Dauveilewai 1 - Ai Vola Tabu (Vakadewa Makawa Vakavoutaki 2021)

Na Leqa i Isireli ni Sega ni Valuti Vakadua ko Kenani

¹ Ia ni sa mate ko Josua, era sa tarogi Jiova ko ira na Isireli, ka kaya, “O cei vei keimami me liu cake kivei ira na kai Kenani, me vala kei ira?”

² A sa kaya ko Jiova, “Me lako cake ko ira na Juta; ni ka'u sa solia na vanua ki na ligadra.”

³ A ra sa kaya na Juta vei ira na Simione na wekadra, “Me da lako cake ki na neimami votavota ni vanua, me da vala kei ira na kai Kenani. Ia eda na qai lako vata talega kei kemudou ki na nomudou i votavota ni vanua.” A ra sa lako vata kei ira ko ira na Simione.

⁴ A ra sa lako cake ko ira na Juta, ka sa soli ira na kai Kenani kei ira na Perisaiti ki na ligadra ko Jiova; a ra sa mokuta mai Peseki e lewe tini na udolu na tamata.

⁵ A ra sa kunei Etoni-peseki mai Peseki, ka ra vala kaya, ka mokuti ira na kai Kenani kei ira na Perisaiti.

⁶ Ia sa dro ko Etoni-peseki, ka ra sa vakasavi koya, ka taura, ka muduka na nona i dovidovi-ni-kakana kei nai qaqalo levu ni yavana.

⁷ A sa kaya ko Etoni-peseki, “Era a vakatotomi e ruku ni noqu tepeli e lewe vitusagavulu na tui sa mudu na nodra i dovidovi-ni-kakana kei nai qaqalo levu ni yavadra. Ia me vaka na ka ka'u a kitaka, sa saumi au vakakina na Kalou.” A ra sa kauti koya ki Jerusalemi, ka sa mate kina ko koya.

Valuti Jerusalemi kei Epironi ko Ira na Juta

⁸ Ia sa vala ko ira na Juta kei Jerusalemi, ka rawata, ka samuta e nai seleiwau, ka vakama na koro.

⁹ Sa oti, era sa qai lako sobu ko ira na Juta, me vala kei ira na kai Kenani, era sa tiko e na vanua veiulunivanua, kei na mata ni ceva, kei na vanua veibuca.

¹⁰ Sa la'ki vala talega ko ira na Juta kei ira na kai Kenani era sa tiko mai Epironi (ia na yaca i Epironi eliu ko Kiriaci-aripa); a ra sa mokuti Sesei, kei Eiimani, kei Talimei.

Valuti Tipira ko Ocinieli

¹¹ A ra sa lako tani mai kea ka vala kei ira na kai Tipira (ia na yaca i Tipira eliu ko Kiriaci-seferi).

¹² A sa kaya ko Kelepi, “O koya e na valuti Kiriaci-seferi ka vesuka, au na solia vua na luvequ yalewa ko Akesa me watina.”

¹³ A sa rawata ko Ocinieli na luve i Kinasi, na taci Kelepi; ka sa solia vua ko koya na luvena yalewa ko Akesa me watina.

¹⁴ Ia, ni sa lako mai na yalewa, sa vakauqeta na watina me kerea e dua na tiki ni vanua mai vei tamana. A sa sobu mai na asa na yalewa, a sa kaya vua ko Kelepi, “A cava ko vinakata?”

¹⁵ A sa kaya vua ko koya, “Mo solia vei au na ka me'u kalougata kina. Me vaka ni ko sa solia vei au e dua na vanua mamaca ki na mata ni ceva, mo solia talega vei au eso na mataniwai.” A sa solia kina vua ko Kelepi na mataniwai ki cake, kei na mataniwai ki ra.

Qaqa ko Ira na Juta kei na Penijamini

¹⁶ Ia ko ira na kawa i Kenaiti, na vugoi Mosese, era lako cake kei ira na Juta mai na koro ni veibalabala ki na vanua lala nei Juta, ko ya mai na mata ni ceva sa donui Arati, ka ra sa lako ka tiko e na kedra maliwa na tamata.

¹⁷ Era sa qai lako ko ira na Juta kei ira na Simione na wekadra, ka ra mokuti ira na kai Kenani era tiko mai Sifaci, ka vakarusa sara. A sa vakatokai na yaca ni koro ko Orima.

¹⁸ Era sa rawai Qasa talega kei na kena vanua ko ira na Juta, kei Asikiloni kei na kena vanua, kei Ekironi kei na kena vanua.

¹⁹ A sa tiko vata kei ira na Juta ko Jiova, ka sa rawa kina ka taukena na vanua veiulunivanua, ia sa sega ga ni vakasavi ira rawa era sa tiko ena vanua veibuca, baleta ni ra sa vakaqiqi-ni-valu kaukamea.

²⁰ A ra sa soli Epironi vei Kelepi, me vaka ka kaya ko Mosese. A sa vakasavi iratou tani mai kina na tagane tolutolu era luve i Anaki ko koya.

²¹ Ia ko ira na Penijamini, era sa sega ni vakasavi ira tani na Jepusaiti era sa tiko mai Jerusalemi; ia sa tiko vata ga e Jerusalemi ko ira na Jepusaiti kei ira na Penijamini, ka yacova na siga oqo.

Valuti Peceli ko Ira na Ifereimi kei na Manasa

²² Ia na yavusa i Josefa, era sa lako cake talega ki Peceli; a sa tiko vata kei ira ko Jiova.

²³ A ra sa tala eso ko ira na yavusa i Josefa me yamata ki Peceli (ia na yaca ni koro eliu ko Lusa).

²⁴ Ia ko ira sa lawakoto era sa kunea e dua na tamata sa lako tiko mai na koro, a ra sa kaya vua, “Mo vakatakila mada vei keitou nai curucuru ki na koro, ia keitou na vakabulai iko.”

²⁵ Ia ni sa vakatakila vei ira ko koya nai curucuru ki na koro, era sa samuta na koro e nai seleiwau; ia era sa vakabula na tamata ko ya kei ira kecega na kai nona.

²⁶ A sa toki na tamata ko ya ki na nodra vanua na Itaiti, ka tara kina e dua na koro, ka vakayacana ko Lusa; ka sa yacana tiko ka yacova na gauna oqo.

²⁷ O ira talega na Manasa, era sa sega ni vakasavi ira tani nai taukei i Peci-siani kei na kena veikoro se ko ira na kai Tenaki kei na kena veikoro, se na kai Doa kei na kena veikoro, se na kai Ipiliami kei na kena veikoro, se na kai Mekito kei na kena veikoro; ia era sa gu na kai Kenani me ra tiko ga e na vanua ko ya.

²⁸ Ia ni sa kaukauwa mai ko ira na Isireli, era sa rawai ira na kai Kenani me ra qali vei ira, ka ra sega ni vakasavi ira tani sara.

²⁹ O ira talega na Ifereimi, era sa sega ni vakasavi ira tani na kai Kenani era a tiko mai Keseri; ia era tiko vata ga kei ira mai Keseri ko ira na kai Kenani.

³⁰ O ira na Sevuloni, era sa sega ni vakasavi ira tani na kai Kitironi, se ko ira na kai Neeloli; era sa tiko vata ga kei ira ko ira na kai Kenani, ka ra mai qali vei ira.

³¹ O ira na Aseri, era sa sega ni vakasavi ira tani na kai Ako, se ko ira na kai Saitoni, se ko ira mai Alapi, se ko ira mai Ekisipi, se ko ira mai Elipa, se ko ira mai Efiki, se ko ira mai Riopi,

³² ia era sa tiko vata ga na kawa i Aseri kei ira na kai Kenani, nai taukei ni vanua, ni ra sa sega ni vakasavi ira tani.

³³ O ira na Navitalai era sa sega ni vakasavi ira tani na kai Peci-semesi, se ko ira na kai Peci-anaci; ia era sa tiko e na kedra maliwa na kai Kenani, nai taukei ni vanua. Ia sa qali vei ira ko ira na kai Peci-semesi kei ira na kai Peci-anaci.

³⁴ Ia ko ira na Amoraiti, era sa biligi ira lesu na yavusa i Tani ki na vanua veiulunivanua, ni ra sa sega ni vakatarai ira me ra lako sobu ki na vanua veibuca.

³⁵ Ia era sa gu na Amoraiti me ra tiko e na Ulunivanua ko Eresi mai Eijaloni, mai Selipimi, ia sa gumatua cake na ligadra na yavusa i Josefa, era sa mai qali vakabobula kina vei ira.

³⁶ Sa vakatekivu na nodra i yalayala na Amoraiti mai nai cabecabe ki Akirapimi, mai Sela, ka lako vaka ki cake.