Efeso 3 - Ai Vola Tabu (Vakadewa Makawa Vakavoutaki 2021)

Na Cakacaka i Paula Vei Ira na Kai Veimatanitu Tani

¹ E na vuku ni ka oqo, koi au ko Paula, sa nei Karisito Jisu, ka sa vesu tu e na vukumudou na kai matanitu tani—

² ka dou sa rogoca beka se sa vakaevei na loloma ni Kalou sa soli mai vei au e na vukumudou,

³ ni sai vakavuvuli mana sa vakatakila kina ko koya vei au na ka ka vuni tu, me vaka ka'u a vola vakalailai eliu,

⁴ ka dou na kila rawa kina, ni dou sa wilika, na noqu vuku e na ka vuni kei Karisito.

⁵ Oqori sa sega ni vakatakilai vei ira na tamata e na gauna sa oti, me vaka sa qai vakatakilai e na Yalo Tabu vei ira na nona i apositolo yalosavasava kei na nona parofita:

⁶ oqori, ni ra sai taukei vata na veimatanitu tani, ka sa mataveiwekani vata, ka sa rawata vata talega na ka sa yalataka ko koya e na vuku i Karisito Jisu me vaka nai tukutuku-vinaka.

⁷ E na vuku ni tukutuku-vinaka oqo ka'u a lesi kina me'u kenai talatala, me vaka nai solisoli ni loloma ni Kalou, sa soli mai vei au e na cakacaka yaco ni nona kaukauwa.

⁸ Vei au, io vei au ka uasivi sobu sara vei ira kecega era sa lotu, sa soli kina na loloma oqo, me'u vunautaka vei ira na veimatanitu nai yau nei Karisito, sa sega ni kilai rawa,

⁹ ka me'u vakarairaitaka vei ira na tamata kecega se sa vakaevei na ka sa vuni tu, ka vunia mai nai vakatekivu kei vuravura na Kalou, o koya sa bulia na ka kecega;

¹⁰ me yaco kina, e na gauna oqo, nai soqosoqo lotu, mei vakatakilakila vei ira na turaga kei ira sa kaukauwa e na veiyasana vakalomalagi, ni sa takiveivinaka sara na vuku ni Kalou,

¹¹ me vaka nai naki sa tu tikotikoga vua, sa nakita ko koya e na vuku i Karisito Jisu na noda Turaga,

¹² o koya, ni da sa vakabauti koya, eda sa doudou kina ka toro voleka e na vakararavi.

¹³ O koya oqo sa yaloqu kina mo dou kakua ni ceguoca ni'u sa vakararawataki e na vukumudou, ia oqo sa ka mo dou reki kina.

A Masu kei na Kerekere

¹⁴ E na vuku ni ka oqo ka'u sa tekiduru kina vei koya na Tamada,

¹⁵ o koya era sa vakayacani kina na veivuvale kecega mai lomalagi kei vuravura,

¹⁶ me solia vei kemudou ko koya, me vaka na kena levu ni nona vinaka, me vakaukauwataki kemudou e na Yalona mo dou kaukauwa e loma;

¹⁷ me tiko ga e na lomamudou na Karisito e na vakabauta; mo dou vakawakana ka tauyavutaki e na loloma,

¹⁸ ka rawata kina mo dou kila vata kei ira kecega era sa lotu, se cava na kena raraba, kei na kena balavu, kei na kena titobu, kei na kena cecere,

¹⁹ ka mo dou kila na loloma i Karisito, o koya sa uasivi cake e na ka e kilai rawa, mo dou sinai sara kina e na ka kecega sa sinai kina na Kalou.

²⁰ Ia vei koya sa rawata me cakava na ka sa uasivi cake vakalevu sara e na ka kecega eda sa kerea se vakasama kina, me vaka na kaukauwa sa cakacaka yaco e na lomada,

²¹ me ia vei koya na vakarokoroko e nai soqosoqo lotu kei na vuku i Karisito Jisu, me yacova na veitabatamata kecega ka sega ni mudu. Emeni.