Aisea 3 - Ai Vola Tabu (Vakadewa Makawa Vakavoutaki 2021)

Sa Cudruvi ko Jerusalemi kei Juta

¹ Raica, na Turaga ko Jiova-ni-lewevuqa sa kauta tani mai Jerusalemi kei Juta na ka kece sara sa bula kina— na madrai kecega sa bula kina, kei na wai kecega sa bula kina—

² na tamata qaqa kei na tamata i valu, na turaganilewa kei na parofita, na daurairai kei na qase,

³ na turaga-ni-valu ni lewe limasagavulu kei koya na tamata sa vakaitutu cecere, na lewe ni matabose kei na kena-dau ni daucaka mana kei koya na kena-dau e na vosa.

⁴ Ia ka'u na lesi ira na gone me nodra turaga, ia na gone lalai ena lewai ira.

⁵ A ra na dui ia na veivakasaurarataki na tamata yadua vua e dua tale, vua talega na kai nona; era na cakacaka vakavosalevu na gone vua na qase, kei na tamata tawa vanua vua na tamata turaga.

⁶ E dua na tamata ena qai goleva na tacina e na vale i tamana, ka kaya, “Sa tu vei iko nai sulu; mo neitou turaga mada, ia na ca oqo mo vakatulewa ga kina.”

⁷ E na siga ko ya ena dulaki liga mai ko koya, ka kaya, “Au na sega ni dauveivakabulai; ni sa sega na madrai se nai sulu e noqu vale; dou kakua sara ni lesi au me'u lewai ira na tamata.”

⁸ Ni sa rusa ko Jerusalemi, ka sa bale ko Juta, ni sa duatani na nodra vosa kei na nodra i valavala vei Jiova, ka vakararawataka na matana vakaiukuuku.

⁹ Ai rairai ni matadra sa beitaki ira ni ra ca; ia na nodra i valavala ca era sa vakavotuya me vakataki Sotoma, era sa sega ni vunia. Ena ca ko ira oqo! Ni ra sa vakacacani ira vakataki ira ga.

¹⁰ Dou kaya vua na yalododonu ena yaco ga vua na vinaka, ni ra na kania na vua ni nodra i valavala.

¹¹ Ena ca ko ira na tamata ca! Ena yaco ga vua na ca, na ka sa cakava na ligana ena caka talega vua.

¹² Na noqu tamata—era sa gone ga ko ira era sa vakasaurarataki ira, ka sa lewai ira ko ira na yalewa. Oi kemudou na noqu tamata, dou sa vakacalai vei ira na liutaki kemudou ka vakacacana na sala ko ni sa lako kina.

¹³ Sa tu mai ko Jiova me ia na veitotaki; sa tu me lewai ira na tamata.

¹⁴ Ena ia na lewa ko Jiova vei ira na qase ni nona tamata kei iratou na nodra turaga: Ni sai kemudou ka kania oti na loga-ni-vaini; na ka sa kovea mai vei ira na dravudravua sa tu ga e na nomudou veivale.

¹⁵ A cava dou sa butuki ira sobu kina na noqu tamata, ka butuqaqia na matadra na dravudravua? sa taroga na Turaga ko Jiova-ni-lewevuqa.

Ai Vakasala Vei Ira na Goneyalewa ni Saioni

¹⁶ A sa kaya talega ko Jiova: Ni ra sa qaciqacia na goneyalewa ni Saioni, ka sa vakateqateqa na nodra i lakolako, ka sa dauvere na matadra, ka sa lako vakaivukivuki, ka sa tataqiriqiri tu na vesa ni yavadra;

¹⁷ o koya ena lewa kina na Turaga me tubura na buradeladra na goneyalewa ni Saioni na mate, ka na vakaluvawaletaki ira ko Jiova.

¹⁸ E na siga ko ya ena luvata tani kina na Turaga na nodra vesa lagilagi, kei na lawa ni drau ni uludra, kei na nodra i taube civa;

¹⁹ na sau ni daligadra, kei na qato, kei nai ubi,

²⁰ nai sala, kei na sinucodo ni vesa, kei nai vau, kei na tavaya ka boi vinaka, kei nai vakadaro ni ca,

²¹ na mama, kei nai sau ni ucu;

²² nai sulu vakaiukuuku, kei na curucuru, kei na sole, kei na taga ni lavo,

²³ na iloilo, kei nai sulu lineni matailalai, kei nai sala, kei nai ubi levu mamare.

²⁴ Ia ena yaco mei sosomi kei nai saluaki na ka e bona; ka mei sosomi ni vau vakaiukuuku na dali; kei nai sosomi ni ulu sa talitali vinaka na ulu cou; kei nai sosomi ni i sulu sau levu nai sulu taga; kei na madua mei sosomi ni matavinaka.

²⁵ A nomu tagane era na mate e nai seleiwau, kei ira na nomu qaqa e nai valu.

²⁶ Ena levu na lele kei na vakaloloku e na nona matamata-ni-koro; sa vakalalai tu, ka sa tiko sobu e na qele.