Apakuki 1 - Ai Vola Tabu (Vakadewa Makawa Vakavoutaki 2021)

¹ Na vosa ni parofisai bibi sa raica ko Apakuki na parofita.

Na Tagi ni Kudru nei Apakuki

² A cava na kena dede, kemuni Jiova, me'u sa tagi, ka kemuni sa sega ni rogoca? Se ka'u sa tagi vei kemuni e na vuku ni “Valavala kaukauwa!” ka ko ni sa sega ni ia na veivakabulai?

³ A cava ko ni sa vakatakila kina vei au na ca, ka vakaraitaka talega vei au na ka rarawa? Ia na veikove kei na veivakacacani sa tu ga e mataqu; a sa ia tiko na veileti ka sa tubu mai na veivala.

⁴ O koya oqo sa malumalumu kina nai vunau, ka sa sega ni vakayacori rawa na lewa dodonu. Ni ra sa wavoliti ira na yalododonu ko ira na tamata ca; ka sa yaco kina na lewa vakatani.

Na Kena i Sau mai vei Jiova

⁵ “Dou rai yani vei ira na veimatanitu, ka vakasamataka! Ka mo dou kidacala vakalevu sara! Ni'u na kitaka e dua na cakacaka e na nomudou gauna, ka dou na sega ni vakadinata kevaka ena tukuni vei kemudou.

⁶ Ia raica, ka'u na vakauqeti ira na kai Kalitia, na matanitu yalo ca ko ya ka yaloriri, era lakova tiko na veivanua e vuravura, me ra kovea nai tikotiko sa sega ni nodra.

⁷ Era matanitu vakadomobula ka rerevaki; sa tubu mai vei ira ga na nodra lewa kei na nodra ka vakaturaga.

⁸ Sa totolo na nodra ose ka bera na lepate, ka gu ni daukata vakalevu cake mai na wolifa ni bogi; era sa toso doudou ki liu na nodra dauvodo ose. Io, era na lako vakayawa mai ko ira na nodra i valu era vodo ose; era sa vuka me vaka na ikeli sa vakusakusa yani me kana.

⁹ Era sa lako ga mai me ra ia kece na veivakacacani; sa taudonu mai na matadra me vaka na cagi mai na tokalau, a ra sa vakasoqona na bobula me vaka na nuku.

¹⁰ A ra sa vakalialiai ira na tui, ia na turaga sa nodra ka ni veivakasewasewani. A koro-ni-valu kecega era sa dredrevaka, ni ra sa viri qele, ka kabata.

¹¹ Sa yalolevu kina ko koya, ka sa lako voli, ka sa cala, sa nona kaukauwa ga na nona kalou!”

Sa Vakatukutuku Tale vei Jiova ko Apakuki

¹² Koi kemuni Jiova, na noqu Kalou, na noqu Kalou Yalosavasava ko ni sa bula mai liu sara se segai? Keimami na sega ni mate. Kemuni Jiova, ko sa lesi ira me ia na veicudruvi; ia koi kemuni na Uluvatu, ko ni sa tauyavutaki ira me ia na veivunauci.

¹³ Sa savasava na matamuni ka sa dredre kina mo ni vakaraica na ca; ia ko ni sa sega ni vosota mo ni raica na ka e ca, sa vakaevei li ni kemuni sa mai raici ira kina na dauvakacaca, ka tiko lo ni sa tilomi koya sa yalododonu ko koya na tamata ca?

¹⁴ Ka sa cakava vei ira na tamata me ra vaka na ika ni waitui, ka vaka na ka e qasi voli sa sega e dua na nodra turaga.

¹⁵ Sa siwati ira kece sara ga ki cake e na nona siwa, ka vakalawataki ira e na nona lawa, io, sa vakasoqona e na nona lawa ni yavi; o koya oqo sa marau kina ko koya ka sa reki.

¹⁶ O koya oqo sa soro kina ko koya ki na nona lawa, ka vakama nai madrali boi vinaka ki na nona lawa ni yavi; ni sa ka oqo sa uro kina na nona i votavota, ka vinaka na kena kakana.

¹⁷ Sa ka oqo li ena dausova kina na lewe ni nona lawa, ka sa vakamatei ira tikoga na lewe ni veivanua, ka sega ni lomani ira?