Filipai 1 - Ai Vola Tabu (Vakadewa Makawa Vakavoutaki 2021)

¹ Mai vei keirau ko Paula kei Timoci, na dauveiqaravi i Karisito Jisu, Kivei ira kecega era sa lotu mai Filipai, era sa tu vata kei Karisito Jisu, kei ira na qase ni lotu, kei ira na tuirara:

² Me nomudou na loloma kei na vakacegu mai vua na Kalou ko Tamada, kei na Turaga ko Jisu Karisito.

Na Masu i Paula Baleti Ira mai Filipai

³ Au sa vakavinavinaka vua na noqu Kalou e na gauna kecega ka'u sa nanumi kemudou kina,

⁴ e na veisiga kecega, e na noqu masu kecega, au sa masulaki kemudou e na marau,

⁵ ni dou sa lomavata tu e nai tukutuku-vinaka mai nai vakatekivu ka yacova na siga edaidai.

⁶ Ia na ka oqo ka'u sa vakadinata sara, ko koya sa vakatekivuna na cakacaka vinaka e na lomamudou, ena kitaka tiko me yaco mada na siga i Jisu Karisito.

⁷ Ia sa dodonu me'u nanumi kemudou kecega vakaoqo, ni dou sa tiko e na lomaqu, ni dou sa rawata vata kei au na loloma koi kemudou kecega, ni'u sa vesu tu, ka totaka ka vakadinadinataka nai tukutuku-vinaka.

⁸ Ni sa kila na Kalou, ni'u sa lomani kemudou kecega vakalevu sara e na yalololoma i Karisito Jisu.

⁹ Ia na ka oqo ka'u sa kerea, me tubu cake vakalevu sara na nomudou loloma e na vuku kei na lewa vinaka kecega,

¹⁰ mo dou vinakata kina na veika sa vinaka sara, mo dou yalodina ka sega ni cala me yaco mada na siga i Karisito,

¹¹ ni dou sa sinai e na vua ni yalododonu, sa tubu e na vuku i Jisu Karisito, me vakarokorokotaki ka vakavinavinakataki na Kalou.

Na Vesu i Paula sa Toso kina nai Tukutuku-vinaka

¹² Ia ka'u sa vinakata, mo dou kila, na veiwekani, ni sa tubu cake nai tukutuku-vinaka e na vuku ni ka sa yaco vei au,

¹³ ka sa vakaraitaki kina na noqu vesuki e na vuku i Karisito vei ira kecega na sotia e na vale-ni-tui, vei ira kece talega na kena vo.

¹⁴ A ra sa lewe vuqa na veiwekani era sa tu vata kei na Turaga, era sa gumatua mai ni'u sa vesuki tu, a ra sa doudou cake kina me ra tukuna na Vosa ni Kalou ka sega ni rere.

¹⁵ E dina ga ni so era sa vunautaki Karisito ni ra sa dauvuvu ka dauveileti, ia eso talega ni ra sa lomavinaka.

¹⁶ Sa vunautaki Karisito ko ira eso ni ra sa dauveileti, ka segai e na lomadina, era nakita ga me vakaikuritaka na noqu vesu e na ka rarawa eso;

¹⁷ eso tale e na loloma, ni ra sa kila ka'u sa lesi me'u totaka nai tukutuku-vinaka.

¹⁸ Ia ka vakaevei? Sa takiveivinaka, se ra vakailasu, se ra dina, sa vunautaki na Karisito; ia na ka oqo ka'u sa rekitaka, io, ka'u na rekitaka tikoga.

¹⁹ Ni'u sa kila ni na yaco na ka oqo me ka me'u bula kina, e na vuku ni nomudou masu, kei nai solisoli ni Yalo i Jisu Karisito,

²⁰ me vaka na ka ka'u sa dauwaraka ka vakanuinuitaka me'u kakua ni madua e na dua na ka, me'u doudou sara ga, me vaka eliu, me vakakina edaidai me vakalevulevui na Karisito e na vuku ni yagoqu, se sa bula, se sa mate.

²¹ Ni sai koya na Karisito ka'u sa bula kina; ia sa ka vinaka kevaka ka'u sa mate.

²² Ia kevaka sa vakavuana tiko na noqu cakacaka ni'u sa bula vakayago oqo, au sa qai sega ni kila na ka me'u digitaka.

²³ Ni'u sa lomalomarua e na ka e rua, ni'u sa gadreva me'u lako yani, ka tiko vata kei Karisito; o koya sa vinaka cake sara;

²⁴ ia sa yaga cake vei kemudou me'u tiko ga vakayago.

²⁵ Ia ni'u sa vakadinata oqo, au sa kila ni'u na tiko ga, io, ka tiko vata kei kemudou kecega, mo dou tubu cake kina e na marau ni vakabauta;

²⁶ me levu cake e na vukuqu na nomudou rekitaki Karisito Jisu, e na noqu tiko vata tale kei kemudou.

²⁷ Mo dou ia ga nai valavala sa kilikili kei nai tukutuku-vinaka kei Karisito, me'u rogoci kemudou kina, se'u lako yani ka raici kemudou, se'u tiko tani, ni dou sa tudei e na yalovata, ka gumatua sara e na lomavata me tubu na vakabauta ni tukutuku-vinaka;

²⁸ me kakua ni vakarerei kemudou ko ira na nomudou meca e na dua na ka; oqori nai vakatakilakila vei ira ni ra na rusa, ia vei kemudou ni dou na bula, ia oqo mai vua na Kalou.

²⁹ Ni sa soli vei kemudou e na vuku i Karisito, e segai walega mo dou vakabauti koya, mo dou vosota talega na ca e na vukuna—

³⁰ ni sa nomudou na veivala dou sa raica eliu vei au, ka dou sa rogoca sa yaco vei au edaidai.