Aisea 9 - Ai Vola Tabu (Vakadewa Makawa Vakavoutaki 2021)

Na Veiliutaki Dodonu ni Tui sa Namaki

¹ Ia ena sega ni butobuto vua sa vakararawataki. Me vaka sa beci eliu na vanua ko Sevuloni kei na vanua ko Navitalai, ia ena laveti na kena totoka e na gauna mai muri na yasayasa vakawaitui, na bati ni Joritani, ko Kalili ni veimatanitu.

² Ko ira na tamata ka lako e na butobuto era sa raica na rarama levu; vei ira sa tiko e na vanua ni yaloyalo ni mate— sa cila mai na rarama vei ira.

³ Ko ni sa vakalewevuqataka na matanitu, ko ni sa vakaikuritaka na nodra marau; era sa marau e matamuni me vaka na marau ni sa cava na yabaki, ka vaka na nodra marau era sa vota nai toki-ni-valu.

⁴ Ia nai dabedabe ni nona i colacola bibi, kei nai vua ni domona, kei nai titoko i koya ka vakasaurarataki koya, ko ni sa musuka me vaka e na siga i Mitiani.

⁵ Ia na nodra i yaya kecega era sa vakaiyaragi tu ki nai valu kei na kaila ni valu kei nai sulu sa lomoci e na dra, ena visa ga me kena buka ni bukawaqa.

⁶ Ni sa sucu mai e dua na gone me noda, sa soli mai vei keda e dua na gonetagane; ena vakatau kivei koya na lewa; ena vakatokai na yacana ko Veivakurabuitaki, nai Vakavuvuli, na Kalou kaukauwa, na Tama ni gauna tawa mudu, na Tui ni Sautu.

⁷ Ena sega ni oti na kena tubu na nona lewa kei na sautu e nai tikotiko vakaturaga i Tevita kei na nona matanitu. Ena vakataudeitaka ka vakaukauwataka e na lewa dodonu kei nai valavala dodonu mai na gauna oqo ka yacova na gauna kecega. A lomakatakata i Jiova-ni-lewevuqa ena vakayacora na ka oqo.

Ena Totogitaki Isireli ko Jiova

⁸ Sa dua na nona vosa na Turaga kivei ira na Jekope, ka sa tau kivei ira na Isireli;

⁹ era na kila kina ko ira na tamata kecega— ko Ifereimi kei ira na kai Samaria— ia ena nodra viavialevu kei na kaukauwa ni lomadra era sa kaya:

¹⁰ “Era sa lulutu na vatu-buli, ia e na vatu sa ta eda na qai tara cake tale kina; sa ta sobu na vuni lolo, ia eda na qai vakaisosomitaka e na sitari.”

¹¹ Ia ko Jiova ena qai vakalevulevui ira na meca i Risina me vala kei ira, ka vakayavalati ira na nodra meca,

¹² ko ira na kai Siria mai na tokalau, kei ira na kai Filisitia mai na ra, ka ra na tilomi ira sara na Isireli. E na ka kece oqo sa sega ga ni mudu kina na nona cudru, ka sa dodo tikoga na ligana.

¹³ Ia ko ira na tamata era sa sega ni lesu kivei koya sa yaviti ira, a ra sa sega talega ni qaravi Jiova-ni-lewevuqa.

¹⁴ Ena muduka tani kina ko Jiova mai vei ira na Isireli na uludra kei na buidra, na taba ni niu-sawa kei na gasau e na dua bauga na siga—

¹⁵ na qase kei koya na tamata dokai sai koya na uludra; kei na parofita sa vakavulica na ka lasu sai koya na buidra;

¹⁶ ni ko ira sa tuberi ira na tamata oqo era sa vakacalai ira, kei ira era sa tuberi mai vei ira era sa tilomi sara.

¹⁷ Oqori na vuna sa sega ni mataloloma kina na Turaga vei ira na nodra cauravou, ka sa sega talega ni yalololoma vei ira na nodra gone luveniyali kei na nodra yada; ni ra sa dauveivakaisini kecega ka i valavala ca, kei na gusudra kece sa daucavuta na ka lialia. Ia ni sa caka kece oqo, sa sega ga ni mudu kina na nona cudru, ka sa dodo tikoga na ligana.

¹⁸ Ni sa waqa na yalo ca me vaka na bukawaqa, ena kania na kau vakavotona kei na soni; ena vakacaudreva na kau ni veikau, ka na kuvu cake me vaka na kubou.

¹⁹ Sa kama na vanua e na cudru i Jiova, ia na tamata era na vaka na buka ni bukawaqa; ena sega e dua me yalololoma vua na tacina.

²⁰ Ena kaliraka mai nai matau e dua, ka na viakana ga; ena kana mai nai mawi, ka na sega ni mamau; era na dui kania na lewe ni ligana;

²¹ ena kani Ifereimi ko Manasa, kei Manasa ko Ifereimi, ka rau na to vata me cati Juta. Ia na kena caka na ka kece oqo sa sega ni mudu kina na nona cudru, ka sa dodo tikoga na ligana.