Aisea 7 - Ai Vola Tabu (Vakadewa Makawa Vakavoutaki 2021)

Ai Tukutuku kivei Easi na Tui

¹ A sa yaco e na gauna i Easi, na luve i Jocame, na luve i Usaia, na tui Juta, ni rau sa qai lako cake ki Jerusalemi, ko Risina na tui Siria, kei Peka na luve i Rimalaia, na tui Isireli, me rau kaba, a rau sa sega ni rawata.

² A sa tukuni ki na vale i Tevita, ka vaka, “Sa to vata ko Siria kei Ifereimi.” Sa qai yavala na lomana, kei na lomadra na nona tamata, me vaka sa yavala na kau ni veikau ni sa liwa na cagi.

³ Sa qai kaya vei Aisea ko Jiova, “Mo drau lako mada, ko iko kei Siari-yasupi na luvemu me tavaki Easi, ki na salisali ni drano mai cake ka koto mai na salatu e na nodratou vanua na Dausava-i-sulu,

⁴ ka kaya vua, ‘Mo qarauni kemuni, ka mo ni vakacegu; ni kakua ni rere, se yalolailai e na vukudrau na bui ni kau oqo sa kubou tu, io e na vuku ni nodratou cudru waqawaqa ko Risina kei Siria, kei na luve i Rimalaia.

⁵ Me vaka ni ratou sa bosea na ka ca vei iko ko Siria, kei Ifereimi, kei koya na luve i Rimalaia, ka ratou sa kaya,

⁶ “Me datou lako cake ki Juta, ka vakararawataka, ia me datou valuta me noda, ka lesia kina e dua na tui, io na luve i Tapeli,”

⁷ ka sa kaya kina na Turaga ko Jiova: “ ‘Ena sega ga ni rawa, ena sega ni yaco oqo.

⁸ Ni sa ulu i Siria ga ko Tamasiko, ka sa ulu i Tamasiko ga ko Risina. Ia ena loma ni yabaki e onosagavulu ka lima ena vakabalei sobu ko Ifereimi me kakua ni matanitu.

⁹ Ia na ulu i Ifereimi ga ko Samaria, kei na ulu i Samaria na luve i Rimalaia. Kevaka dou na sega ni vakadinata, dou na sega ni vakataudeitaki.’ ”

Nai Vakatakilakila i Imanueli

¹⁰ Sa vosa tale vei Easi ko Jiova, ka kaya,

¹¹ “Mo kerea mada e dua nai vakadinadina vei iko mai vei Jiova na nomu Kalou; mo kerea e dua mai na tikina titobu, se na tikina cecere sara.”

¹² A sa kaya ko Easi, “Au na sega ni kerea, ia ka'u na sega ni vakatovolei Jiova vakaca.”

¹³ Ka sa kaya ko Aisea, “Dou rogoca mada na vale i Tevita! A ka lailai beka na nomudou vakaocataki ira na tamata, mo dou sa vakaocataki koya talega na noqu Kalou?

¹⁴ Ia ko Jiova vakataki koya ga ena solia vei kemudou e dua nai vakadinadina. Raica, ena bukete e dua na goneyalewa, ena vakasucuma e dua na gonetagane, ena vakayacani koya ko Imanueli [Na Kalou sa tiko kei keda].

¹⁵ Na bata kei na oni ena kania ko koya, ni sa kila me biuta na ka ca, ka digitaka na ka vinaka.

¹⁶ Ia ni se bera ni kila ko koya na gone me biuta na ka ca, ka digitaka na ka vinaka, ena lala mada na nodrau vanua na tui ruarua ko sa rerevaka.

¹⁷ Ena vakayacora vei kemuni ko Jiova vei ira talega na nomuni tamata, kei na vale i tamamuni, na gauna sa sega tale e vakakina, mai na siga sa lako tani kina mai Juta ko Ifereimi—na tui Asiria.”

¹⁸ Ia ena yaco e na siga ko ya, ena kalu ko Jiova ki na lago sa tiko mai na vu ni uciwai ni Ijipita, kei na pi mai na vanua ko Asiria.

¹⁹ Ia era lako mai, ena tiko kece e na veibuca e lala, kei na veiqara ni uluvatu, kei na kau vakavotona kecega, kei na veico kecega.

²⁰ E na siga ko ya ena tasia ko Jiova e nai tasi sa voli mai na tai kadua ni uciwai [na Uferetisi] — kei na tui Asiria—na ulu kei na vutika ni yava, kei na kumina talega ena tasia laivi.

²¹ Ia e na siga ko ya, ena vakania e dua na bulumakau yalewa ka rua na sipi e dua na tamata,

²² ka na kana bata ko koya e na vuku ni kena levu na wai-ni-sucu era sa solia; ni ra na kania na bata kei na oni ko ira kecega era vo tiko e na vanua.

²³ Ia ena yaco e na siga ko ya, na tikina kece sa tu kina na vaini e udolu sa dau kenai voli e dua na udolu na sikeli siliva, ena yaco ga me veikau vakavotona ka veisoni.

²⁴ Era na vakagasau ka vakadakai titi na tamata era lako yani kina; ni na veikau vakavotona ka veisoni na vanua taucoko.

²⁵ Ia na veiulu-ni-koro kecega sa dauwereci e nai sivi, sa dredre mo lako kina e na vuku ni kau vakavotona kei na soni e rerevaki; ena kedra yasana ga na bulumakau me ra lako tu kina, kei na vanua era na lako voli kina na manumanu lalai.