Dauvunau 1 - Ai Vola Tabu (Vakadewa Makawa Vakavoutaki 2021)

Sa Sega ni Yaga na Bula

¹ A nona vosa na Dauvunau, na luve i Tevita na tui Jerusalemi.

² Sa kaya na Dauvunau, Sa ka wale sara! Sa ka wale sara! Sa ka wale na ka kecega!

³ A cava na kena yaga vua na tamata na nona cakacaka kecega sa cakava e ruku ni mata-ni-siga?

⁴ Sa lako yani e dua nai tabatamata, ka sa lako mai e dua tale nai tabatamata, ia ko vuravura sa tu ga ka sega ni mudu.

⁵ Sa dau cadra talega na mata-ni-siga, a sa daudromu na mata-ni-siga; ka sa lako vakusakusa ki na yasana ka cadra mai kina.

⁶ Sa lako vaka ki na ceva na cagi, ka lako voli vaka ki na vualiku. Sa veilakoyaki tikoga na cagi, ka sa suka tale me vaka na kenai lakolako.

⁷ Sa dave tiko ki waitui na uciwai kecega; ia sa sega ni sinai na wasawasa; ki na tikina sa dau dave mai kina na veiuciwai, sa dau lesu tale kina.

⁸ Sa levu na oca e na ka kecega; sa dredre vua na tamata me tukuna; sa sega ni mamau na matada ni da sa raica, se na daligada ni da sa rogoca.

⁹ A ka sa tiko eliu, sai koya ga ena tiko mai muri; kei na ka sa caka eliu sai koya ga ena caka mai muri; ka sa sega na ka vou e ruku ni mata-ni-siga.

¹⁰ E dua li na ka me kainaki kina, “Raica, oqo na ka vou”? Sa ka mai liu sara ga, io e na gauna ka liu vei keda.

¹¹ Sa sega ni nanumi na ka makawa; ia na ka sa na tubu e muri era na sega ni nanuma kina ko ira era na muri mai.

A Nona i Vakavuvuli na Dauvunau

¹² Koi au na Dauvunau ka'u a tui Isireli mai Jerusalemi.

¹³ Ia ka'u a segata e na lomaqu me'u qara ka vakatarotaroga vakavuku na ka kecega sa caka e ruku ni lomalagi; na ogaoga dredre oqo sa solia na Kalou vei ira na luve ni tamata me ra vakaogai kina.

¹⁴ Au sa raica oti na cakacaka kecega sa caka e ruku ni mata-ni-siga; ka raica, sa ka wale kecega kei na ka ni ocaoca wale.

¹⁵ Na ka sa takelo sa sega ni vakadodonutaki rawa, kei na ka sa yali sa sega ni wili rawa.

¹⁶ Au a veinanuyaka e yaloqu, ka kaya, “Raica, ka'u sa tamata yaco, ka'u sa vuku vakalevu cake vei ira kecega era sa liu vei au e Jerusalemi. Io na lomaqu sa kunea vakalevu na vuku kei na kila-ka.”

¹⁷ Ia ka'u a solia na yaloqu me'u kila nai valavala vuku, kei nai valavala lialia ka sesewa. Ka'u sa kunea ni sa ka ni oca wale na ka talega oqo.

¹⁸ Ni sa levu na vuku sa levu kina na rarawa, ia ko koya sa vakaikuritaka na vuku sa vakaikuritaka na rarawa.