Dauvunau 11 - Ai Vola Tabu (Vakadewa Makawa Vakavoutaki 2021)

Nai Valavala ni Vuku

¹ Mo kaburaka na nomu sila ki na dela ni wai, ka ni sa bogi vuqa mada ko na qai kunea tale.

² Mo vota vei ira na lewe vitu, io vei ira na lewe walu, ni ko sa sega ni kila na ca ena tubu e vuravura.

³ Ke sa sinai na uca e na o, ke sa tau mai ki vuravura ka maca; ia ke sa bale na kau ki na mata ni ceva, se ki na mata ni vualiku, na yasana sa bale ga kina na kau, sai koya ena no ga kina.

⁴ Ko koya sa vakadikeva na cagi ena sega ni kaburaka na sila; kei koya sa vakaraica na o ena sega ni tamusuka.

⁵ Me vaka ko sa sega ni kila nai lakolako ni yalo, se sa tubu vakaevei na sui e na kete i koya sa bukete, sa vakakina ko sa sega ni kila na cakacaka ni Kalou ko koya sa bulia kecega.

⁶ E na mataka mo kaburaka na nomu sila, ia e na yakavi me kakua ni cegu na ligamu, ni ko sa sega ni kila se cava vei rau ena yaco, se na ka oqo se na ka ko ya, se na vinaka vakatautauvata ruarua.

⁷ Ia e dina sa ka vinaka sara na rarama, ka sa daumaka na mata da ni da raica na mata-ni-siga.

⁸ Ia kevaka sa yabaki vuqa na nona bula na tamata, ka sa rekitaka kecega; ia me nanuma talega ko koya na veisiga butobuto; ni na sa vuqa mai. Na ka kecega sa na muri mai sa ka walega.

Nai Vakasala Vei Ira nai Tabagone

⁹ Mo reki, ko iko na cauravou, ni ko sa cauravou tiko, ka marau e lomamu e na veisiga ko sa cauravou kina, ka muria na sala sa lomamu kina, kei na ka sa gole kina na matamu. Ia mo kila ga, ni na lewai iko na Kalou e na ka kecega oqo.

¹⁰ Ia mo biuta tani kina mai na lomamu na ka rarawa, ka mo biuta tani na ca mai na yagomu; ni sa ka walega na gauna ni gone kei na tabagone.