Apakuki 3 - Ai Vola Tabu (Vakadewa Makawa Vakavoutaki 2021)

Na Masu i Apakuki

¹ A masu i Apakuki na parofita: a sere me vaka na Sikionoce.

² I Jiova, au a rogoca na kemuni rogorogo, ka'u a rere: I Jiova, mo ni vakabulabulataka na nomuni cakacaka e na veimama ni gauna; e na veimama ni gauna mo ni vakatakila mai; ni kemuni sa ia na cudru, mo ni nanuma na yalololoma.

³ Sa lako mai Temani na Kalou, io ko koya sa Yalosavasava, mai na Ulunivanua ko Perana. Sela. Sa ubia na mata-ni-lomalagi na nona i serau, ia sa sinai ko vuravura e na vakavinavinaka vua.

⁴ Ia na nona lagilagi sa vaka na rarama; ka sa cila mai na ligana: ia sa tabonaki ga mai kea na nona kaukauwa.

⁵ Sa liutaki koya na mate dauveiveitauvi, a sa muri koya na qilaiso sa waqa tu.

⁶ Sa tu ko koya, ka vakarautaki vuravura; sa vakararai ko koya, ka sa dui vakasevi ira na veimatanitu; A sa duibiubiuti na veiulunivanua makawa, ka sa cuva sobu na veiulu-ni-koro ka tu mai liu: Sa tawa mudu na nona cakacaka.

⁷ Ka'u a raica na veivale laca i Kusani ni sa rarawa sara mai; sa yavavala nai sulu ni vanua ko Mitiani.

⁸ Ko ni sa yalo ca li, i Jiova, ki na uciwai? Ko ni sa cudru li ki na uciwai? Ko ni sa lesava li na waitui, ni o ni a vodoka kina na nomuni ose, kei na nomuni qiqi-ni-dauveivakabulai?

⁹ Sa ucuni sara na nomuni dakai-titi, me vaka na vosa ni bubului vei ira na veiyavusa, io na nomuni vosa. Sela. O ni sa wasea na vanua e na veiuciwai.

¹⁰ Sa raici kemuni na veiulunivanua, ka sa sautaninini; sa vuabale mai na dobui; sa tabalaka na domona na wasa titobu, sa dodoka ki cake na ligana.

¹¹ Na mata-ni-siga kei na vula sa tu vakadua e na nodrau i tikotiko, ni sa cila na nomuni gasau era sa lako, ni sa serau na nomuni moto makamakalivata.

¹² Ko ni a lako voli yani vakacudrucudru e vuravura; ni kemuni sa lesa, ko ni a butuqaqia na veimatanitu.

¹³ O ni a lako yani me vakabulai ira na nomuni tamata, me vakabulai ira ko ni a lumuta; O ni a vuetaka sara na ulu ni vuvale sai valavala ca, ka vakarairaitaka na vuna, io, ki na vu ni domona. Sela.

¹⁴ O ni a coka e na nona moto dina na uludra na nona tamata qaqa, ko ira era cici vakacovulaca mai me vakasevi au, ka sa nodra ka ni reki me ra kani ira lo era vakararawataki.

¹⁵ O ni a butuqaqia na wasawasa kei ira na nomuni ose, ka vakayavalata na wai levu.

¹⁶ Au a rogoca, ka rise na bati ni ketequ; ni sa rogo mai, sa yavala kina na tebenigusuqu. Sa curu ki na suiqu na vuca, ka'u a sautaninini tu e yavaqu. Ia ka'u na vakacegu ga e na siga ni rarawa, ni sa lako cake mai ko koya vei ira na lewe-ni-vanua ena mai kabai ira ko koya.

¹⁷ Ia ke sa sega ni seraki na lolo, ka sega ni vua mai na veivaini; ke sa yali na vua ni olive, ka sa sega talega ni tubu na kakana ena veiwere; ke muduki tani mai na bai ni qele ni sipi, ka sega na bulumakau e na loma ni bai,

¹⁸ ia ka'u na rekitaki Jiova ga; ka'u na marautaki koya na Kalou, na noqu i vakabula.

¹⁹ Sa vu ni noqu kaukauwa ko Jiova na Turaga; e na cakava na yavaqu me vaka na yava ni dia, ia ena kauti au tale ko koya me'u lako voli e na noqu veitikina cecere. Vua nai liuliu-ni-sere: kei nai yaya ni qiriqiri-vakawa.