala ca,

⁴ ni sa yaco me uasivi cake vei ira na agilosi, ni sa taukena na yaca sa uasivia na yacadra.

Sa Uasivi Cake na Luvena mai vei Ira na Agilosi

⁵ Io, ko cei vei ira na agilosi sa bau kaya kina na Kalou vakaoqo, “A Luvequ ko iko; au sa vakatuburi iko e na siga oqo”? Se me kaya tale, “Au na Tamana koi au, e na Luvequ ko koya”?

⁶ Kei na gauna e kauta tale mai kina ko koya na ulumatua ki vuravura, sa kaya, “Me cuva vei koya ko ira kecega na agilosi ni Kalou.”

⁷ Ia e na vukudra na agilosi sa kaya ko koya, “O koya sa qisi ira na nona agilosi me cagi, kei ira na nona i talatala me yameyame ni buka.”

⁸ Ia e na vuku ni Luvena ga, sa tukuna, “Ena sega ni mudu na nomuni tikotiko-vakaturaga, oi kemuni na Kalou, sai titoko ni caka dodonu nai titoko ni nomuni matanitu.

⁹ Ni kemuni sa vinakata nai valavala dodonu, ka cata nai valavala ca; sa lumuti kemuni kina na Kalou, a nomuni Kalou e na waiwai ni reki mo ni uasivi cake kina vei ira na nomuni tokani.”

¹⁰ Ia, “Oi kemuni Turaga, ko ni a tauyavutaki vuravura e nai vakatekivu, ka sa cakacaka ni ligamuni ko lomalagi;

¹¹ ena rusa oqori, ia koi kemuni ena tiko ga; ia ena madra kece mai oqori me vaka nai sulu;

¹² o ni na lobia talega me vaka nai tutuvi, ka na vakaisosomitaki me vaka nai sulu. Ia koi kemuni sai kemuni tikoga, ka na sega ni bau mudu na nomuni veiyabaki.”

¹³ Ia ko cei vei ira na agilosi sa kaya vua ko koya e na dua na siga, “Mo tiko e na ligaqu i matau, ka me'u qisi ira oti mada na nomu meca mei tutu-ni-yavamu”?

¹⁴ Era sa sega li ni yalo dauveiqaravi ko ira kecega, sa talai yani me qaravi ira era na yaco e muri mei taukei ni bula?