Aisea 1 - Ai Vola Tabu (Vakadewa Makawa Vakavoutaki 2021)

¹ A raivotu i Aisea na luve i Emosi, ka raica ko koya ka sa baleti Juta kei Jerusalemi e na gauna i Usaia, kei Jocame, kei Easi, kei Esekaia, ko iratou na tui Juta.

Era Sa Vunauci na Juta e na Vuku ni Nodra Talaidredre

² Dou rogoca, na lomalagi, ka vakatudaliga, na vuravura; ni sa kaya mai ko Jiova: “Ka'u a susuga ka vakalevulevui ira na luvequ, ia ko ira, era sa vuki tani vei au.

³ Sa kila na nona i taukei na bulumakau, kei na asa na bai ni nona turaga; ia ko ira na Isireli era sa sega ni kilai au, ko ira na noqu tamata era sa sega ni nanumi au.”

⁴ Ulei na matanitu ca, ko ira na tamata sa bitaki e na caka cala, na kawa ni valavala ca, na gone dauvakacaca, era sa biuti Jiova, era sa vakacudrui Koya na Yalosavasava i Isireli, era sa vuki tani tale!

⁵ A cava na vuna mo dou yaviti tale kina? A cava dou sa vuki tani tikoga kina? Sa mate taucoko na ulumu, ka sa malumalumu taucoko na lomamu.

⁶ Mai na qeteqete ni yavamu ka cavaraka sara ki na ulumu, sa sega kina na tikimu e bula; sa mavoa ga, a sa dabuiloa, a sa dra tikoga; sa sega ni tasogo, se viviraki, se lumuti e nai lumu.

⁷ A nomudou vanua sa lala, a nomudou veikoro sa kama e na bukawaqa; ko ira na kai tani era sa kania na nomudou veiwere e na matamudou, a sa lala didi me vaka ni sa dauvukica ko ira na kai tani.

⁸ Ka sa biu tu na goneyalewa ni Saioni me vaka na vale bolabola e na loga-ni-vaini, me vaka nai cili e na loga ni kiukaba, me vaka na koro sa kabai.

⁹ Kevaka sa sega ni lewa ko Jiova-ni-lewevuqa me vo tiko e le vica vei keda, eda sa qai vakataki Sotoma, eda sa qai vakataki Komora.

¹⁰ Dou rogoca na vosa i Jiova, koi kemudou ka daulewai Sotoma! Dou vakatudaliga ki na vunau ni noda Kalou, koi kemudou na kai Komora!

¹¹ “A cava na kena yaga vei au na nomudou i soro e vuqa? sa kaya ko Jiova; Sa rui levu vei au na sipi tagane mei soro kama, kei na uro ni manumanu sa vakani vinaka; ia na dra ni bulumakau, kei na dra ni lami, kei na dra ni me tagane ka'u sa sega ni vinakata.

¹² “Ni dou sa rairai mai e mataqu, ko cei sa taroga vei kemudou oqo mo dou mai butubutuka na noqu lomanibai?

¹³ Dou kakua ni kauta tale mai nai vakacacabo wale; nai madrali boi vinaka sa ka vakasisila vei au. Na vula vou kei na Siga ni Vakacecegu kei na kaci ni soqoni vakalotu— ka'u sa sega ni vosota rawa nai valavala ca kei na soqosoqo tabu.

¹⁴ Na nomudou vula vou kei na nomudou solevu tabu sa cata na yaloqu; era sai colacola bibi vei au; ka'u sa oca na colata voli.

¹⁵ Ni dou sa dodoka mai na ligamudou, ka'u na tabonaka na mataqu mai vei kemudou; ka dina ga ni dou sa daumasu vakavuqa, ka'u na sega ni rogoca; na ligamudou sa lomoci tu e na dra.

¹⁶ Dou vui kemudou; dou vakasavasavataki kemudou; kauta tani e mataqu na nomudou i valavala ca; dou muduka na caka ca,

¹⁷ vulica na caka vinaka; segata na lewa dodonu, vukei koya sa vakasaurarataki, dou ia na veimaroroi e na vukuna na luveniyali, kei na dautataro e na vuku ni yada.

¹⁸ “Dou mada mai, me tou veivosaki vata, sa kaya ko Jiova: ke sa vaka na ka kulakula na nomudou i valavala ca, sa na vulavula me vaka na uca-vulavula; ke sa damuvakula sa na vaka na vutika ni sipi.

¹⁹ Kevaka dou vakadinata ka vakarorogo, dou na kania na veta ni vuata.

²⁰ Ia kevaka dou sa bese ka sa talaidredre, ena kani kemudou nai seleiwau; ni sa tukuna oqo na gusu i Jiova.”

Na Koro i Valavala Ca

²¹ Sa yaco vakacava ki na koro yalodina me vuki me dautagane! O koya ka sa sinai e na lewa dodonu, na ka dodonu sa dautiko kina— ia edaidai sa tiko kina na daulaba!

²² A nomu siliva sa vuki me de-ni-kaukamea, na memu waini sa waicala.

²³ Ko ira na nomu turaga era sa dautalaidredre, ka sa nodra i tokani na daubutako. Era sa vinakata kecega nai solisoli ni veivaqumi, ka dauguta nai loloma. Era sa sega ni ia na lewa dodonu vei ira na luveniyali, ka sa sega ni yaco vei ira na nodra leqa na yada.

²⁴ O koya sa kaya kina na Turaga, ko Jiova-ni-lewevuqa, ko Koya na Kaukauwa i Isireli: “Io, ka'u na vakacegui au mai vei ira na noqu meca, ka vakayacora na cudru vei ira era cati au!

²⁵ Ia ka'u na tarai iko mada, ka savata tani laivi na nomu de-ni-kaukamea, ka kauta tani kecega na nomu ca.

²⁶ Ka'u na lesi ira tale na nomu turaganilewa me vaka eliu, kei ira na nomu daubose me vaka e nai vakatekivu. Ka oti, ko na qai vakatokai, Na koro daucaka dodonu, na koro yalodina.”

²⁷ Ena vakabulai ko Saioni e na lewa dodonu; kei ira era na lesu tale mai, e nai valavala dodonu.

²⁸ Ia na nodra rusa na dautalaidredre kei ira nai valavala ca ena yaco vata ga, ia ko ira era sa biuti Jiova era na vakarusai.

²⁹ Ni ra na maduataka na oki dou sa daudomona; dou na taqaya talega e na vuku ni veiwere dou sa digitaka.

³⁰ Ni dou na vaka na vu ni oki sa malai na drauna, kei na were sa sega kina na wai.

³¹ Ia ko koya sa kaukauwa ena vaka na wa ni cina, kei na nona cakacaka me vaka na lidi ni buka; a rau na kama vata ruarua, ka sega e dua me na bokoca.