Akeai 1 - Ai Vola Tabu (Vakadewa Makawa Vakavoutaki 2021)

Nai Vakaro me Tara Vou Tale na Vale i Jiova

¹ E nai karua ni yabaki i Taraiasi na tui, e nai kaono ni vula, e nai matai ni siga ni vula, sa yaco na vosa i Jiova vei Akeai na parofita me tukuna vei Serupepeli na luve i Sialitieli, na kovana e Juta, vei Josua talega na luve i Jiosataki, na bete levu, ka vaka:

² “Sa kaya vakaoqo ko Jiova-ni-lewevuqa: Ko ira na tamata oqo era sa kaya ni se sega ni yaco na kena gauna me tara kina na vale i Jiova.”

³ A sa qai yaco na vosa i Jiova vei Akeai na parofita me kaya,

⁴ “Sa kena gauna li vei kemudou mo dou tiko e na nomudou veivale sa tara vakavinaka, ka sa rusa koto ga na vale oqo?

⁵ Ia oqo, sa kaya kina ko Jiova-ni-lewevuqa: Dou vakananuma mada kina na nomudou i valavala.

⁶ Sa ka levu na veika dou sa kaburaka, ia sa ka lailai ga na veika dou sa tamusuka. Dou sa kana, ka sega ni mamau kina; dou sa gunu, ka sega ni vakacegu kina; dou sa vakaisulu, ka sa sega ni dua e vakatakatari kina; ia ko koya sa saumi e na nona cakacaka sa tugana ga ki na taga sa cicila.

⁷ “Sa kaya vakaoqo ko Jiova-ni-lewevuqa: Dou vakananuma mada kina na nomudou i valavala.

⁸ Dou la'ki cabe cake ki na ulunivanua ka kauta mai na kau ka tara na vale, ka me'u na rekitaka koi au ka me'u na vakarokorokotaki talega, sa kaya ko Jiova.

⁹ Dou a nuitaka na ka levu, ka raica, sa ka lailai ga; ia ni dou sa kauta mai ki vale, ka'u sa uvuci ira laivi. E na vuku ni cava? sa kaya ko Jiova-ni-lewevuqa. E na vuku ga ni noqu vale sa rusa koto, ia koi kemudou, dou sa dui cici vakusakusa yadua ki na nona vale.

¹⁰ O koya oqo sa vesuka tiko kina na tegu ko lomalagi e cake, ka sa vesuka ko vuravura na vuana.

¹¹ Ia ka'u sa kaya me dausiga na vanua, kei na veiulunivanua, kei na sila, kei na waini vou, kei na waiwai, kei na ka sa vuataka na qele, kei na tamata, kei na manumanu, kei na cakacaka kecega ni liga ni tamata.”

Era sa Muria na Tamata nai Vakaro i Jiova

¹² Ia ko Serupepeli na luve i Sialitieli, kei Josua na luve i Jiosataki, na bete levu, kei na kena vo kece ni tamata, era sa qai muria na vosa i Jiova na nodra Kalou, kei na vosa i Akeai na parofita, me vaka na ka sa talai koya kina ko Jiova na nodra Kalou; ka ra sa rere na tamata e na mata i Jiova.

¹³ Sa qai vosa ko Akeai nai talai i Jiova e na vuku ni ka sa talai koya kina ko Jiova vei ira na tamata, ka kaya, “Au sa tiko vata kei kemudou, sa kaya ko Jiova.”

¹⁴ A sa vakauqeta ko Jiova na yalo i Serupepeli na luve i Sialitieli, na kovana e Juta, kei na yalo i Josua na luve i Jiosataki, na bete levu, kei na yalodra na tamata kecega sa vo; ka ra sa mai cakava na cakacaka e na vale i Jiova-ni-lewevuqa, na nodra Kalou,

¹⁵ e nai karuasagavulu ka va ni siga, e nai kaono ni vula, e nai karua ni yabaki i Taraiasi na tui.