Apakuki 2 - Ai Vola Tabu (Vakadewa Makawa Vakavoutaki 2021)

Na Vosa i Jiova ki na Kudru i Apakuki

¹ E na noqu i tutu ni vakatawa ka'u na tu ga, ia ka'u na tiko ga e na dela ni bai kaukauwa; ia ka'u na vakatawa tiko me'u raica na ka ena kaya mai vei au ko koya, kei na ka me'u kaya yani ni'u sa vunauci.

Na Tamata Yalododonu e na Bula e na Nona Vakabauta

² A sa kaya vei au ko Jiova: “Mo vola na raivotu; me matata e na papa ni volavola, me wili drodro sara ko koya sa wilika.

³ Ni na dede mada na raivotu me qai yaco na gauna sa loku, ia ni sa yaco nai otioti ni gauna, ena qai vosa, ena sega ni lasu. Kevaka ena berabera, mo waraka ga; ena yaco vakaidina ga, ena sega ni berabera sara.

⁴ “Raica, o koya sa viavialevu sa sega ni dodonu na yalona e lomana, ia ko koya sa yalododonu ena bula e na nona vakabauta.

⁵ “Ia na waini talega sa ka ni dauveivakaisini; na tamata viavialevu talega sa sega ni tiko mai vale; sa vakalevutaka ga na nona domo-ni-koco me vaka nai bulubulu, io, sa vakataki mate, sa sega ni mamau rawa. Ka sa vakasoqona vata me nona na veimatanitu kecega, ka sa vakasoqona vata me nona kecega na veimataqali.”

Ena Ca ko Ira na Kai Kalitia

⁶ O ira kece oqo me ra sega beka ni taurivaka e dua na kena vosa vakaibalebale, io, e dua na kenai bole ni veibeci, ka kaya, Ena ca ko koya sa vakalevutaka na ka sa sega ni nona! A cava na kena dede ki vua sa bitaki koya e nai vakadinadina?

⁷ Ena sega li ni vakasauri na nodra tucake ko ira era na kati iko, ka yadra mai ko ira era na tauri iko vakaukauwa, ia ko na qai yaco me nodra i toki-ni-valu?

⁸ Ia ko iko, ni ko sa vakacacana na veimatanitu e vuqa, ena vakacacani iko kina ko ira kece na vo ni tamata bula— e na vuku ni nodra vakadave-dra na tamata, kei nai valavala vakasausa e caka ki na vanua, ki na veikoro lelevu kei ira kece era tiko kina.

⁹ “Ena ca ko koya sa rawata vakatani nai yau me nodra na nona vuvale, me vakatikora ki cake na nona sova, me maroroi kina ko koya mai na kaukauwa ni ca!

¹⁰ Ko sa bosea na ka ena madua kina na nomu vale, ni ko sa muduka tani na veimataqali e vuqa, ka sai valavala ca me ca kina na yalomu.

¹¹ Ni na kaci na vatu mai na lalaga ni vale, ia nai vakadei mai na loma ni kau ni vale ena rogo yani kina.

¹² “Ena ca ko koya sa vakatauyavutaka na koro e na vakadave-dra, ka vakataudeitaka na koro e na caka cala!

¹³ Raica, sa sega li ni vu vei Jiova-ni-lewevuqa ni ra sa oca na veimataqali me kena na bukawaqa, ka ni ra na veivakaocataki vakataki ira na veimatanitu e na vuku ni ka wale sara?

¹⁴ Ni na roboti vuravura na kena kilai na lagilagi i Jiova, me vaka sa ubia na wasa titobu na wai.

¹⁵ “Ena ca ko koya sa vagunuva na kai nona, io, ko iko ka sovaraka na nomu cudru ka sa vakamatenitaki ira talega, mo raica kina na nodra luvawale!

¹⁶ O sa vakamamautaki e na madua ka segai e na lagilagi. Mo gunu talega ko iko me votu mai na nomu sega ni cilivi. Ena vagolei sara vei iko na bilo e na liga i matau i Jiova, ia na veivakamaduataki velavela ena tabonaka na nomu lagilagi.

¹⁷ Ia nai valavala vakasausa ki Lepanoni ena ovici iko, ka vakakina na nodra veivakacacani na manumanu kila ka sa vakadomobulataki ira— baleta na vakadave-dra ni tamata kei nai valavala vakasausa ki na vanua, ki na veikoro lelevu kei ira kece era tiko kina.

¹⁸ “A cava na kena yaga na matakau ni sa ceuta na kena matai— a matakau buli, a qasenivuli ni veika lasu? Ni sa dauvakararavi na kena matai ki na ka sa cakava, ka dina ga ni sa sega ni rawa vua na matakau me vosa!

¹⁹ Ena ca ko koya ka kaya ki na kau, ‘Mo yadra mai!’ Ka kaya talega ki na vatu galu, ‘Mo tucake!’ E rawa li ni veivakavulici na ka ko ya? Raica, sa botani e na koula kei na siliva, ka sa sega vua nai cegu ni bula.

²⁰ Ia ko Jiova sa tiko e na nona vale tabu; me qai vakadirorogo e matana ko vuravura kecega.”