Aisea 2 - Ai Vola Tabu (Vakadewa Makawa Vakavoutaki 2021)

Na Vale i Jiova e na Gauna mai Muri

¹ Na vosa ka vakatakilai vei Aisea na luve i Emosi e na vuku i Juta kei Jerusalemi.

² Sa na yaco e na gauna mai muri, ni na vakataudeitaki na ulunivanua ni vale i Jiova me sivia na veiulunivanua, ena vakaceceretaki ka me lolovira na veiulu-ni-koro; ka ra na kui yani kina na veimatanitu kecega.

³ A ra na lako na tamata e lewe vuqa, ka kaya, “Me da mai la'ki cabe cake ki na ulunivanua i Jiova, ki na vale ni Kalou i Jekope; ena vakavulica vei keda ko koya na nona i valavala, ia eda na muria na nona sala.” Ni na lako yani mai Saioni na vunau, kei na vosa i Jiova mai Jerusalemi.

⁴ Ia, ena ia na veilewai e na vuku ni veimatanitu, ka na vunauci ira na veimataqali e vuqa; ka ra na tukitukia na nodra i seleiwau mei bati ni siviyara, kei na nodra moto mei sele ni samaki; ena sega ni lave i seleiwau e dua na matanitu ki na dua tale na matanitu, a ra na sega ni vulica tale nai valu.

Cudruvi ko Ira na Dokadoka ka Viavialevu

⁵ Koi kemudou na lewe-ni-vuvale i Jekope, me da mai lako voli e na rarama i Jiova!

⁶ Ka ni kemuni a biuti ira na nomuni tamata na vale i Jekope, ni sa tawa na nodra vanua e na daurairai mai na tokalau, kei ira na daucaka mana lasu me vakataki ira na kai Filisitia, ka ra sa muria na nodra i valavala na kai tani.

⁷ Ia na nodra vanua talega sa sinai e na siliva kei na koula, ka sa sega ni wili rawa na nodra i yau; ka sa ka levu na ose e na nodra vanua ka sa sega ni wili rawa na nodra qiqi-ni-tamata.

⁸ Ka sa oso na nodra vanua e na matakau; era sa cuva ki na cakacaka ni ligadra, ki na veika sa cakava nai qaqalo ni ligadra.

⁹ A sa cuva kina na tamata wale, ka sa vakayalomalumalumutaki koya na tamata turaga— mo ni kakua ni vosoti ira!

¹⁰ Mo curuma na qara vatu, ka vunitaki iko e na qele mai na ka rerevaki i Jiova, kei nai ukuuku ni nona ka vakaturaga.

¹¹ Na mata viavialevu ni tamata ena vakayalomalumalumutaki, kei na nodra viavialevu na tamata ena vakabalei sobu; ia ena cecere duaduaga ko Jiova e na siga ko ya.

¹² Ia ena dua na siga i Jiova-ni-lewevuqa vei ira kecega era sa yalolevu ka viavialevu, kei ira kecega era sa vakacecerei; ia ena vakamalumalumutaki.

¹³ Ena tauca kece talega na sitari ni Lepanoni, sa cecere ka laveti cake; kei na oki kecega ni Pasani;

¹⁴ kei na ulunivanua cecere kecega, kei na ulu-ni-koro kecega sa cecere cake;

¹⁵ kei na vale ni valu cecere kecega, kei na bai ni valu kecega;

¹⁶ kei na waqa kecega ni Tasisi, kei nai yaya kecega e dauvinakati.

¹⁷ Ia ena vakabalei sobu na yalolevu ni tamata, ka vakamalumalumutaki na viavialevu ni tamata; ia ko Jiova duaduaga ena cecere ena siga ko ya.

¹⁸ Ia na matakau ena vakaotia sara ko koya.

¹⁹ A ra na curu na tamata ki na qara vatu kei na qara qele, e na vuku ni ka rerevaki i Jiova, kei nai ukuuku ni nona i tutu vakaturaga, ni sa qai tucake ko koya me vakayavalati vuravura vakalevu.

²⁰ E na siga ko ya ena biuta tani na tamata na nona matakau siliva kei na nona matakau koula, ka cakava me soro kina ko koya ki na kalavo kei na beka;

²¹ me la'ki curu ki na qara vatu kei na gusu ni uluvatu, e na vuku ni nona rerevaki Jiova, kei na nona i ukuuku vakaturaga, ni sa qai tucake ko koya me vakayavalati vuravura vakalevu.

²² Dou kua ni goleva e dua na tamata, sa tiko e na qara ni ucuna na nona i cegu, ni sa yaga ki na cava ko koya?