Aisea 13 - Ai Vola Tabu (Vakadewa Makawa Vakavoutaki 2021)

E na Cudruvi Papiloni na Kalou

¹ Na vosa ni parofisai bibi kei Papiloni, oqori ka raica ko Aisea na luve i Emosi.

² Dou vakarewataka na drotini e na ulunivanua cecere; tabalaka na kaci vei ira; yalovaka na ligamudou me ra curuma na nodra matamata-ni-koro na turaga.

³ Au sa vakaroti ira ka'u sa vakatabuya, io ka'u a kacivi ira na noqu tamata qaqa, ko ira era marautaka na ka ka'u na rogo kina, me ra vakayacora na noqu cudru.

⁴ Na rorogo ni valu levu e na veiulunivanua, sa vaka era sa lewe vuqa! A domo ni nodra ue na veimatanitu ni lewe ni veivanua era sa soqoni vata! Ko Jiova-ni-lewevuqa sa vakasoqoni ira vata na nona mataivalu me ia nai valu.

⁵ Era sa lako mai na vanua yawa, mai na vu ni lomalagi, io ko Jiova, kei nai yaragi ni nona cudru levu, me vakarusa na vanua taucoko.

⁶ Dou qoqolou; ni sa voleka na siga i Jiova; ena yaco me vaka na veivakarusai mai vei Koya sa Kaukauwa.

⁷ Ena malumalumu kina na ligadra kecega, ka waicala na yalo ni tamata kecega,

⁸ a ra na sautaninini. Na yaluma kei na rarawa ena tarai ira; era na yaluma me vaka na yalewa sa taratara. Era na dui kidacala e dua vua e dua; ia na matadra ena vaka na yameyame ni buka.

⁹ Raica, sa toro mai na siga ni Jiova, sa ka rarawa dina sara e na cudru levu kei na cudru waqawaqa, me vakarusa na vanua, ia ena vaqeavutaka ko koya na kena tamata i valavala ca.

¹⁰ Ni na sega ni cila mai na kalokalo ni lomalagi kei na veikalokalo era vakayacani vata; ena butobuto na mata-ni-siga ni sa cabe mai, kei na vula ena sega talega ni cila mai.

¹¹ Ia ka'u na cudruvi vuravura e na vuku ni kena ca, kei na tamata caka cala e na vuku ni nodra i valavala ca; ka'u na muduka talega na nodra viavialevu na yalolevu, ka vakasivoya na nodra viavia turaga era daurerevaki.

¹² Ka'u na cakava me kunekunei dredre na tamata ka rawarawa na koula dina; io me kunekunei dredre e dua bauga na tamata ka rawarawa na koula ni Ofa.

¹³ Ia ka'u na vakayavalati lomalagi, ko vuravura talega ena tavuki tani mai na kena yasana, e na cudru levu i Jiova-ni-lewevuqa, kei na siga ni nona cudru waqawaqa.

¹⁴ Ia ena vaka na dia sa vakasasataki, kei na sipi sa sega e vakasoqona, era na dui lesu vei ira na kai nona, ka dui dro ki na nona vanua.

¹⁵ O koya yadua sa kune ena lausua, kei koya yadua sa tauri ena mate e nai seleiwau.

¹⁶ A nodra gone ena botobotolaki ki na vatu e matadra; a nodra veivale ena yanaki, ka na yarataki na watidra.

¹⁷ Raica, ka'u na vakauqeti ira na kai Mitia me nodra meca, era na sega ni nanuma na siliva, ka ra na sega ni marautaka na koula.

¹⁸ A nodra dakai-titi ena vakabalei ira na cauravou ki na vatu; na vua ni kete era na sega ni lomana; ena sega ni loloma na matadra vei ira na gone.

¹⁹ Ia ko Papiloni, ka rogo vei ira na veimatanitu, na nodra ka lagilagi era dokai ira kina na kai Kalitia, ena tautauvata kei Sotoma kei Komora ni sa vukica na Kalou.

²⁰ Ena sega ni tawa tale, ena sega tale ni tiko kina e dua nai tabatamata; ena sega ni birika mai kea na kai Arapea na nona valelaca, ko ira talega nai vakatawa era na sega ni vakadavora mai kea na nodra qele ni sipi.

²¹ Ia ena koto ga mai kea na manumanu kila, ka na tawa na nodra veivale e na manumanu dautagi vakaloloma; ena tiko mai kea na luve ni ositeriji, ena meke mai kea na me-tevoro.

²² Ena tagi na wolifa e na nodra veivale vakaturaga, kei na gata lelevu e na nodra bure vinaka; ka sa voleka ni yaco na kena gauna, ia na kena siga ena sega ni vakaberaberataki.