Dauvunau 12 - Ai Vola Tabu (Vakadewa Makawa Vakavoutaki 2021)

Sa Dodonu me Nanumi ko Koya ka Buli Keda

¹ Mo nanumi koya ka buli iko ni ko sa cauravou tiko, ni se bera ni yaco na veisiga ca, ka ni sa sega ni toro mai na veiyabaki, ko na kaya kina, “Au sa sega ni vinakata na ka oqo”;

² ni sa sega ni butobuto mai na mata-ni-siga, se na rarama, se na vula, se na veikalokalo, ka ni sa sega ni dau lesu tale mai na o ni sa tau oti na uca;

³ e na siga era na sautaninini kina nai vakatawa ni vale, ka sa cuva na tamata kaukauwa, ka sa cegu tiko ko ira na dauqaqi sila ni ra lewe lailai, ka sa butobuto mai na daurai ka mai na katuba;

⁴ ka sa sogo tu na katuba ki na gaunisala, ka sa rogo lailai mai nai qaqaqi ni sila, ka sa yadra cake ko koya ni sa tagi na manumanu vuka, ka sa malumalumu kece mai na goneyalewa daumeke;

⁵ ni ra na rerevaka talega na ka cecere, ka ra daurere lako e na gaunisala; ka sa se mai na amodi, ka sa ka bibi na vodre, ka sa mudu mai na garogaro, ni sa lako na tamata ki na nona vale sa tawa mudu, ka ra sa lako voli e na sala ko ira na dautagi yaso;

⁶ ni sa sega ni tasere na dali siliva, se kavoro na bilo koula, se katebe na bilo mai nai vurevure, se ramusu na ka e vakatamoici mai nai keli-wai;

⁷ sa na qai lesu na kuvu-ni-qele me qele tale me vaka eliu, ia na yalo ena lesu tale vua na Kalou ko koya ka sa solia.

⁸ A ka wale ni veika wale, sa kaya ko koya na Dauvunau; sa ka wale na ka kecega!

Na Kena i Tinitini

⁹ Ka ni sa vuku talega na Dauvunau, sa vakatavulici ira tiko na tamata me ra kila-ka; io, sa vakasama tiko, ka sa qara matua, ka vakadutaitaka na vosa vakaibalebale e vuqa.

¹⁰ A sa qara na Dauvunau me kunea na vosa vinaka, ia na ka sa volai sa ka dodonu, io sa vosa dina.

¹¹ A nodra vosa na vuku sa vaka na mata ni moto, kei nai vako sa vakataudeitaka ko ira na turaga ni soqosoqo, o koya sa solia mai e le dua bauga nai vakatawa.

¹² Ia sa vo, na luvequ, mo vakasalataki e na ka oqo. Ena sega ni oti na dauvola nai vola, ia na dauwili vola sa ka ni oca ki na yago.

¹³ Tou rogoca nai tinitini ni ka kecega oqo: Mo rerevaka na Kalou, ka muria na nona vunau, ni sai koya ga oqo nai tavi taucoko ni tamata.

¹⁴ Ni na lewa na cakacaka kecega na Kalou, kei na ka vuni kecega, se vinaka, se ca.