Esiteri 1 - Ai Vola Tabu (Vakadewa Makawa Vakavoutaki 2021)

Sa Vakasivoi Vasiti na Ranadi ko Asuerosi na Tui

¹ Sa yaco e na gauna i Asuerosi (ko Asuerosi oqo ko koya ka lewa mai Idia ka yacovi Eciopea e na dua na drau ka ruasagavulu ka vitu na yasana),

² io e na gauna ko ya, ni sa tiko na tui ko Asuerosi e nai tikotiko vakaturaga ni nona matanitu, mai Susa na koro vakaturaga,

³ e nai katolu ni yabaki ni nona lewa, sa caka magiti ko koya vei ira kecega na nona tamata turaga kei ira era qaravi koya; sa tiko e matana ko ira na kena kaukauwa kei Perisia kei Mitia, ko ira na turaga lelevu, kei ira na turaga ni veiyasana;

⁴ a sa vakaraitaka tiko ko koya ka bogi vuqa, io bogi dua na drau ka walusagavulu, nai yau ni nona matanitu vakaiukuuku, kei na ka e daudokai e na nona ka vakaturaga levu e talei.

⁵ Ia ni sa oti na veibogi oqori, sa qai caka magiti ko koya na tui ka bogi vitu, vei ira kecega na tamata era tiko mai Susa na koro vakaturaga, vei ira na lelevu kei ira na lalai, e na lomanibai ni were ni nona vale na tui.

⁶ Sa rube kina nai sulu vulavula, ka drokadroka, ka karakarawa, a sa buki e na wa lineni matailalai, ka lokaloka, ki na mama siliva kei na duru vatu vulavula. Sa koula ka siliva nai davodavo, e na raravatu damudamu ka vulavula ka dromodromoa ka loaloa.

⁷ A ra sa vagunuvi ira mai na veibilo koula, (sa duidui ga na bilo kece,) kei na waini vakaturaga a ka levu, me vaka nai valavala vakatui.

⁸ A sa ia na gunu me vaka na kenai vakaro; sa sega e dua e vakasaurarataki; ni sa kaya na tui vei ira kece era lewa e nona vale me ra cakava na ka e na galala ko ira na tamata yadua.

⁹ Ko Vasiti talega na ranadi sa caka magiti vei ira na yalewa e na vale ni matanitu sa nei Asuerosi na tui.

¹⁰ E na kenai kavitu ni siga, ni sa marau na lomana na tui e na waini, sa vakaroti Meumani, kei Piseca, kei Apona, kei Pikica, kei Epakica, kei Seca, kei Kakasi, ko ira na mata e lewe vitu era dauveiqaravi e na mata i Asuerosi na tui,

¹¹ me ratou kauti Vasiti na ranadi kivei koya na tui, ni sa vakaisala tu e nai sala vakaranadi, me vakaraitaka na nona matavinaka vei ira na tamata kei ira na turaga, ni sa marama uasivi ko koya.

¹² Ia sa bese ni lako mai ko Vasiti na ranadi e nai vakaro ni tui ka tukuna vua ko ira na mata. A sa cudru sara kina na tui, ka sa waqa vakalevu e lomana na nona cudru.

¹³ Sa qai kaya vei ira na tamata vuku ko koya na tui, vei ira era sa daukila na veigauna, (ni sa dau vakakina nai valavala ni tui vei ira kecega era daukila na vunau kei na lewa;

¹⁴ a ra sa dautu voleka vua ko Kasena, ko Seca, ko Etimaca, ko Tasisi, ko Meresi, ko Masena, ko Memukani, eratou lewe vitu na turaga ni Perisia kei Mitia, eratou sa dauraica na mata ni tui, ka sa tiko me liu e na matanitu;)

¹⁵ “A cava na ka me caka vei Vasiti na ranadi me vaka na lawa, ni sa sega ni vakayacora ko koya nai vakaro ni tui ko Asuerosi ka tukuna vua ko ira na mata?”

¹⁶ A sa kaya ko Memukani vei koya na tui kei ira na turaga, “Sa sega ni cala ko Vasiti na ranadi vei koya duaduaga na tui, sa cala talega vei ira kece na turaga, kei ira kecega na tamata e na veiyasana kece sa lewa kina ko Asuerosi na tui.

¹⁷ Ni na rogovaki vei ira na yalewa kecega na ka e cakava na ranadi, era na qai beca kina na watidra, ni ra na kaya vakaoqo, ‘Sa vakarota ko Asuerosi na tui me kau mai ki matana ko Vasiti na ranadi, ka sa sega ni lako mai ko koya.’

¹⁸ Ia ko ira na marama ni Perisia kei Mitia era sa rogoca na ka sa cakava na ranadi era na vosavosa vakakina edaidai vei ira kece na nona tamata turaga na tui, ka sa levu kina na veibeci kei na cudru!

¹⁹ Kevaka e vinakata ko koya na tui, me dua mada na nona i vakaro vakatui, ia me volai vata kei na nodra lawa na kai Perisia kei na kai Mitia, me kakua ni vuki, Ka me kakua ni lako tale mai ko Vasiti vua na tui ko Asuerosi, ia me solia ko koya na tui na nona i tutu vakaranadi vua e dua tale sa vinaka cake vei koya.

²⁰ Ia ni sa tukuni yani e na nona matanitu taucoko na lawa sa vakatura na tui, (ni sa matanitu levu,) era na qai doka na watidra ko ira na yalewa kecega, ko ira na lelevu kei ira na lalai.”

²¹ A sa taleitaka nai vakasala oqo ko koya na tui kei ira na turaga, ka sa kitaka ko koya na tui me vaka na vosa i Memukani.

²² A sa vakauta nai vola ki na nona yasana kecega na tui, io ki na yasana yadua me vaka na kenai volavolai, kei na matanitu kecega me vaka na nodra dui vosavosa, ka me lewa ko ira yadua na tagane e nona vale, ka me kacivaki e na vosa ni veimatanitu yadua.