Dauvunau 4 - Ai Vola Tabu (Vakadewa Makawa Vakavoutaki 2021)

Na Veivakalolomataki e Vuravura

¹ Ia ka'u a qai lesu tale, ka kunea na veivakasaurarataki kece sa caka e ruku ni mata-ni-siga. Ka raica, sa vakawai na matadra era sa vakasaurarataki, ka sa sega e vakacegui ira! Ia sa tu vei ira na dauveivakasaurarataki na kaukauwa, ka sa sega e vakacegui ira.

² O koya oqo ka'u a vakacaucautaki ira vakalevu kina na mate era sa mate yani, ka vakalailai na bula era bula tiko.

³ Ia sa ca ruarua koi rau oqo ka vinaka ko koya sa sega ni sucu mai, ko koya ka sega ni raica na cakacaka ca sa ia e ruku ni mata-ni-siga.

⁴ Au a nanuma tale na oca kecega, kei na cakacaka dodonu kecega; ni sai koya oqo sa vuvutaki kina e dua na tamata mai vua na kai nona. Oqo talega na ka wale ka sa ka ni oca wale ki na yalo.

⁵ A yalolialia sa roqoveinu na ligana, ka kania na lewena.

⁶ Sa vinaka ni tawa tu e dua bau na liga ni sa tu vata kei na vakacegu, ka ca ni sa tawa tu na liga ruarua ka tu vata kei na oca kei na yalorarawa.

⁷ Ia ka'u a qai lesu tale ka kunea na ka walega e ruku ni mata-ni-siga.

⁸ Sa dua na tamata sa tiko duaduaga, ka sega na kenai karua; io, sa sega na luvena se na tacina, ka sa sega ni mudu na nona oga kecega; ka sa sega ga ni mamau na matana e nai yau, ka sa sega kina ni taroga vakaoqo, “E na vukui cei beka ka'u sa oca kina ka vakuwai au kina mai na marau ni yaloqu?” Oqo talega na ka wale, ka cakacaka vakararawa.

Na Kena Yaga nai Tokani

⁹ Sa vinaka ni lewe rua ka ca ni le dua bauga; ni rau sa rawata nai voli vinaka ni nodrau cakacaka.

¹⁰ Kevaka sa bale e dua, ena tubera cake na kenai sa. Ia ena ca vua sa tiko duadua ni sa bale, ni sa sega e dua tale me tuberi koya cake.

¹¹ Oqo talega, kevaka sa koto vata e lewe rua, erau na katakata; ia ke le dua ga, ena katakata vakaevei ko koya?

¹² E dina ga ni sa rawa vua e dua na tamata me gumatua vua e dua bulu, ia ke rau sa lewe rua erau na vorati koya rawa. Na dali e turai-tolu ena sega ni cavuka rawarawa.

¹³ Sa vinaka na cauravou sa dravudravua ka vuku, ka ca na tui sa qase ka yalolialia, ka sa bese ni vunauci tale.

¹⁴ Sa rawa vua ka lesu mai na valeniveivesu me buli me lewa, ka dina ga ni sucu dravudravua ko koya e na nona matanitu.

¹⁵ Au a vakananumi ira kece na bula era lako voli e ruku ni mata-ni-siga, ka muri koya na cauravou sa vakarau yaco me tui.

¹⁶ Sa sega ni wili rawa na tamata kece, io ko ira kece ka sa liutaka ko koya. Ia ko ira era sa muri mai era na sega ni vinakati koya tiko. E dina na ka talega oqo sa ka wale ka sa ka ni oca ga ki na yalo.